ಅತೃಪ್ತರನ್ನ ಅನರ್ಹ ಮಾಡಿರೋದು ಸಂವಿಧಾನ ಹೊರತು ನಾನಲ್ಲ.. ಮಾಜಿ ಸ್ಪೀಕರ್‌ ರಮೇಶ್‌ಕುಮಾರ್​

ರಾಜ್ಯದಲ್ಲಿ ಅನರ್ಹರಾದ 17 ಶಾಸಕರನ್ನು ಮತ್ತೆ ವಿಧಾನಸೌಧದ ಬಾಗಿಲಿಗೆ ಕಾಲಿಡದಂತೆ ಅವರನ್ನು ಜನರು ತಿರಸ್ಕಾರ ಮಾಡಬೇಕು ಎಂದು ಮಾಜಿ ಸ್ಪೀಕರ್‌ ಕೆ.ಆರ್‌ ರಮೇಶ್‌ಕುಮಾರ್‌ ಕರೆ ನೀಡಿದರು.

ರಾಣೆಬೆನ್ನೂರು:ಸಂವಿಧಾನವನ್ನು ಗಮನದಲ್ಲಿಟ್ಟುಕೊಂಡು 17 ಶಾಸಕರನ್ನು ಅನರ್ಹ ಮಾಡಲಾಗಿದೆ ಹೊರತು ನಾನು ಮಾಡಿದ್ದಲ್ಲ ಎಂದು ಮಾಜಿ ಸ್ಪೀಕರ್ ಕೆ ಆರ್ ರಮೇಶ್​ ಕುಮಾರ್​ ಹೇಳಿದರು.

ನಗರದ ಮೃತ್ಯುಂಜಯ ಕಲ್ಯಾಣ ಮಂಟಪದಲ್ಲಿ ಏರ್ಪಡಿಸಿದ್ದ ತಾಲೂಕಾ ಕಾಂಗ್ರೆಸ್ ಕಾರ್ಯಕರ್ತರ ಸಮಾವೇಶ ಹಾಗೂ ಕೆ ಬಿ ಕೋಳಿವಾಡರ ಚುನಾವಣೆ ಪ್ರಚಾರ ಕಾರ್ಯಕ್ರಮದಲ್ಲಿ ಮಾತನಾಡಿದ ಅವರು, ಸಂವಿಧಾನದ ಅಕ್ಷರ ಜ್ಞಾನವಿಲ್ಲದ ಆರ್.ಶಂಕರ್​ ಎಂಬ ವ್ಯಕ್ತಿಯನ್ನು ರಾಣೆಬೆನ್ನೂರು ಕ್ಷೇತ್ರದಿಂದ ಹೇಗೆ ಆಯ್ಕೆ ಮಾಡಿ ಕಳುಹಿಸಿದ್ದೀರಿ ಎಂಬುದು ನನಗೆ ಗೊತ್ತಿಲ್ಲ. ರಾಜ್ಯದಲ್ಲಿ ಅನರ್ಹರಾದ 17 ಶಾಸಕರನ್ನು ಮತ್ತೆ ವಿಧಾನಸೌಧದ ಬಾಗಿಲಿಗೆ ಕಾಲಿಡದಂತೆ ಅವರನ್ನು ಜನರು ತಿರಸ್ಕಾರ ಮಾಡಬೇಕು ಎಂದರು.

ಈ ಕ್ಷೇತ್ರದ ಕೆಪಿಜೆಪಿ ಪಕ್ಷದಿಂದ ಆಯ್ಕೆಯಾದ ಆರ್.ಶಂಕರ ಕಾಂಗ್ರೆಸ್ ಪಕ್ಷ ಸೇರಿ ನಂತರ ಪಕ್ಷ ವಿರೋಧಿ ಚಟುವಟಿಕೆ ಮಾಡಿದ್ದರು. ಇವರ ಪಕ್ಷ ವಿರೋಧಿ ಚಟುವಟಿಕೆ ಕುರಿತು ಕೆಪಿಸಿಸಿ ಅಧ್ಯಕ್ಷರಾದ ದಿನೇಶ್​ ಗುಂಡೂರಾವ್ ನನಗೆ ದೂರ ನೀಡಿದ್ದರು.ಈ ದೂರಿನ ಅನ್ವಯ ಆರ್.ಶಂಕರ್ ಅವರನ್ನು ಅನರ್ಹ ಮಾಡಲಾಗಿತ್ತು. ಸುಪ್ರೀಂಕೋರ್ಟ್ ಕೂಡ ಅವರನ್ನು ಜೀವನದಲ್ಲಿ ಅನರ್ಹರರಾಗಿ ಉಳಿಯುವಂತೆ ಮಾಡಿದೆ ಎಂದರು.