ಡೈರಿ ಡೇ ನೌಕರರಿಂದ ಖಾಸಗಿ ಹೋಟೆಲ್​​ ಪುಡಿಪುಡಿ: ಮುರಿದ ಮಾಲೀಕನ ಕಾಲು

ದುಷ್ಕರ್ಮಿಗಳ ಅಟ್ಟಹಾಸ ಕ್ಕೆ ಪೀಸ್ ಪೀಸ್ ಆಗಿರುವ ಕಿಟಕಿ ಗಾಜುಗಳು, ಕಬ್ಬಿಣದ ರಾಡಿನಿಂದ ರಕ್ತಸಿಕ್ತ ಹಲ್ಲೆ ಮಾಡಿರೋದಕ್ಕೆ ಸಾಕ್ಷಿಯಾಗಿವೆ ರಕ್ತದ ಕಲೆಗಳು, ಮುರಿದ ಮಾಲೀಕನ ಕಾಲು. ಆ ದುಷ್ಕರ್ಮಿಗಳ ಅಟ್ಟಹಾಸಕ್ಕೆ ಪುಡಿಪುಡಿಯಾಗಿದೆ ಹೋಟೆಲ್. ಹಾಗಿದ್ರೆ ಇಂತಹದೊಂದು ಘಟನೆ ನಡೆದಿದ್ದಾದರೂ ಎಲ್ಲಿ? ಏನಿದು ಘಟನೆ ಅಂತೀರಾ. ಇಲ್ಲಿದೆ ನೋಡಿ ಅದರ ಕಂಪ್ಲೀಟ್ ಸ್ಟೋರಿ...

ಹಾಸನ: ನಗರದ ಹೊರವಲಯದಲ್ಲಿರುವ ಬೃಂದಾವನ ಹೋಟೆಲ್​ನ ಮಾಲೀಕರಾದ ರಂಗಸ್ವಾಮಿ ಎಂಬುವವರು ಡೈರಿ ಡೇ ಕಂಪನಿಯಿಂದ ಐಸ್​​ ಕ್ರೀಂ ಮಾರಾಟಕ್ಕಾಗಿ ಒಂದು ರೆಫ್ರಿಜರೇಟರ್ ಜೊತೆಗೆ ಐಸ್ ಕ್ರೀಮ್ ಉತ್ಪನ್ನಗಳನ್ನ ತೆಗೆದುಕೊಂಡಿದ್ದರು. ಬಳಿಕ ಹೆಚ್ಚು ವ್ಯಾಪಾರವಾಗದ ಹಿನ್ನೆಲೆ ಇದನ್ನು ವಾಪಸ್​ ತೆಗೆದುಕೊಂಡು ಹೋಗುವಂತೆ ಕಂಪನಿ ಮೇಲ್ವಿಚಾರಕ ಚೇತನ್​ ಅವರಿಗೆ ಹೇಳಿದ್ದಾರೆ. ಇದರಿಂದ ಕೋಪಗೊಂಡ ಚೇತನ್​​ ಏಕಾಏಕಿ ಸುಮಾರು 20 ವ್ಯಕ್ತಿಗಳೊಂದಿಗೆ ಬಂದು ಹೋಟೆಲ್​ ಧ್ವಂಸಗೊಳಿಸಿದ್ದಾರೆ.

ರೆಫ್ರಿಜರೇಟರ್ ವಾಪಸ್​ ತೆಗೆದುಕೊಂಡು ಹೋಗುವಂತೆ ರಂಗಸ್ವಾಮಿ ಹೇಳಿದ ಬಳಿಕ ಚೇತನ್ ಎಂಬಾತ ಅವರಿಗೆ ಕರೆ ಮಾಡಿ, ಎಲ್ಲಿದ್ದೀಯಾ ನಾನು ನಿಮ್ಮ ಹೋಟೆಲ್​ಗೆ ತೆಗೆದುಕೊಂಡು ಹೋಗಲು ಬರುತ್ತಿದ್ದೇನೆ ಎಂದಿದ್ದಾನೆ. ನಂತರ ಮಾಲೀಕ ಬನ್ನಿ ನಾನು ಮನೆಯಲ್ಲಿ ಇದ್ದೇನೆ ಅಂದಿದ್ದಾರೆ. ಇದಾದ ಬಳಿಕ 15 ನಿಮಿಷದ ನಂತರ ಹೋಟೆಲ್ ಮೇಲೆ ಏಕಾಏಕಿ ದಾಳಿ ನಡೆಸಿ, ಸಿಸಿಟಿವಿ ಸೇರಿದಂತೆ ಹೋಟೆಲ್​ನ ಕಿಟಕಿ ಗಾಜು ಹಾಗೂ ಕೇಬಲ್​​ಗಳನ್ನು ಮಾರಕಾಸ್ತ್ರಗಳಿಂದ ಧ್ವಂಸಗೊಳಿಸಿದ್ದಾರೆ. ಈ ಎಲ್ಲಾ ಘಟನೆ ಸಿಸಿಟಿವಿಯಲ್ಲಿ ಸೆರೆಯಾಗಿರುವುದನ್ನು ಮನಗಂಡ ಅವರು ಸಿಸಿಟಿವಿಯನ್ನು ಕೂಡ ಕದ್ದೊಯ್ದಿದ್ದಾರೆ. ಹೋಟೆಲ್​ನ ಮೂವರು ಸಿಬ್ಬಂದಿ ಮೇಲೆ ಹಲ್ಲೆ ಮಾಡಿದ್ದು, ಗಂಭೀರವಾಗಿ ಗಾಯಗೊಂಡ ಮಹಿಳೆಯೊಬ್ಬರನ್ನು ಹಾಸನದ ಸರ್ಕಾರಿ ಆಸ್ಪತ್ರೆಗೆ ದಾಖಲು ಮಾಡಿದ್ದಾರೆ.

5 ಲಕ್ಷಕ್ಕೂ ಅಧಿಕ ಮೌಲ್ಯದ ವಸ್ತುಗಳು ನಾಶ:

ಮಾಲೀಕರು ಹೇಳುವ ಪ್ರಕಾರ ಈ ಘಟನೆಯಿಂದ ಸುಮಾರು 5ರಿಂದ 6 ಲಕ್ಷ ಮೌಲ್ಯದ ವಸ್ತುಗಳು ನಾಶವಾಗಿವೆ. ಅಲ್ಲದೇ ಅಲ್ಲಿಂದ ಹಣವನ್ನು ಕೂಡ ತೆಗೆದುಕೊಂಡು ಹೋಗಿದ್ದಾರೆ. ಈ ಘಟನೆಯಿಂದ ನಮ್ಮ ಹೋಟೆಲ್ ವ್ಯಾಪಾರ ಕೂಡ ಇನ್ನು ಮುಂದೆ ನಷ್ಟವನ್ನು ಅನುಭವಿಸುತ್ತದೆ, ದಯಮಾಡಿ ನಮಗೆ ನ್ಯಾಯ ದೊರಕಿಸಿಕೊಡಬೇಕು ಎಂದು ಮಾಲೀಕರು ಮನವಿ ಮಾಡಿಕೊಂಡಿದ್ದಾರೆ.

ಈ ಸಂಬಂಧ ಹಾಸನ ಬಡಾವಣೆ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಾಗಿದೆ. ಸ್ಥಳಕ್ಕೆ ಬಂದ ಪೊಲೀಸರು ಕೆಲವು ಮಾರಕಾಸ್ತ್ರಗಳನ್ನು ವಶಪಡಿಸಿಕೊಂಡಿದ್ದಾರೆ. ಆದರೆ ಕೃತ್ಯ ನಡೆದ ಘಟನಾವಳಿ ಸೆರೆಯಾಗಿದ್ದ ಸಿಸಿಟಿವಿಯನ್ನು ದುಷ್ಕರ್ಮಿಗಳೇ ಹೊತ್ತೊಯ್ದ ಹಿನ್ನೆಲೆ ಈಗ ಆರೋಪಿಗಳಿಗಾಗಿ ಪೊಲೀಸರು ಬಲೆ ಬೀಸಿದ್ದಾರೆ.