ಶಿಗ್ಗಾವಿ ಶೂಟೌಟ್ ಪ್ರಕರಣದ ಆರೋಪಿ ಬಂಧನಕ್ಕೆ ಒತ್ತಾಯ: ಗಾಯಾಳು ಸಂಬಂಧಿಕರಿಂದ ಪೊಲೀಸರಿಗೆ ಮನವಿ

ಶಿಗ್ಗಾವಿಯಲ್ಲಿ ವಸಂತಕುಮಾರ್ ಎಂಬಾತನ ಮೇಲೆ ಶೂಟೌಟ್ ಆಗಿ 18 ದಿನ ಕಳೆದರೂ ಆರೋಪಿಗಳನ್ನು ಪತ್ತೆ ಮಾಡಿಲ್ಲ. ಆದಷ್ಟು ಬೇಗ ಆರೋಪಿಯನ್ನು ಪತ್ತೆ ಹಚ್ಚುವಂತೆ ಪೊಲೀಸರಿಗೆ ವಸಂತಕುಮಾರ್​ ಸಂಬಂಧಿಕರು ಮನವಿ ಸಲ್ಲಿಸಿದರು.

ಹಾವೇರಿ:ಸಿಎಂ ಬಸವರಾಜ ಬೊಮ್ಮಾಯಿ ಕ್ಷೇತ್ರ ಶಿಗ್ಗಾವಿಯಲ್ಲಿ ಶೂಟೌಟ್ ಆಗಿ 18 ದಿನಗಳೇ ಕಳೆದಿವೆ. ಆದರೂ ಸಹ ಆರೋಪಿ ಬಂಧಿಸುವಲ್ಲಿ ಪೊಲೀಸರು ವಿಫಲರಾಗಿದ್ದಾರೆ ಎಂದು ಶೂಟೌಟ್​ದಿಂದ ಗಾಯಗೊಂಡ ವಸಂತಕುಮಾರ್ ಸಂಬಂಧಿಕರು ಆರೋಪಿಸಿದ್ದಾರೆ.

ಆರೋಪಿಯ ಗುಂಡೇಟಿನಿಂದ ಗಾಯಗೊಂಡಿರುವ ವಸಂತಕುಮಾರ್​ ಹುಬ್ಬಳ್ಳಿ ಕಿಮ್ಸ್ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ. ವಸಂತಕುಮಾರ್ ಸಂಬಂಧಿಕರು ಪ್ರತಿಭಟನೆ ಬದಲು ಪೊಲೀಸರಿಗೆ ಮನವಿ ಸಲ್ಲಿಸಿದರು. ಪ್ರಕರಣದ ಆರೋಪಿಯನ್ನು ಶೀಘ್ರವೇ ಬಂಧಿಸಬೇಕು ಎಂದು ಒತ್ತಾಯಿಸಿದರು. ಆರೋಪಿ ಬಂಧಿಸಿ ಇಲ್ಲವೇ ಪ್ರಕರಣವನ್ನು ಸಿಐಡಿ ಅಥವಾ ಸಿಬಿಐಗೆ ವಹಿಸಿ ಎಂದರು.

ಈ ಕುರಿತಂತೆ ಮಾತನಾಡಿದ ವಸಂತಕುಮಾರ ತಂದೆ ತನ್ನ ಮಗನಿಗೆ ಏನು ಗೊತ್ತಿಲ್ಲರಿ, ಸಂಜೆ ತನಕ ಜಮೀನಿನಲ್ಲಿ ಟ್ರ್ಯಾಕ್ಟರ್​ನಲ್ಲಿ ಕೆಲಸ ಮಾಡಿದ್ದಾನೆ. ಸಂಜೆಯಾದ ನಂತರ ಶಿಗ್ಗಾವಿಗೆ ಸ್ನೇಹಿತರೊಂದಿಗೆ ಸಿನಿಮಾ ನೋಡಲು ಬಂದಿದ್ದ. ಈ ಸಂದರ್ಭದಲ್ಲಿ ಆರೋಪಿಯ ಜೊತೆ ಕ್ಷುಲ್ಲಕ ಕಾರಣಕ್ಕೆ ಜಗಳವಾಗಿದೆ. ಆರೋಪಿ ಟಾಕೀಜ್‌ನಿಂದ ಹೊರಗೆ ಹೋಗಿ ಬಂದು ಗುಂಡು ಹಾರಿಸಿದ್ದಾನೆ. ಮಗ ಆಸ್ಪತ್ರೆಯಲ್ಲಿ ಸಾವು ಬದುಕಿನ ಹೋರಾಟ ನಡೆಸಿ ಈಗ ಸ್ವಲ್ಪ ಆರೋಗ್ಯದಲ್ಲಿ ಚೇತರಿಸಿಕೊಳ್ಳುತ್ತಿದ್ದಾನೆ ಎಂದರು.

ಇದನ್ನೂ ಓದಿ:ಅಂದು 68ಕ್ಕೆ ಆಲೌಟ್​, ಇಂದು 67 ರನ್​ಗಳ ಜಯ... ಹೈದರಾಬಾದ್​ ವಿರುದ್ಧ ಸೇಡು ತೀರಿಸಿಕೊಂಡ ಆರ್​ಸಿಬಿ