ಉಕ್ರೇನ್​​ನಿಂದ ನವೀನ್​ ಪಾರ್ಥಿವ ಶರೀರ ತರುವುದು ಸರ್ಕಾರದ ಕರ್ತವ್ಯ: ಸಲೀಂ ಅಹ್ಮದ್

ಪೋಷಕರ ಪ್ರಮುಖ ಬೇಡಿಕೆ ನವೀನ್​ ಪಾರ್ಥೀವ ಶರೀರದ ಅಂತಿಮ ದರ್ಶನ ಮಾಡಬೇಕು ಎನ್ನುವುದಾಗಿದೆ. ಸರ್ಕಾರ ಇದಕ್ಕೆ ಅವಕಾಶ ಮಾಡಿಕೊಡಬೇಕು. ಉಕ್ರೇನ್ ಸಿಲುಕಿರುವ ಭಾರತೀಯರನ್ನ ದೇಶಕ್ಕೆ ಕರೆತರುವ ಕೆಲಸವಾಗಬೇಕು ಎಂದು ಸಲೀಂ ಅಹ್ಮದ್ ಹೇಳಿದರು.

ಹಾವೇರಿ: ಉಕ್ರೇನ್ ಮತ್ತು ರಷ್ಯಾ ಯುದ್ಧದ ಸಂದರ್ಭದಲ್ಲಿ ಸಾವನ್ನಪ್ಪಿದ ಜಿಲ್ಲೆಯ ರಾಣೆಬೆನ್ನೂರು ತಾಲೂಕಿನ ಚಳಗೇರಿ ಗ್ರಾಮದ ನವೀನ್​ನ ಮನೆಗೆ ಕೆಪಿಸಿಸಿ ಕಾರ್ಯಾಧ್ಯಕ್ಷ ಸಲೀಂ ಅಹ್ಮದ್ ಭೇಟಿ ನೀಡಿದರು.

ನವೀನ್​​ ಭಾವಚಿತ್ರಕ್ಕೆ ಪುಷ್ಪಾರ್ಚನೆ ಸಲ್ಲಿಸಿದ ಸಲೀಂ ಅಹ್ಮದ್, ಆತನ ತಂದೆ-ತಾಯಿ ಅಣ್ಣನಿಗೆ ಸಾಂತ್ವನ ಹೇಳಿದರು. ಅಲ್ಲದೆ,​ ಕುಟುಂಬಕ್ಕೆ ವೈಯಕ್ತಿಕವಾಗಿ ಸಲೀಂ ಅಹ್ಮದ್​ ಒಂದು ಲಕ್ಷ ರೂಪಾಯಿ ಚೆಕ್ ನೀಡಿದರು. ಈ ಸಂದರ್ಭದಲ್ಲಿ ಮಾತನಾಡಿದ ಅವರು, ಸರ್ಕಾರವು ಆದಷ್ಟು ಬೇಗ ನವೀನ್ ಪಾರ್ಥೀವ ಶರೀರವನ್ನು ತರಬೇಕು ಎಂದು ಆಗ್ರಹಿಸಿದರು.

ಪೋಷಕರ ಪ್ರಮುಖ ಬೇಡಿಕೆ ಪಾರ್ಥೀವ ಶರೀರದ ಅಂತಿಮ ದರ್ಶನ ಮಾಡಬೇಕು ಎನ್ನುವುದಾಗಿದೆ. ಸರ್ಕಾರ ಇದಕ್ಕೆ ಅವಕಾಶ ಮಾಡಿಕೊಡಬೇಕು. ಉಕ್ರೇನ್​ನಲ್ಲಿ ಸಿಲುಕಿರುವ ಭಾರತೀಯರನ್ನು ದೇಶಕ್ಕೆ ಕರೆತರುವ ಕೆಲಸವಾಗಬೇಕು. ನಮ್ಮಲ್ಲಿನ ಶಿಕ್ಷಣ ವ್ಯವಸ್ಥೆ ಬದಲಾಗಬೇಕು ಎಂದು ನವೀನ್ ಸಾವು ರಾಜ್ಯಕ್ಕೆ ಒಂದು ಸಂದೇಶ ಕೊಟ್ಟಿದೆ ಎಂದು ಸಲೀಂ ಅಹ್ಮದ್ ತಿಳಿಸಿದರು.

ಸಿರಿಗೆರೆ ಶ್ರೀಗಳ ಭೇಟಿ: ನವೀನ್​ ಮನೆಗೆ ಸಿರಿಗೆರೆ ಶ್ರೀಗಳು ಭೇಟಿ ನೀಡಿ ಪೋಷಕರಿಗೆ ಸಾಂತ್ವನ ಹೇಳಿ, ನವೀನ್​​ ಸಹೋದರ ಹರ್ಷನಿಗೆ ಧೈರ್ಯ ತುಂಬಿದರು.

ನವೀನ್​ ಮನೆಗೆ ಸಿರಿಗೆರೆ ಶ್ರೀಗಳ ಭೇಟಿ

ಬ್ಯಾಡಗಿಯ ಕುಶಾಲ ಸಂಕಣ್ಣನವರ್, ಚಳಗೇರಿ ಗ್ರಾಮದ ಅಮೀತ್ ಮತ್ತು ಸುಮನ್​ಗೆ ಕರೆ ಮಾಡಿ ಮಾತನಾಡಿ, ಆದಷ್ಟು ಭೇಗ ನೀವು ಭಾರತಕ್ಕೆ ಮರಳಲಿದ್ದೀರಿ ಎಂದು ಸಿರಿಗೆರೆ ಶ್ರೀಗಳು ಧೈರ್ಯ ಹೇಳಿದರು.

ಇದನ್ನೂ ಓದಿ:ಉಕ್ರೇನ್​ನಿಂದ ಸುರಕ್ಷಿತವಾಗಿ ಬಂದಿಳಿದ ಕೊಡಗಿನ ಕುವರಿ ಅಕ್ಷಿತಾ