ಒಲ್ಲದ ಮನಸ್ಸಿನಿಂದ ಕನಸಿನ ಮನೆಯ ಸ್ಥಳಾಂತರಕ್ಕೆ ಮುಂದಾದ ಕುಟುಂಬ!

ರಾಷ್ಟ್ರೀಯ ಹೆದ್ದಾರಿ ಅಗಲೀಕರಣಕ್ಕೆ ಮನೆ ಬಿಟ್ಟುಕೊಡಲು ಒಲ್ಲದ ಮನಸ್ಸಿನಿಂದಲೇ ಸಕಲೇಶಪುರದ ಕುಟುಂಬವೊಂದು ಇಡೀ ಮನೆಯನ್ನೇ ಬೇರೆಡೆಗೆ ಸ್ಥಳಾಂತರಿಸುವ ಸಾಹಸಕ್ಕೆ ಮುಂದಾಗಿದ್ದು, ಮನೆ ಸ್ಥಳಾಂತರ ಕಾರ್ಯ ಬಹುತೇಕ ಪೂರ್ಣಗೊಂಡಿದೆ.

ಹಾಸನ:ಒಂದೂರಿಂದ ಮತ್ತೊಂದೂರಿಗೆ ವರ್ಗಾವಣೆ ಆದರೆ ನಾವು ಮನೆ ಬದಲಾಯಿಸುತ್ತೇವೆ. ಈ ವೇಳೆ ಮನೆಯಲ್ಲಿರುವ ವಸ್ತುಗಳನ್ನು ಮಾತ್ರ ಅಲ್ಲಿಂದ ಕೊಂಡೊಯ್ಯುತ್ತೇವೆ. ಆದರೆ ಈ ಕುಟುಂಬ ಮಾತ್ರ ಮನೆಯಲ್ಲಿರುವ ವಸ್ತುಗಳೊಂದಿಗೆ ಇಡೀ ಮನೆಯನ್ನೇ ಮತ್ತೊಂದೆಡೆಗೆ ಸಾಗಿಸಲು ಮುಂದಾಗಿದೆ.

ಜಿಲ್ಲೆಯ ಸಕಲೇಶಪುರ ತಾಲೂಕಿನ ಬಾಳ್ಳುಪೇಟೆ ಗ್ರಾಮದ ಸುರೇಶ್ ಎಂಬುವರು 2004ರಲ್ಲಿ ಹೊಸ ಮನೆ ಕಟ್ಟಿದ್ದರು. ಈ ಮನೆ ಕಟ್ಟಿ ಸುಮಾರು 16 ವರ್ಷಗಳು ಕಳೆದಿವೆ. ಈ ಅವಧಿಯಲ್ಲಿ ಈ ಮನೆಯಿಂದ ಸುರೇಶ್​ ಕುಟುಂಬಕ್ಕೆ ಆದ ಲಾಭ ಅಷ್ಟಿಷ್ಟಲ್ಲ. ಮನೆಯಲ್ಲಿ ಮೂರ್ನಾಲ್ಕು ಮದುವೆ ಶುಭ ಸಮಾರಂಭಗಳು ನಡೆದಿವೆ. ಅಷ್ಟೇ ಅಲ್ಲದೆ ಮನೆಯಲ್ಲಿ ಒಟ್ಟು ಐದು ಕೊಠಡಿಗಳಿದ್ದು, ಒಂದೊಂದು ಕೊಠಡಿಗಳಲ್ಲಿ ಕುಟುಂಬದ ಒಬ್ಬೊಬ್ಬರ ಹತ್ತಾರು ಕನಸುಗಳಿವೆ. ಹಾಗಾಗಿ ಈ ಮನೆ ಎಂದರೆ ಕುಟುಂಬದ ಎಲ್ಲರಿಗೂ ಅಚ್ಚುಮೆಚ್ಚು.

ಇಂತಹ ಮನೆ ರಾಷ್ಟ್ರೀಯ ಹೆದ್ದಾರಿ ಅಗಲೀಕರಣಗೊಳ್ಳುತ್ತಿರುವುದರಿಂದ ನೆಲಸಮಗೊಳಿಸಲು ಹೆದ್ದಾರಿ ಇಲಾಖೆ ಮುಂದಾಗಿದೆ. ಈ ವೇಳೆ ನೋವಿನಿಂದಲೇ ಮನೆಯನ್ನು ಬಿಟ್ಟು ಕೊಟ್ಟ ಸುರೇಶ್ ಕುಟುಂಬ, ಪರ್ಯಾಯವಾಗಿ ಪರಿಹಾರ ಪಡೆಯುತ್ತದೆ. ಹೀಗೆ ಮನೆ ಬಿಟ್ಟು ಕೊಟ್ಟು ಪರಿಹಾರ ಪಡೆದರೂ ಸುರೇಶ್​​ ಕುಟುಂಬಕ್ಕೆ ಆ ಮನೆಯನ್ನು ಕಳೆದುಕೊಳ್ಳಲು ಇಷ್ಟವಿಲ್ಲರಲಿಲ್ಲ. ಹೀಗಾಗಿ ಎಲ್ಲೋ ಓದಿದ ಮತ್ತು ಮಾಧ್ಯಮಗಳಲ್ಲಿ ನೋಡಿದ ಸುದ್ದಿ ನೆನಪಿಗೆ ಬಂದು ಇಡೀ ಮನೆಯನ್ನು ಬೇರೆಡೆಗೆ ಸ್ಥಳಾಂತರಿಸುವ ಟಿಡಿಬಿಟಿ ಕಂಪನಿಯನ್ನು ಸಂಪರ್ಕಿಸುತ್ತಾರೆ. ಕಂಪನಿಯವರು ಸುರೇಶ್​ ಕುಟುಂಬದೊಂದಿಗೆ ಕಳೆದ ಜನವರಿ ತಿಂಗಳಲ್ಲಿ ಒಪ್ಪಂದ ಮಾಡಿಕೊಂಡು ಮನೆ ಸ್ಥಳಾಂತರ ಕಾರ್ಯ ನಡೆದಿದೆ.

ಸದ್ಯ ಮನೆ ಇದ್ದ ಸ್ಥಳದಿಂದ ಸುಮಾರು 120 ಅಡಿ ದೂರ ಸ್ಥಳಾಂತರ ಮಾಡಲಾಗಿದ್ದು, ಇನ್ನು ಕೇವಲ ಐದು ಅಡಿ ಬಾಕಿ ಇದೆ. ಕೊರೊನಾ ಲಾಕ್​ಡೌನ್​ನಿಂದಾಗಿ ಸ್ಥಳಾಂತರ ಕಾರ್ಯ ವಿಳಂಬವಾಗಿದ್ದು, ಇನ್ನೊಂದು ತಿಂಗಳಲ್ಲಿ ಸಂಪೂರ್ಣವಾಗಿ ಮನೆ ಸ್ಥಳಾಂತರವಾಗಲಿದೆ. ಮನೆ ಸ್ಥಳಾಂತರ ಕಾರ್ಯಕ್ಕೆ ಸುರೇಶ್​ ಕುಟುಂಬ 30 ಲಕ್ಷ ರೂ. ಖರ್ಚು ಮಾಡುತ್ತಿದೆ.

ಮನೆ ಸ್ಥಳಾತರ ಕಾರ್ಯ ಮಾಡುತ್ತಿರುವ ಟಿಡಿಬಿಟಿ ಕಂಪನಿ 2011ರಲ್ಲಿ ಬೆಂಗಳೂರಿನ ದೇವಾಲಯ ಮತ್ತು ಮಂಡ್ಯದಲ್ಲಿ ಒಂದು ಮನೆಯನ್ನು ಸ್ಥಳಾಂತರ ಮಾಡಿ ಯಶಸ್ವಿಯಾಗಿದೆ.