ಹಾವೇರಿ: ಕೃಷಿ ಭೂಮಿ ಸ್ವಾಧೀನಕ್ಕೆ ಮುಂದಾದ ಕೆಐಎಡಿಬಿ, ರೈತರ ಆಕ್ರೋಶ

2009ರಲ್ಲಿ ಇಲ್ಲಿನ ಭೂಮಿ ಸ್ವಾಧೀನಕ್ಕೆ ಮುಂದಾಗಿದ್ದ ಕೆಐಎಡಿಬಿ ನಂತರ ಕಾರಣಾಂತರದಿಂದ ಹಿಂದೆ ಸರಿದಿತ್ತು. ಆದರೆ ಈಗ ಮತ್ತೆ ಸ್ವಾಧೀನಪಡಿಸಿಕೊಳ್ಳಲು ತೀರ್ಮಾನಿಸಿದ್ದು ರೈತರಿಗೆ ನೋಟೀಸ್ ನೀಡಿದೆ. ಕೆಐಎಡಿಬಿಯ ನೋಟಿಸ್ ರೈತರ ನಿದ್ದೆಗೆಡಿಸಿದೆ.

ಹಾವೇರಿ:ತಾಲೂಕಿನ ಕೊಳೂರು ಗ್ರಾಮದ ರೈತರು ಇದೀಗ ಆತಂಕದಲ್ಲಿದ್ದಾರೆ. ಇವರ ಆತಂಕಕ್ಕೆ ಕಾರಣ ಫಲವತ್ತಾದ ಭೂಮಿಯನ್ನು ಕೆಐಎಡಿಬಿಯವರು ಸ್ವಾಧೀನಪಡಿಸಿಕೊಳ್ಳಲು ಮುಂದಾಗಿರುವುದು. ಸುಮಾರು 450 ಎಕರೆ ಭೂಮಿಯನ್ನು ಕೆಐಎಡಿಬಿ ಕೈಗಾರಿಕೆ ಸ್ಥಾಪನೆ ಮಾಡಲು ವಶಪಡಿಸಿಕೊಳ್ಳಲು ಮುಂದಾಗಿದೆ. ಈ ಭೂಮಿ ಅತ್ಯಂತ ಫಲವತ್ತಾಗಿದ್ದು ಸಾವಿರಾರು ಜನ ಇಲ್ಲಿ ಭೂಮಿಯನ್ನು ಆಶ್ರಯಿಸಿದ್ದಾರೆ. ಪೇರಲ, ಚಿಕ್ಕು, ಮಾವು, ತೆಂಗು ಬೆಳೆಯನ್ನು ರೈತರು ಬೆಳೆದಿದ್ದು ಕೆಐಎಡಿಬಿ ಭೂಮಿ ಸ್ವಾಧೀನಕ್ಕೆ ಮುಂದಾದರೆ ಪ್ರಾಣವನ್ನಾದರೂ ನೀಡುತ್ತೇವೆಯೇ ಹಾರತು ಭೂಮಿ ನೀಡಲಾರೆವು ಎನ್ನುತ್ತಿದ್ದಾರೆ ಇಲ್ಲಿನ ರೈತರು.

2009ರಲ್ಲಿ ಇಲ್ಲಿಯ ಭೂಮಿ ಸ್ವಾಧೀನಕ್ಕೆ ಮುಂದಾಗಿದ್ದ ಕೆಐಎಡಿಬಿ ನಂತರ ಕಾರಣಾಂತರದಿಂದ ಹಿಂದೆ ಸರಿದಿತ್ತು. ಆದರೀಗ ಮತ್ತೆ ಸ್ವಾಧೀನಪಡಿಸಿಕೊಳ್ಳಲು ಮುಂದಾಗಿದ್ದು ರೈತರಿಗೆ ನೋಟೀಸ್ ನೀಡಿದೆ. ಕೆಐಎಡಿಬಿ ಈ ರೀತಿ ನೋಟಿಸ್ ನೀಡಿರುವುದು ರೈತರ ನಿದ್ದೆಗೆಡಿಸಿದೆ. ಕೆಐಎಡಿಬಿ ಸ್ವಾಧೀನಕ್ಕೆ ಮುಂದಾಗಿರುವ 450 ಎಕರೆ ಭೂಮಿ ಫಲವತ್ತಾಗಿದೆ. ಇದರ ಸಮೀಪದಲ್ಲಿಯೇ ವರದಾ ನದಿ ಹರಿಯುತ್ತಿದ್ದು ರೈತರಿಗೆ ಅನುಕೂಲಕರವಾಗಿ ಪರಿಣಮಿಸಿದೆ.

ಆದರೆ ಇಂತಹ ಫಲವತ್ತಾದ ಭೂಮಿಯಲ್ಲಿ ಕೈಗಾರಿಕೆ ಸ್ಥಾಪನೆಗೆ ಮುಂದಾಗಿರುವುದು ರೈತರ ಆಕ್ರೋಶಕ್ಕೆ ಕಾರಣ. ಕೈಗಾರಿಕೆ ಸ್ಥಾಪನೆ ಮಾಡಲು ಯಾವುದಾದರೂ ಬಂಜರು ಭೂಮಿಯನ್ನು ಆಯ್ದುಕೊಳ್ಳಲಿ, ಬದಲಿಗೆ ನಮ್ಮ ಜಮೀನಿನ ತಂಟೆಗೆ ಬಂದರೆ ನಾವು ಸುಮ್ಮನಿರಲ್ಲ ಎಂದು ರೈತರು ಆಕೋಶ ವ್ಯಕ್ತಪಡಿಸಿದ್ದಾರೆ.

ಇಲ್ಲಿ ಬೆಳೆಯುವ ಪೇರಲ ಹಣ್ಣು ದಾವಣಗೆರೆ ಸೇರಿದಂತೆ ವಿವಿಧ ಜಿಲ್ಲೆಗಳಿಗೆ ರಫ್ತಾಗುತ್ತದೆ. ಕೊಳೂರು ಸಮೀಪದಲ್ಲಿ ಕರ್ಜಗಿ ರೈಲು ನಿಲ್ದಾಣವಿದ್ದು ರೈತರಿಗೆ ತಮ್ಮ ತೋಟಗಾರಿಕಾ ಬೆಳೆಗಳನ್ನು ಸಾಗಿಸಲು ಅನುಕೂಲವಾಗಿದೆ. ಪರಿಣಾಮ ವರ್ಷದಿಂದ ವರ್ಷಕ್ಕೆ ತೋಟಗಾರಿಕೆ ಬೆಳೆಯುವವರ ಸಂಖ್ಯೆ ಅಧಿಕವಾಗುತ್ತಿದೆ. ಈ ವ್ಯಾಪಾರವನ್ನೇ ಅವಲಂಬಿಸಿ ಸಾವಿರಾರು ಕುಟುಂಬಗಳು ಜೀವನ ಕಟ್ಟಿಕೊಂಡಿವೆ.