ಡಿಕೆಶಿ, ಅನರ್ಹ ಶಾಸಕರ ಭವಿಷ್ಯ ನುಡಿಯಲು ಕೋಡಿ ಮಠದ ಸ್ವಾಮೀಜಿ ನಕಾರ!

ಡಿ ಕೆ ಶಿವಕುಮಾರ್ ಬಗ್ಗೆಯಾಗಲಿ.. ಅನರ್ಹ ಶಾಸಕರ ಬಗ್ಗೆಯಾಗಲಿ ಅಥವಾ ವೈಯಕ್ತಿಕ ರಾಜಕಾರಣದ ಕುರಿತಂತೆ ಏನನ್ನೂ ಹೇಳುವುದಿಲ್ಲ ಎಂದು ಕೋಡಿಮಠದ ಸ್ವಾಮೀಜಿ ತಿಳಿಸಿದ್ದಾರೆ.

ಹಾವೇರಿ:ಮಾಜಿ ಸಚಿವ ಡಿ ಕೆ ಶಿವಕುಮಾರ್​ ಮತ್ತು ಅನರ್ಹ ಶಾಸಕರ ವೈಯಕ್ತಿಕ ರಾಜಕಾರಣದ ಬಗ್ಗೆ ಮಾತನಾಡುವುದಿಲ್ಲವೆಂದು ಕೋಡಿ ಮಠದ ಶಿವಾನಂದ ಶಿವಯೋಗಿ ರಾಜೇಂದ್ರ ಸ್ವಾಮೀಜಿ ಸ್ಪಷ್ಟಪಡಿಸಿದ್ದಾರೆ.

ನಗರದಲ್ಲಿ ಮಾಧ್ಯಮದವರೊಂದಿಗೆ ಮಾತನಾಡಿದ ಅವರು, ವೈಯಕ್ತಿಕವಾಗಿ ಭವಿಷ್ಯ ನುಡಿದು ಯಾರ ಮನಸ್ಸಿಗೂ ನೋವುಂಟು ಮಾಡಲು ಬಯಸುವುದಿಲ್ಲ ಎಂದರು. ಇನ್ನು ಬರುವ ಕಾರ್ತಿಕ ಮಾಸದವರೆಗೆ ಮಳೆ, ಗಾಳಿ ಮತ್ತು ಜಲದಿಂದ ವಿಪತ್ತು ಎದುರಾಗಲಿದೆ ಎಂದು ಪ್ರಕೃತಿ ವೈಪರಿತ್ಯದ ಬಗ್ಗೆ ಸ್ವಾಮೀಜಿ ಭವಿಷ್ಯ ನುಡಿದ್ರು.

ರಾಜ್ಯ ಸರ್ಕಾರದ ಭವಿಷ್ಯದ ಬಗ್ಗೆ ಮಾತನಾಡಿದ ಸ್ವಾಮೀಜಿ, ಸರ್ಕಾರ ಅಧಿಕಾರಕ್ಕೆ ಬರುವ ಮೊದಲೇ ಅಧಿಕಾರಾವಧಿ ಬಗ್ಗೆ ಹೇಳಿದ್ದೆ. ಅದಕ್ಕೆ ಇನ್ನೂ ಮೂರು ತಿಂಗಳು ಬಾಕಿ ಇದ್ದು, ಅಲ್ಲಿಯವರೆಗೆ ಕಾದು ನೋಡಿ ಎಂದು ತಿಳಿಸಿದರು.

ಇದೇ ವೇಳೆ ಪಾಕ್ ಜೊತೆಗಿನ ಯುದ್ಧದ ಬಗ್ಗೆ ಮಾತನಾಡಿದ ಸ್ವಾಮೀಜಿ, ಅದು ದಾಯಾದಿ ಕಲಹ. ಯಾವಾಗಲೂ ಇರುವುದೇ ಎಂದು ತಿಳಿಸಿದರು.