ಹಾವೇರಿ:ಪೊಲೀಸರೆಂದರೆ ಸಾಕು ಕಣ್ಮುಂದೆ ಬರುವ ಚಿತ್ರಣ ದಪ್ಪನೆ ಮೀಸೆ, ಕೈಯಲ್ಲಿ ಲಾಠಿ ಸದಾ ಗಂಭೀರವಾಗಿರುವ ಮುಖ. ಆದರೆ, ಹಾವೇರಿ ಸಶಸ್ತ್ರ ಮೀಸಲು ಪಡೆಯಲ್ಲಿ ಇರುವ ಈ ಕಾನ್ಸ್ಟೇಬಲ್ ಚಿತ್ರಣವೇ ಬೇರೆ. ಕಾನ್ಸ್ಟೇಬಲ್ ರಮೇಶ್ ಎಂಬುವವರು ಸ್ನೇಕ್ ರಮೇಶ್ ಎಂದೇ ಖ್ಯಾತಿಗಳಿಸಿದ್ದಾರೆ. ಸುಮಾರು 23 ವರ್ಷಗಳಿಂದ ಪೊಲೀಸ್ ಇಲಾಖೆಗೆ ಸೇರಿದ ಇವರು, ಕಳೆದ 20 ವರ್ಷಗಳಿಂದ ಉರಗಗಳ ರಕ್ಷಣೆಗೆ ನಿಂತಿದ್ದಾರೆ.
ಹಾವೇರಿ ಸೇರಿದಂತೆ ಸುತ್ತ - ಮುತ್ತಲಿನ ಪ್ರದೇಶಗಳಲ್ಲಿ ಹಾವುಗಳನ್ನು ಹಿಡಿದು ರಕ್ಷಣೆ ಮಾಡುತ್ತಿದ್ದಾರೆ. ಯಾರ ಮನೆಗಾದರೂ ಹಾವು ಬಂದರೆ ಸಾಕು ಮೊದಲ ಕರೆ ಹೋಗುವುದು ರಮೇಶ್ ಅವರಿಗೆ. ಹಾವುಗಳನ್ನು ರಕ್ಷಿಸಿ ನಂತರ ಅರಣ್ಯ ಪ್ರದೇಶಕ್ಕೆ ಬಿಟ್ಟು ಬರುತ್ತಾರೆ. ಈವರೆಗೆ ರಮೇಶ್ 7,600 ಕ್ಕೂ ಅಧಿಕ ಹಾವುಗಳನ್ನು ರಕ್ಷಿಸಿ ಕಾಡಿಗೆ ಬಿಟ್ಟು ಬಂದಿದ್ದಾರೆ.
ಹಾವುಗಳನ್ನು ರಕ್ಷಣೆ ಮಾಡುತ್ತಿರುವ ಪೊಲೀಸ್ ಕಾನ್ಸ್ಟೇಬಲ್ ನಾಗರ ಹಾವು, ನೀರಾವು, ಕೊಳಕಮಂಡಲ, ಆಭರಣ ಹಾವು ಸೇರಿದಂತೆ ವಿವಿಧ ತರದ ಹಾವುಗಳನ್ನು ರಕ್ಷಿಸಿದ್ದಾರೆ. ಅಲ್ಲದೇ, ಗಾಯಗೊಂಡ ಹಾವುಗಳನ್ನು ರಮೇಶ್ ಮನೆಯಲ್ಲಿ ರಕ್ಷಿಸಿ ಅವುಗಳಿಗೆ ಔಷಧೋಪಚಾರ ಸಹ ಮಾಡುತ್ತಾರೆ. ಕಳೆದ ತಿಂಗಳು ಸ್ಥಳೀಯರಿಂದ ಹೊಡೆಸಿಕೊಂಡು ಆನಾರೋಗ್ಯದಿಂದ ಬಳಲುತ್ತಿದ್ದ ನಾಗರ ಹಾವನ್ನ ಇವರು ರಕ್ಷಣೆ ಮಾಡಿದ್ದಾರೆ.
ರಮೇಶ್‌ಗೆ ಪೋಷಕರ ಜತೆ ಏಡಿ, ಮೀನು ಹಿಡಿಯುವ ಹುಚ್ಚು ಬಾಲ್ಯದಲ್ಲಿ ಅಂಟಿಕೊಂಡಿತ್ತಂತೆ. ಅಂದಿನಿಂದ ಹಾವುಗಳನ್ನು ಕಂಡರೂ ಸಹ ಹೆದರದ ರಮೇಶ ಅವುಗಳನ್ನು ಹಿಡಿಯುವುದರಲ್ಲಿ ಪಳಗಿದ್ದಾರೆ. ನಂತರ ಪೊಲೀಸ್ ಇಲಾಖೆಯಲ್ಲಿ ಅವರ ಚಾಕಚಕತ್ಯೆ ಕಂಡ ಹಿರಿಯ ಅಧಿಕಾರಿಗಳು ಮೈಸೂರಿನ ಸ್ನೇಕ್ ಶ್ಯಾಮ ಅವರ ಬಳಿ ತರಬೇತಿಗೆ ಕಳಿಸಿದ್ದಾರೆ. ಅಲ್ಲಿಂದ ತರಬೇತಿ ಪಡೆದು ಬಂದ ರಮೇಶ್ ಹಿಂತಿರುಗಿ ನೋಡಿಲ್ಲ.
ಶಾಲಾ ಮಕ್ಕಳಲ್ಲಿ ಜಾಗೃತಿ: ಉರಗಳನ್ನು ಹಿಡಿದು ಕಾಡಿಗೆ ಬಿಡುವುದಷ್ಟೇ ಅಲ್ಲದೆ ರಮೇಶ್ ಹಾವುಗಳ ಕುರಿತಂತೆ ಶಾಲಾ ಮಕ್ಕಳಲ್ಲಿ ಜಾಗೃತಿ ಮೂಡಿಸುತ್ತಾರೆ. ಜೀವಸಂಕುಲದಲ್ಲಿ ಉರಗಳು ಪಾತ್ರ ಏನು?, ಎನ್ನುವ ಕುರಿತಂತೆ ಪಾಠ ಮಾಡುತ್ತಾರೆ. ಅಲ್ಲದೇ, ಹಾವುಗಳು ಕಾಣಿಸಿಕೊಂಡರೆ, ಏನು ಮಾಡಬೇಕು?, ಅದರಿಂದ ಕಚ್ಚಿಸಿಕೊಂಡರೆ ಯಾವ ರೀತಿ ಚಿಕಿತ್ಸೆ ಪಡೆಯಬೇಕು ಎಂಬುವುದರ ಕುರಿತು ಮಾಹಿತಿ ನೀಡುತ್ತಾರೆ. ಜತೆಗೆ ಹಾವುಗಳ ಕುರಿತಂತೆ ಇರುವ ತಪ್ಪುಕಲ್ಪನೆಗಳನ್ನು ರಮೇಶ ತೊಡೆದು ಹಾಕುತ್ತಾರೆ. ರಮೇಶ್ ಅವರ ಈ ಕಾರ್ಯಕ್ಕೆ ಇಲಾಖೆಯ ಹಿರಿಯ ಅಧಿಕಾರಿಗಳು ಸಹ ಸಾಥ್ ನೀಡುತ್ತಿದ್ದಾರೆ.
ಇದನ್ನೂ ಓದಿ:60ರ ಹರೆಯದಲ್ಲೂ ಸೈಕಲ್‌ನಲ್ಲೇ ಓಡಾಡುವ ಮಹಿಳೆ
