ಸಂಬಳ ಪಡೀತಿರಾ, ಪರಿಸ್ಥಿತಿಯ ಗಂಭೀರತೆ ಬಗ್ಗೆ ಮಾಹಿತಿ ನೀಡಲು ತಿಳಿಯದೇ?: ಅಧಿಕಾರಿಗಳಿಗೆ ಸಚಿವರ ತರಾಟೆ

ಔಷಧಿ, ಬೆಡ್ ಹಾಗು ರೆಮ್​ಡಿಸಿವಿರ್ ಕೊರತೆ ಇದೆ ಎಂದು ಹೇಳೋದಿಕ್ಕೆ ನಿಮಗೆ ನಾಚಿಕೆ ಆಗಲ್ವಾ. ಏನು ಕೆಲಸ ಮಾಡುತ್ತಿದ್ದೀರಾ ನೀವು. ಸರ್ಕಾರ ನಿಮಗೆ ಎಲ್ಲಾ ಸವಲತ್ತುಗಳನ್ನು ಕೊಟ್ಟಿದೆ. ಅದನ್ನು ಉಪಯೋಗಿಸಿಕೊಳ್ಳುವುದಕ್ಕೆ ಬರುತ್ತಿಲ್ಲವಲ್ಲ. ನಿಮ್ಮಿಂದ ಶಾಸಕರು ನಮ್ಮ ಸರ್ಕಾರಕ್ಕೆ ಛೀಮಾರಿ ಹಾಕುತ್ತಿದ್ದಾರೆ ಎಂದು ಜಿಲ್ಲಾ ಉಸ್ತುವಾರಿ ಸಚಿವ ಕೆ. ಗೋಪಾಲಯ್ಯ ಅಧಿಕಾರಿಗಳಿಗೆ ಮಾತಿನ ಮೂಲಕವೇ ಚಾಟಿ ಬೀಸಿದರು.

ಹಾಸನ:ಆರ್​ಟಿ-ಪಿಸಿಆರ್ ಪರೀಕ್ಷೆ ಆದ 4-5 ದಿನದ ಬಳಿಕ ರಿಸಲ್ಟ್ ಬರುತ್ತಿದೆ. ಇದರಿಂದಲೂ ಸೋಂಕು ಹೆಚ್ಚಾಗುತ್ತದೆ. ಕಳೆದ ಒಂದು ತಿಂಗಳಲ್ಲಿ ನಾಲ್ಕು ಸಭೆಗಳನ್ನು ಮಾಡಿದ್ದೇನೆ. ಜಿಲ್ಲೆಯಲ್ಲಿ ಆರೋಗ್ಯ ತುರ್ತು ಪರಿಸ್ಥಿತಿ ಎದುರಾಗಿದೆ. ಇಂತಹ ಗಂಭೀರ ವಿಚಾರವನ್ನು ನನ್ನ ಗಮನಕ್ಕೆ ತರಬೇಕು ಅಂತ ಗೊತ್ತಾಗಿಲ್ಲವೇ?. ತಿಂಗಳಾದರೆ ಸಂಬಳ ತೆಗೆದುಕೊಳ್ಳುವುದಕ್ಕೆ ಗೊತ್ತಾಗುತ್ತೆ ಎಂದು ಆರೋಗ್ಯ ಇಲಾಖೆಯ ಅಧಿಕಾರಿಗಳಿಗೆ ಜಿಲ್ಲಾ ಉಸ್ತುವಾರಿ ಸಚಿವ ಕೆ. ಗೋಪಾಲಯ್ಯ ಗರಂ ಆದರು.

ಹಾಸನದ ಜಿಲ್ಲಾಧಿಕಾರಿ ಸಭಾಂಗಣದಲ್ಲಿ ನಡೆದ ಕೋವಿಡ್ 2ನೇ ಅಲೆಯ ತುರ್ತು ಜಿಲ್ಲಾ ಸಮಿತಿ ಸಭೆಯಲ್ಲಿ ಅಧಿಕಾರಿಗಳಿಂದ ಮಾಹಿತಿ ಪಡೆಯುತ್ತಿದ್ದ ವೇಳೆ ಸಚಿವರು ಅಧಿಕಾರಿಗಳ ಮೇಲೆ ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

ಸರಿಯಾದ ಔಷಧಿ ಸರಬರಾಜಾಗುತ್ತಿಲ್ಲ. ಔಷಧಿಗಳ ಕೊರತೆ, ಬೆಡ್​ಗಳ ಕೊರತೆ, ರೆಮ್​ಡಿಸಿವಿರ್ ಕೊರತೆ ಇದೆ ಎಂದು ಹೇಳೋದಿಕ್ಕೆ ನಿಮಗೆ ನಾಚಿಕೆ ಆಗಲ್ವಾ. ಏನು ಕೆಲಸ ಮಾಡುತ್ತಿದ್ದೀರಾ ನೀವು. ಸರ್ಕಾರ ನಿಮಗೆ ಎಲ್ಲಾ ಸವಲತ್ತುಗಳನ್ನು ಕೊಟ್ಟಿದೆ. ಅದನ್ನು ಉಪಯೋಗಿಸಿಕೊಳ್ಳುವುದಕ್ಕೆ ಬರುತ್ತಿಲ್ಲವಲ್ಲ. ನಿಮ್ಮಿಂದ ಶಾಸಕರು ನಮ್ಮ ಸರ್ಕಾರಕ್ಕೆ ಛೀಮಾರಿ ಹಾಕುತ್ತಿದ್ದಾರೆ ಎಂದು ಕೆಂಡಾಮಂಡಲವಾದರು.

ಇದಕ್ಕೆ ಪ್ರತಿಕ್ರಿಯಿಸಿದ ಹಿಮ್ಸ್ ಅಧಿಕಾರಿ, ನಮಗೆ ಪ್ರತಿನಿತ್ಯ 3000 ಪರೀಕ್ಷೆ ಮಾಡಲು ಅವಕಾಶವಿದ್ದು, ಪರೀಕ್ಷೆ ನಡೆಸಲು ಸಮಸ್ಯೆಯಾಗುತ್ತಿದೆ ಎಂದರು. ಇದಕ್ಕೆ ಪ್ರತಿಕ್ರಿಯೆ ನೀಡಿದ ಅರಸೀಕೆರೆ ಶಾಸಕ ಶಿವಲಿಂಗೇಗೌಡ, ಪರೀಕ್ಷೆ ಮಾಡುವುದು ನಿಮ್ಮ ಜವಾಬ್ದಾರಿ. ಸ್ವಾಬ್​ ಟೆಸ್ಟ್ ಮಾಡಲು ಸಿಬ್ಬಂದಿ ಇಲ್ಲ ಎಂದರೆ ಹೆಚ್ಚುವರಿಯಾಗಿ ತಾತ್ಕಾಲಿಕವಾಗಿ ಸಂಬಂಧಪಟ್ಟ ಸಿಬ್ಬಂದಿಯನ್ನು ಪಡೆದುಕೊಂಡು ಮಾಡಿಸಿ. ಇಲ್ಲ ಎಂದರೆ ನಮ್ಮ ಜಿಲ್ಲೆ ಸ್ಮಶಾನ ಆಗುತ್ತದೆ ಎಂದು ಗುಡುಗಿದರು.

ರೆಮ್ಡಿಸಿವಿರ್ ಕಾಳಸಂತೆಯಲ್ಲಿ ಮಾರಾಟವಾಗುತ್ತಿದೆ. ಇದಕ್ಕೆ ಆರೋಗ್ಯ ಇಲಾಖೆ ಹೊಣೆಯಾಗಬೇಕಾಗುತ್ತದೆ. ಕೆಲವು ಔಷಧಿ ಅಂಗಡಿಗಳಲ್ಲಿ 30ರಿಂದ 40 ಸಾವಿರ ರೂ.ಗೆ ಮಾರಾಟ ಮಾಡಿರುವುದಕ್ಕೆ ಸಾಕ್ಷಿ ನನ್ನ ಬಳಿ ಇದೆ ಎಂದು ಶಾಸಕ ಸಿ.ಎನ್.ಬಾಲಕೃಷ್ಣ ಕೇಳುತ್ತಿದ್ದಂತೆ ಸಂಸದರು ಕೂಡ ಕೇವಲ ಆರೋಗ್ಯ ಇಲಾಖೆ ಮಾಡುವುದು ಸರಿಯಲ್ಲ. ರೆಮ್ಡಿಸಿವಿರ್ ಇರಬೇಕಾದರೆ ಅಪರ ಜಿಲ್ಲಾಧಿಕಾರಿ ಅನುಮತಿ ಇಲ್ಲದೆ ಹೊರಬರಲು ಸಾಧ್ಯವಿಲ್ಲ. ಹಾಗಾಗಿ ಅವರನ್ನು ಕೂಡ ಹೊಣೆಗಾರರನ್ನಾಗಿ ಮಾಡಿ ತಕ್ಷಣ ಅವರನ್ನು ಸಸ್ಪೆಂಡ್ ಮಾಡಬೇಕೆಂದು ಆಗ್ರಹ ಮಾಡಿದರು.

ಇನ್ನು ಸಭೆಯ ಮಧ್ಯೆ ಶಾಸಕ ಸಿ.ಎನ್.ಬಾಲಕೃಷ್ಣ ಹಾಗೂ ಅರಸೀಕೆರೆ ಶಾಸಕ ಶಿವಲಿಂಗೇಗೌಡ ಮಾತನಾಡಲು ಮುಂದಾಗುತ್ತಿದ್ದಂತೆ ರೇವಣ್ಣ ಕೆಂಡಾಮಂಡಲವಾದರು.

ಹಾಸನದಲ್ಲಿ ದಿನದಿಂದ ದಿನಕ್ಕೆ ಕೋವಿಡ್ 19ರ ಸೋಂಕು ಸಾವಿರ ಗಡಿ ದಾಟುತ್ತಿದೆ. ಆದರೆ ಯಾವ ಅಧಿಕಾರಿಗೂ ಗಂಭೀರತೆ ಅನ್ನುವುದೇ ಇಲ್ಲ. ಇದೇ ರೀತಿ ನಿಮ್ಮ ವರ್ತನೆ ಮುಂದುವರೆದರೆ ನಿಮ್ಮ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳಬೇಕಾಗುತ್ತದೆ ಎಂದು ಅಧಿಕಾರಿ ವರ್ಗದವರಿಗೆ ಸಚಿವರು ಎಚ್ಚರಿಕೆ ನೀಡಿದರು.

ಅರಸೀಕೆರೆ ಶಾಸಕ ಕೆ.ಎಂ ಶಿವಲಿಂಗೇಗೌಡ ಮಾತನಾಡಿ, ರಾಜ್ಯದಲ್ಲಿ ಹೋಂ ಐಸೋಲೇಶನ್ ಮಾಡಿರುವುದು ಅವೈಜ್ಞಾನಿಕ. ಒಂದು ಗ್ರಾಮದಲ್ಲಿ 80 ಮಂದಿಗೆ ಐಸೋಲೇಶನ್ ಮಾಡಿದರೆ ಆತ ಮನೆಯಲ್ಲೇ ಇರದೇ ತುಂಬಾ ಊರು ತುಂಬಾ ಸುತ್ತಾಡುತ್ತಾನೆ. ಇದರಿಂದ ಎರಡರಷ್ಟು ಸೋಂಕಿತರು ಹೆಚ್ಚಾಗುತ್ತಾರೆ. ಹಾಗಾಗಿ ಇಂತಹ ವ್ಯವಸ್ಥೆ ಬದಲಿಗೆ ಸೋಂಕಿತರನ್ನು ಯಾವುದೇ ಮುಲಾಜಿಲ್ಲದೆ ಆಸ್ಪತ್ರೆಯ ಚಿಕಿತ್ಸೆಗೆ ಒಳಗಾಗಬೇಕೆಂದು ನಿರ್ದೇಶನ ನೀಡುವಂತೆ ಮುಖ್ಯಮಂತ್ರಿಗಳ ಗಮನಕ್ಕೆ ದಯವಿಟ್ಟು ನೀವು ಹಿಂದೆ ತರಬೇಕು ಎಂದು ಆಗ್ರಹ ಮಾಡಿದರು.