ಇವನು ಸೆಲೆಬ್ರಿಟಿಯಲ್ಲ ಆದರೂ ಈತನ ಅಭಿಮಾನಿಗಳಿಗೇನೂ ಕಮ್ಮಿ ಇಲ್ಲ.. ಅಖಾಡಕ್ಕಿಳಿದರೆ "ಅರ್ಜುನ"

ಉತ್ತರ ಕರ್ನಾಟಕದ ಜಾನಪದ ಸೊಗಡಿನ ಕ್ರೀಡೆ ಎಂದರೆ ದನ ಬೆದರಿಸುವ ಸ್ಪರ್ಧೆ. ಈ ಸ್ಪರ್ಧೆಯಲ್ಲಿ ಪಾಲ್ಗೊಂಡು ಬಹುಮಾನ ಬಾಚುವ ಹೋರಿಗಳು ಇದೀಗ ಅಭಿಮಾನಿಗಳನ್ನು ಗಳಿಸಲಾರಂಭಿಸಿವೆ. ಪ್ರಮುಖ ಹೋರಿಗಳಿಗೆ ಜಿಲ್ಲೆಯಲ್ಲಿ ಸಾವಿರಾರು ಅಭಿಮಾನಿಗಳಿದ್ದಾರೆ.

ಹಾವೇರಿ : ಸೆಲೆಬ್ರಿಟಿಗಳಿಗೆ ಅಭಿಮಾನಿಗಳು ಇರುವುದು ಸಾಮಾನ್ಯ. ಆದರೆ ಜಿಲ್ಲೆಯಲ್ಲಿ ಹೋರಿ ಬೆದರಿಸುವ ಸ್ಪರ್ಧೆಯಲ್ಲಿ ಭಾಗವಹಿಸುವ ಹೋರಿಗಳಿಗೆ ಅಭಿಮಾನಿಗಳಿದ್ದಾರೆ. ನೂರಾರು ಅಭಿಮಾನಿಗಳನ್ನು ಗಳಿಸಿರುವ ಹೋರಿಗಳು ಜಿಲ್ಲೆಯಲ್ಲಿವೆ. ಅಂತಹ ಅಭಿಮಾನಿಯೊಬ್ಬ ತನ್ನ ನೆಚ್ಚಿನ ಹೋರಿಯ ಚಿತ್ರವನ್ನ ಗೋಡೆ ಮೇಲೆ ತೆಗೆಯುವ ಮೂಲಕ ಅಭಿಮಾನ ಮೆರೆದಿದ್ದಾನೆ. ಅರ್ಜುನ್ 155 ಹೆಸರಿರುವ ಎತ್ತಿನ ಚಿತ್ರ ಬರೆದಿದ್ದು ಇದರಿಂದಾಗಿ ನನಗೆ ಹೊಸ ಅವಕಾಶಗಳು ಸಿಕ್ಕಿವೆ ಎನ್ನುತ್ತಾರೆ ಈ ಕಲಾವಿದ ಕಮ್ ಅಭಿಮಾನಿ. ಅರ್ಜುನ್ 155 ಹೆಸರುಗಳನ್ನು ಅಭಿಮಾನಿಗಳು ಹಚ್ಚೆ ಹಾಕಿಸಿಕೊಳ್ಳುವ ಮೂಲಕ ಅಭಿಮಾನ ವ್ಯಕ್ತಪಡಿಸಿದ್ದಾರೆ.

ಉತ್ತರ ಕರ್ನಾಟಕದ ಜಾನಪದ ಸೊಗಡಿನ ಕ್ರೀಡೆ ಎಂದರೆ ದನ ಬೆದರಿಸುವ ಸ್ಪರ್ಧೆ. ಈ ಸ್ಪರ್ಧೆಯಲ್ಲಿ ಪಾಲ್ಗೊಂಡು ಬಹುಮಾನ ಬಾಚುವ ಹೋರಿಗಳು ಇದೀಗ ಅಭಿಮಾನಿಗಳನ್ನು ಗಳಿಸಲಾರಂಭಿಸಿವೆ. ಪ್ರಮುಖ ಹೋರಿಗಳಿಗೆ ಜಿಲ್ಲೆಯಲ್ಲಿ ಸಾವಿರಾರು ಅಭಿಮಾನಿಗಳಿದ್ದಾರೆ. ಅಂತಹ ಹೋರಿಗಳಲ್ಲಿ ಒಂದಾಗಿರುವ ಅರ್ಜುನ್ 155 ಅಭಿಮಾನಿಯೊಬ್ಬ ಹೋರಿಯ ಚಿತ್ರ ಗೋಡೆ ಮೇಲೆ ಬಿಡಿಸಿದ್ದಾನೆ. ಜಿಲ್ಲೆಯ ಬ್ಯಾಡಗಿ ತಾಲೂಕಿನ ಹೆಡಿಗೊಂಡದ ಕಲಾವಿದ ಫಕಿರೇಶ್ ಈ ಚಿತ್ರ ಬರೆಯುವ ಮೂಲಕ ಅಭಿಮಾನ ವ್ಯಕ್ತಪಡಿಸಿದ್ದಾನೆ. ತಾನು ಅರ್ಜುನ್ 155 ಹೋರಿಯ ಅಭಿಮಾನಿಯಾಗಿದ್ದು, ಅಭಿಮಾನಕ್ಕೋಸ್ಕರ ಚಿತ್ರ ಬಿಡಿಸಿದ್ದೇನೆ. ಈ ಚಿತ್ರ ಬಿಡಿಸಿದ ನಂತರ ತನಗೆ ಇನ್ನೂ ಹೆಚ್ಚಿನ ಅವಕಾಶ ದೊರೆತಿವೆ ಎನ್ನುತ್ತಾನೆ ಫಕಿರೇಶ್.

ತಮಿಳುನಾಡಿನಿಂದ 1 ಲಕ್ಷ 50 ಸಾವಿರ ರೂಪಾಯಿ ನೀಡಿ ಈ ಹೋರಿ ತರಲಾಗಿದೆ. 18 ತಿಂಗಳಿನ ಕರು ತಂದು ದನ ಬೆದರಿಸುವ ಸ್ಪರ್ಧೆಗೆ ತಯಾರು ಮಾಡಲಾಗಿದೆ. ಪ್ರತಿನಿತ್ಯ ಈಜು, ಓಟ ಸೇರಿದಂತೆ ಅರ್ಜುನನಿಗೆ ವಿವಿಧ ತಾಲೀಮುಗಳನ್ನು ನಡೆಸಲಾಗುತ್ತದೆ. ಅಲ್ಲದೇ ವಿಶೇಷವಾದ ಆಹಾರ ಪದಾರ್ಥಗಳಿಂದ ಅರ್ಜುನನ ಸಾಮರ್ಥ್ಯ ಕಾಪಾಡಿಕೊಳ್ಳಲಾಗುತ್ತಿದೆ. ಈ ಹೋರಿ ತಂದಾಗಿನಿಂದ ನಮಗೆ ಇದ್ದ ವೈರಿಗಳೆಲ್ಲಾ ಮಿತ್ರರಾಗಿದ್ದಾರೆ ಎನ್ನುತ್ತಾರೆ ಹೋರಿ ಅಭಿಮಾನಿಗಳು.

ಅರ್ಜುನ್ 155 ಈಗಾಗಲೇ ಹಾವೇರಿ ಸೇರಿದಂತೆ ಶಿವಮೊಗ್ಗ - ದಾವಣಗೆರೆ, ಗದಗ ಮತ್ತು ಧಾರವಾಡ ಜಿಲ್ಲೆಗಳಲ್ಲಿ ತನ್ನದೇ ಆದ ಛಾಪು ಮೂಡಿಸಿದೆ. ಭಾಗವಹಿಸಿದ ನಾಲ್ಕು ಸ್ಪರ್ಧೆಗಳಲ್ಲಿ ಬಹುಮಾನಗಳನ್ನ ಮುಡಿಗೇರಿಸಿಕೊಂಡಿದೆ. ದನ ಬೆದರಿಸುವ ಸ್ಪರ್ಧೆಯಲ್ಲಿರುವ ಸಾವಿರಾರು ಫೈಲ್ವಾನರಿಗೆ ಸಿಂಹಸ್ವಪ್ನವಾಗಿರುವ ಅರ್ಜುನ ಅಖಾಡ ಬಿಟ್ಟರೆ ಮಾತ್ರ ಮೃದು ಸ್ವಭಾವಿ. ಈತನ ಈ ಮೃದು ಸ್ವಭಾವ ಅಖಾಡಕ್ಕಿಳಿಯುತ್ತಿದ್ದಂತೆ ಎದುರಾಳಿಗಳ ಎದೆ ನಡುಗಿಸುವ ಓಟ ಅರ್ಜುನ್ ಅಭಿಮಾನಿಗಳ ಸಂಖ್ಯೆ ಹೆಚ್ಚು ಮಾಡಿದೆ.