ಹಾವೇರಿ: ನಗರದ ಗೆಳೆಯರ ಬಳಗ ಪ್ರೌಢಶಾಲೆ ಶನಿವಾರದಂದು ವಿಶಿಷ್ಟ ಆಚರಣೆಗೆ ಸಾಕ್ಷಿಯಾಯಿತು. ಶಾಲಾ ಆಡಳಿತ ಮಂಡಳಿ ಏಕೀಕರಣ ಸಮಿತಿ ಇದೇ ಪ್ರಥಮ ಬಾರಿಗೆ ಶಾಲೆಯಲ್ಲಿ ಜೋಕುಮಾರಸ್ವಾಮಿಯ ಪ್ರಾತ್ಯಕ್ಷಿಕೆ ಏರ್ಪಡಿಸಿತ್ತು.
10 ವಿದ್ಯಾರ್ಥಿನಿಯರ ಒಂದು ತಂಡದಂತೆ ಆರು ತಂಡಗಳು ಜೋಕುಮಾರಸ್ವಾಮಿ ಕುರಿತು ಪ್ರದರ್ಶನ ನೀಡಿದವು. ಜೋಕುಮಾರಸ್ವಾಮಿಯ ಜನನ, ಜೀವನ ಮತ್ತು ಮರಣದ ಕುರಿತಂತೆ ವಿದ್ಯಾರ್ಥಿನಿಯರು ವಿವರಣೆ ನೀಡಿದರು. ಜೋಕುಮಾರಸ್ವಾಮಿಯ ಹಾಡುಗಳು ಪ್ರಾತ್ಯಕ್ಷಿಕೆಗೆ ಮತ್ತಷ್ಟು ಮೆರುಗು ತಂದವು.
ಜೋಕುಮಾರಸ್ವಾಮಿ ಹಬ್ಬ ಆಚರಣೆ
ಉತ್ತರ ಕರ್ನಾಟಕದಲ್ಲಿ ಗಣೇಶ ಚತುರ್ಥಿಯೊಂದಿಗೆ ಹಲವು ಆಚರಣೆಗಳು ಗರಿಗೆದರುತ್ತವೆ. ಅಂತಹ ಆಚರಣೆಗಳಲ್ಲಿ ಒಂದು ಜೋಕುಮಾರಸ್ವಾಮಿಯ ಪೂಜೆ. ಜೋಕುಮಾರಸ್ವಾಮಿ ವಿಶಿಷ್ಟ ಜನನ, ಜೀವನ ಮತ್ತು ಮರಣದ ಮೂಲಕ ಗಮನ ಸೆಳೆಯುತ್ತಾನೆ. ಇವನ ಜೀವನ ಕಟ್ಟಿಕೊಡುವ ಜೋಕುಮಾರಸ್ವಾಮಿಯ ಪ್ರಾತ್ಯಕ್ಷಿಕೆಯ ಸ್ಪರ್ಧೆಯನ್ನು ಗೆಳೆಯರ ಬಳಗ ಪ್ರೌಢಶಾಲೆಯಲ್ಲಿ ಆಯೋಜಿಸಲಾಗಿತ್ತು.