'ಅಂಬಲಿ ಹಳಸಿತು ಕಂಬಳಿ ಬೀಸಿತಲೇ ಪರಾಕ್': ಗೊರವಯ್ಯ ನುಡಿದ ಕಾರ್ಣಿಕ ವಾಣಿ ಅರ್ಥವೇನು?

ಗೊರವಯ್ಯ ರಾಮಪ್ಪಜ್ಜ ನುಡಿದ 'ಅಂಬಲಿ ಹಳಸಿತು ಕಂಬಳಿ ಬೀಸಿತಲೇ ಪರಾಕ್' ಕಾರ್ಣಿಕ ನುಡಿಯು ಭವಿಷ್ಯದ ಶುಭ ನುಡಿಯೆಂದು ಜನರು ವಿಶ್ಲೇಷಿಸುತ್ತಿದ್ದಾರೆ.

ಹಾವೇರಿ/ವಿಜಯನಗರ:ಉತ್ತರ ಕರ್ನಾಟಕದ ಪ್ರಸಿದ್ಧ ಜಾತ್ರೆಗಳಲ್ಲಿ ಒಂದಾದ ವಿಜಯನಗರ ಜಿಲ್ಲೆ ಹೂವಿನಹಡಗಲಿ ತಾಲೂಕಿನ ಮೈಲಾರ ಗ್ರಾಮದ ಮೈಲಾರ ಲಿಂಗೇಶ್ವರ ಜಾತ್ರೆ ಅದ್ಧೂರಿಯಾಗಿ ಜರುಗಿತು. ಜಾತ್ರಾ ಮಹೋತ್ಸವದ ಅಂಗವಾಗಿ ಮಂಗಳವಾರ ಕಾರ್ಣಿಕೋತ್ಸವ ನಡೆಯಿತು. ಗ್ರಾಮದ ಡೆಂಕನಮರಡಿಯಲ್ಲಿ ಗೊರವಯ್ಯ ರಾಮಪ್ಪಜ್ಜ ಪ್ರಸ್ತುತ ವರ್ಷದ ಕಾರ್ಣಿಕ ನುಡಿದರು.

ಭವಿಷ್ಯವಾಣಿ ಎಂಬುದು ಭಕ್ತರ ನಂಬಿಕೆ:ಸುಮಾರು 14 ಅಡಿ ಬಿಲ್ಲೇನೇರಿದ ಗೊರವಯ್ಯ ರಾಮಪ್ಪಜ್ಜ 'ಅಂಬಲಿ ಹಳಸಿತು ಕಂಬಳಿ ಬೀಸಿತಲೇ ಪರಾಕ್' ಎಂದು ಕಾರ್ಣಿಕ ನುಡಿದು ಮೇಲಿನಿಂದ ಕಳಕ್ಕೆ ಧುಮುಕಿದರು. ಮೇಲಿನಿಂದ ಧುಮುಕಿದ ಗೊರವಯ್ಯ ರಾಮಪ್ಪಜ್ಜನನ್ನು ಭಕ್ತರು ಕೆಳಗೆ ಬೀಳದಂತೆ ಹಿಡಿದರು. ಸುಮಾರು 11 ದಿನಗಳ ಕಾಲ ಉಪವಾಸವಿರುವ ರಾಮಪ್ಪಜ್ಜ ಕೇವರ ಭಂಡಾರದ ನೀರು ಮಾತ್ರ ಸೇವಿಸುತ್ತಾರೆ. ಅಲ್ಲದೆ ಮೌನಿಯಾಗಿರುವ ರಾಮಪ್ಪಜ್ಜ ಕಾರ್ಣಿಕ ನುಡಿಯುವ ಮೊದಲು ಮೈಲಾರಲಿಂಗೇಶ್ವರ ದೇವಸ್ಥಾನದ ಧರ್ಮದರ್ಶಿ ವೆಂಕಪ್ಪಯ್ಯ ಒಡೆಯರ್​ ಅಪ್ಪಣೆ ಪಡೆದು ಕಾರ್ಣಿಕ ನುಡಿಯುತ್ತಾರೆ. ಈ ಕಾರ್ಣಿಕವನ್ನು ಪ್ರಸ್ತುತ ವರ್ಷದ ಭವಿಷ್ಯವಾಣಿಯಂದು ಭಕ್ತರು ನಂಬುತ್ತಾರೆ.

ಮೈಲಾರ ಲಿಂಗೇಶ್ವರ

ಕಾರ್ಣಿಕ ವಾಣಿ ಅರ್ಥವೇನು? : ಕಾರ್ಣಿಕದ ಮೇಲೆ ರಾಜ್ಯದ ಕೃಷಿ ಹಾಗೂ ರಾಜಕೀಯ ವಿಚಾರಗಳನ್ನು ವಿಶ್ಲೇಷಣೆ ಮಾಡಲಾಗುತ್ತದೆ. ಸ್ವತಃ ಮೈಲಾರಲಿಂಗನೇ ಗೊರವಪ್ಪನ ರೂಪದಲ್ಲಿ ಭವಿಷ್ಯವಾಣಿ ನುಡಿಯುತ್ತಾನೆ. ಇದು ದೈವವಾಣಿ ಎಂಬುದು ಭಕ್ತರು ನಂಬಿಕೆ. ಗೊರವಪ್ಪ ಕಾರ್ಣಿಕ ನುಡಿಯುತ್ತಿದ್ದಂತೆ ಅದರ ವಿಶ್ಲೇಷಣೆ ಮಾಡಲಾಗುತ್ತದೆ. ಪ್ರಸ್ತುತ ವರ್ಷದ ಕಾರ್ಣಿಕ ವಾಣಿ ವಿಶ್ಲೇಷಣೆ ಮಾಡಿದ ಧರ್ಮಾಧಿಕಾರಿ ವೆಂಕಪ್ಪಯ್ಯ ಒಡೆಯರ್​, "ಕಾರ್ಣಿಕದ ಪ್ರಕಾರ ಉತ್ತಮ ಮಳೆಯಾಗುತ್ತದೆ. ರೈತರು ಸುಭೀಕ್ಷೆಯಿಂದ ಇರಲಿದ್ದಾರೆ. ನಿಷ್ಠೆ ಮತ್ತು ಪ್ರಾಮಾಣಿಕ ವ್ಯಕ್ತಿ ರಾಜ್ಯಭಾರ ಮಾಡಲಿದ್ದಾರೆ" ಎಂದು ತಿಳಿಸಿದರು.

ಈ ರೀತಿಯ ಕಾರ್ಣಿಕಗಳನ್ನು ಹಲವು ವರ್ಷಗಳ ಹಿಂದಿನಿಂದ ಕೇತ್ರದಲ್ಲಿ ಹೇಳುತ್ತ ಬರಲಾಗುತ್ತಿದೆ. ರಾಜ್ಯ ಮತ್ತು ರಾಷ್ಟ್ರದಲ್ಲಿ ಪ್ರಾಮಾಣಿಕ ವ್ಯಕ್ತಿ ಆಡಳಿತ ನಡೆಸಿಲಿದ್ದಾರೆ. ರೈತರಿಗೆ ಮಳೆ ಬೆಳೆ ಚೆನ್ನಾಗಿ ಆಗಲಿದೆ ಎಂಬ ಮೂನ್ಸೂಚನೆಯನ್ನ ಮೈಲಾರಲಿಂಗ ತಿಳಿಸಿದ್ದಾನೆ ಎಂದು ವೆಂಕಪ್ಪಯ್ಯ ಒಡೆಯರ್​ ವಿಶ್ಲೇಷಣೆ ಮಾಡಿದರು. ಕಾರ್ಣಿಕ ನುಡಿ ಕೇಳಿದ ನಂತರ ಮಾಜಿ ಸಚಿವ ಬಸವರಾಜ ಶಿವಣ್ಣನವರ್ ಸಂತಸ ವ್ಯಕ್ತಪಡಿಸಿದರು. ಪ್ರಸ್ತುತ ವರ್ಷ ಒಳ್ಳೆಯ ಕಾರ್ಣಿಕವಾಗಿದೆ. ರೈತರು ಊಟ ಮಾಡಿ ಹಳಸುವಷ್ಟು ಮಳೆ ಬೆಳೆ ಬರಲಿದೆ. ಕಂಬಳಿ ಬೀಸಿತಲೆ ಎಂದರೇ ವಿಶೇಷವಾಗಿ ಉತ್ತಮ ವ್ಯಕ್ತಿ ರಾಜ್ಯದ ಚುಕ್ಕಾಣಿ ಹಿಡಿಯಲಿದ್ದಾರೆ ಎಂಬುದು ದೈವ ವಾಣಿಯಾಗಿದೆ ಎಂದು ಬಸವರಾಜ್ ಶಿವಣ್ಣನವರ್ ತಿಳಿಸಿದರು.

ಮೈಲಾರ ಲಿಂಗನಿಗೆ ವಿಶೇಷ ಪೂಜೆ:ಉತ್ತರ ಕರ್ನಾಟದ ಅತಿದೊಡ್ಡ ಜಾತ್ರೆಗಳಲ್ಲಿ ಒಂದಾದ ಮೈಲಾರ ಲಿಂಗೇಶ್ವರ ಜಾತ್ರೆ ವಿಶೇಷವಾಗಿದೆ. ಎಲ್ಲ ಜಾತ್ರೆಗಳಂತೆ ಇಲ್ಲಿ ರಥ ಎಳೆಯದೆ ಗೊರವಪ್ಪ ಕಾರ್ಣಿಕ ನುಡಿಯವದು ವಿಶೇಷ. ಮೈಲಾರಲಿಂಗನ ರೂಪದಲ್ಲಿ ಗೊರವಪ್ಪ ಕಾರ್ಣಿಕ ನುಡಿಯುವದನ್ನ ಕೇಳಲು ಬೇರೆ ರಾಜ್ಯಗಳು ಸೇರಿದಂತೆ ರಾಜ್ಯದ ವಿವಿಧಡೆಯಿಂದ ಲಕ್ಷಾಂತರ ಭಕ್ತರು ಆಗಮಿಸಿರುತ್ತಾರೆ.

ಮೈಲಾರ ಲಿಂಗೇಶ್ವರ ಜಾತ್ರೆ

ಮೈಲಾರಲಿಂಗನ ದರ್ಶನ ಪಡೆದು ಡೆಂಕನಮರಡಿಯಲ್ಲಿ ಗೊರವಪ್ಪನ ಕಾರ್ಣಿಕ ಆಲಿಸಿ ತಮಗೆ ತಿಳಿದಂತೆ ವಿಶ್ಲೇಷಣೆ ಮಾಡಿ ತಮ್ಮ ತಮ್ಮ ಗ್ರಾಮಗಳತ್ತ ಭಕ್ತರು ಮುಖಮಾಡುತ್ತಾರೆ. ಜಾತ್ರಾ ಮಹೋತ್ಸವದ ಅಂಗವಾಗಿ ಮೈಲಾರ ಲಿಂಗೇಶ್ವರ ದೇವಸ್ಥಾನಕ್ಕೆ ಮತ್ತು ಮೂರ್ತಿಗಳಿಗೆ ವಿಶೇಷ ಅಲಂಕಾರ ಮಾಡಲಾಗಿತ್ತು. ಭಕ್ತರು ಸರತಿಯಲ್ಲಿ ನಿಂತು ಮೈಲಾರ ಲಿಂಗನ ಕಣ್ತುಂಬಿಕೊಂಡರು. ಮುಂಜಾನೆಯಿಂದ ಮೈಲಾರ ಲಿಂಗನಿಗೆ ವಿಶೇಷ ಪೂಜೆ ಕೈಂಕರ್ಯಗಳನ್ನ ನಡೆಸಲಾಯಿತು. ಗೊರವಪ್ಪಗಳ ಬಾರಕೋಲ್ ಸೇವೆ, ಚವರಿ ಸೇವೆ ಸೇರಿದಂತೆ ವಿವಿಧ ಸೇವೆಗಳನ್ನ ಮೈಲಾರಲಿಂಗನಿಗೆ ಸಲ್ಲಿಸಿದರು.

ಇನ್ನು, ಕೆಲ ಭಕ್ತರು ಗೊರವಪ್ಪರ ಪಡ್ಡಲಗಿ ತುಂಬಿಸುವ ಮೂಲಕ ತಮ್ಮ ಹರಕೆ ತೀರಿಸಿದರು. ಡೆಂಕನಮರಡಿಯಲ್ಲಿ ಎಲ್ಲೆಂದರಲ್ಲಿ ಭಕ್ತರು ಮಣ್ಣಿನಿಂದ ಮನೆ, ಹಂದರ ಮತ್ತು ತೊಟ್ಟಿಲು ಕಟ್ಟುತ್ತಾರೆ. ಈ ರೀತಿ ಮಾಡಿದರೆ ಮನೆಯಿಲ್ಲದವರಿಗೆ ಮೈಲಾರ ಲಿಂಗ ಮನೆ ನೀಡುತ್ತಾರೆ. ಹಂದರ ಹಾಕಿದರೆ ವರ್ಷದೊಳಗೆ ಮದುವೆಯಾಗುತ್ತದೆ ಮತ್ತು ತೊಟ್ಟಿಲು ಕಟ್ಟಿದರೆ ಮಕ್ಕಳ ಫಲ ಸಿಗುತ್ತದೆ ಎಂಬ ನಂಬಿಕೆಯಿದೆ. ದೂರ ದೂರದ ಊರುಗಳಿಂದ ಭಕ್ತರು ಚಕ್ಕಡಿ ಮತ್ತು ಟ್ರ್ಯಾಕ್ಟರ್‌ಗಳಲ್ಲಿ ಆಗಮಿಸಿ ನಾಲ್ಕೈದು ದಿನಗಳ ಕಾಲ ಕ್ಷೇತ್ರದಲ್ಲಿದ್ದು ಜಾತ್ರೆ ಕಾರ್ಣಿಕ ಕೇಳಿ ಸಂಭ್ರಮಿಸುತ್ತಾರೆ.

ಕಾರ್ಣಿಕ ಗೊರವಪ್ಪನನ್ನ ದೈವದಂತೆ ನೋಡಿಕೊಳ್ಳುತ್ತಾರೆ. ಗೊರವಪ್ಪ ಬಿಲ್ಲಿನಿಂದ ಕೆಳಗ ದುಮುಕಿದಾಗ ಆತನ ತಲೆ ಯಾವ ಕಡೆ ಇರುತ್ತದೆ ಆ ದಿಕ್ಕಿನಲ್ಲಿ ಮಳೆ-ಬೆಳೆ ಸೊಂಪಾಗಿ ಬರುತ್ತದೆ ಎಂಬ ನಂಬಿಕೆ ಇದೆ. ಕಾರ್ಣಿಕ ಕಾರ್ಯಕ್ರಮದಲ್ಲಿ ಕಾಗಿನೆಲೆ ಕನಕಗುರುಪೀಠದ ನಿರಂಜನಾನಂದಪುರಿ ಶ್ರೀಗಳು ಸೇರಿದಂತೆ ಹಲವು ಸ್ವಾಮೀಜಿಗಳು ಉಪಸ್ಥಿತರಿದ್ದರು.

ಇದನ್ನೂ ಓದಿ:'ನಿಷ್ಠೆಯಿಂದಿರುವ ನಾಯಕನಿಗೆ ರಾಜ್ಯದ ಪಟ್ಟ': ಮೈಲಾರಲಿಂಗೇಶ್ವರ ಕಾರ್ಣಿಕ ಭವಿಷ್ಯ ನುಡಿ