ಹಾಸನದಲ್ಲಿ ಉಚಿತ ಲ್ಯಾಪ್‌ ಟಾಪ್​ ವಿತರಣೆ ವೇಳೆ ನೂಕು ನುಗ್ಗಲು

ಸರ್ಕಾರದಿಂದ ನೀಡಲಾಗುವ ಉಚಿತ ಲ್ಯಾಪ್‌ಟಾಪ್​ ಪಡೆಯಲು ಬಂದ ವಿದ್ಯಾರ್ಥಿಗಳು ನಾ ಮುಂದು ತಾ ಮುಂದು ಎಂದು ನುಗ್ಗಿದ ಪರಿಣಾಮ, ನೂಕು ನುಗ್ಗಲು ಉಂಟಾಯಿತು.

ಹಾಸನ:ನಗರದ ಸರ್ಕಾರಿ ಕಲಾ ಕಾಲೇಜಿನಲ್ಲಿ ಉಚಿತ ಲ್ಯಾಪ್​ ಟಾಪ್​ ಹಂಚಿಕೆ ವೇಳೆ ಸಾಮಾಜಿಕ ಅಂತರ ಮರೆತು ವಿದ್ಯಾರ್ಥಿಗಳು ಮುನ್ನುಗ್ಗಿದ ಘಟನೆ ನಡೆಯಿತು.

ಲ್ಯಾಪ್ ಟಾಪ್​ ವಿತರಕರು ಸರಿಯಾದ ವ್ಯವಸ್ಥೆ ಮಾಡದಿರುವುದೇ ನೂಕು ನುಗ್ಗಲಿಗೆ ಕಾರಣವಾಗಿತ್ತು. ಈ ವಿಷಯ ತಿಳಿದು ಸ್ಥಳಕ್ಕೆ ಆಗಮಿಸಿದ ಪೊಲೀಸರು ಸೂಕ್ತ ಕ್ರಮ ಕೈಗೊಳ್ಳದೆ ಲ್ಯಾಪ್​ ಟಾಪ್​ ವಿತರಿಸದಂತೆ ಸೂಚಿಸಿ ವಿದ್ಯಾರ್ಥಿಗಳನ್ನು ಮನೆಗೆ ಕಳುಹಿಸಿದರು.

ಸರ್ಕಾರ ಮುಂದಿನ ತಿಂಗಳಿನಿಂದ ಪದವಿ ಕಾಲೇಜುಗಳ ತರಗತಿ ಆರಂಭಿಸಲು ಯೋಚಿಸಿದೆ. ಆದರೆ, ಲ್ಯಾಪ್​ ಟಾಪ್​ ವಿತರಣೆಯಂತಹ ಸಣ್ಣ ಕಾರ್ಯಕ್ರಮದಲ್ಲೇ ಈ ರೀತಿ ಬೇಜವ್ದಾರಿತನ ತೋರಿಸಿದರೆ, ಇನ್ನು ತರಗತಿಗಳು ಪ್ರಾರಂಭವಾದರೆ ಹೇಗೆ ಎಂದು ಸಾರ್ವಜನಿಕರು ಹೇಳುತ್ತಿದ್ದಾರೆ.