ಹಾಸನದಲ್ಲಿ ಹಠಾತ್​ ಮಳೆ:ಬಿಸಿಲು ಮಳೆಗೆ ತಂಪಾದ ಇಳೆ

ಹಾಸನದಲ್ಲಿ ಇಂದು ಕೆಲಕಾಲ ಮಳೆ ಸುರಿದಿದ್ದು,ಗ್ರಾಮೀಣ ಭಾಗದ ಬೆಳೆಗಳಿಗೆ ವರದಾನವಾಗಿದೆ. ಹಾಸನ ಹೊರತುಪಡಿಸಿ ಜಿಲ್ಲೆಯ ಬೇರೆ ಯಾವ ತಾಲೂಕಿನಲ್ಲೂ ಮಳೆಯಾಗಿಲ್ಲ ಎಂದು ತಿಳಿದು ಬಂದಿದೆ.

ಹಾಸನ: ಹಾಸನದಲ್ಲಿ ಮುಂಜಾನೆಯಿಂದಲೇ ನೆತ್ತಿಯ ಮೇಲೆ ರಣರಣ ಬಿಸಿಲು ತಾಂಡವವಾಡುತ್ತಿತ್ತು.ಆದರೆ ಬಿಸಿಲಿನ ನಡುವೆ ಹಠಾತನೆ ಸುರಿದ ಮಳೆ ಇಳೆಯನ್ನ ತಂಪಾಗಿಸಿದೆ.

ಮಳೆಯ ಜೊತೆಗೆ ಸ್ವಲ್ಪ ಬಿರುಗಾಳಿ ಬಂದಿದ್ದರಿಂದ ಸ್ವಲ್ಪ ಹೊತ್ತು ಮಳೆ ಜೋರಾಗಿ ಸುರಿಯಿತು. ಕೆಲ ದಿನಗಳಿಂದ ಕಣ್ಮರೆಯಾಗಿದ್ದ ಮಳೆರಾಯ ಇಂದು ದಿಢೀರ್​ ಎಂಟ್ರಿ ಕೊಟ್ಟಿದ್ದು, ರಾಗಿ ಭತ್ತ ಮತ್ತು ದ್ವಿದಳ ಧಾನ್ಯಗಳಿಗೆ ಉತ್ತಮವಾದಂತಾಗಿದೆ. ಹೀಗಾಗಿ ರೈತರು ಸ್ವಲ್ಪ ಖುಷಿಯಾಗಿದ್ದಾರೆ. ಹಾಸನ ಹೊರತುಪಡಿಸಿ ಬೇರೆ ಯಾವ ತಾಲೂಕುಗಳಲ್ಲಿ ಕೂಡ ಮಳೆ ಬಂದಿಲ್ಲ.ಆದರೆ ಹಾಸನದಲ್ಲಿ ದಿಢೀರನೆ ಮಳೆ ಬಂದಿದ್ದರಿಂದ ಕೆಲಕಾಲ ಸಾರ್ವಜನಿಕರು ,ವಾಹನ ಸವಾರರು ಪರದಾಡುವಂತಾಯ್ತು.ಇನ್ನೂ ಅಕ್ಟೋಬರ್​ 4 ರ ತನಕ ಸುರಿದ ಹಾಸನ ಜಿಲ್ಲೆಯಲ್ಲಿನ ಮಳೆಯ ವರದಿಯನ್ನು ನೋಡುವುದಾದರೆ, ಹಾಸನ ತಾಲೂಕಿನ ಸಾಲಗಾಮೆ 2.2 ಮಿಮೀ. ಮಳೆಯಾಗಿದೆ. ಸಕಲೇಶಪುರ ತಾಲೂಕಿನ ಮಾರನಹಳ್ಳಿಯಲ್ಲಿ 7.2 ಮಿ.ಮೀ., ಹೆತ್ತೂರು 3.6 ಮಿ.ಮೀ, ಸಕಲೇಶಪುರ 0.2 ಮಿ.ಮೀ., ಹಾನುಬಾಳು 1 ಮಿ.ಮೀ.ಮಳೆಯಾಗಿದೆ. ಅರಸೀಕೆರೆ ತಾಲೂಕಿನ ಗಂಡಸಿ 1ಮಿ.ಮೀ., ಜಾವಗಲ್ 9 ಮಿ.ಮೀ. ಮಳೆಯಾಗಿದೆ. ಚನ್ನರಾಯಪಟ್ಟಣ ತಾಲೂಕಿನ ಕಸಬಾ 0.2 ಮಿ.ಮೀ., ನುಗ್ಗೆಹಳ್ಳಿ 2.2 ಮಿ.ಮೀ., ಮಳೆಯಾಗಿದೆ. ಬೇಲೂರು ತಾಲೂಕಿನ ಹಳೇಬೀಡು 5.6 ಮಿ.ಮೀ. ಮಳೆಯಾಗಿದೆ.