ತುಂಬಿದ ಕಟ್ಟೆಪುರ ಅಣೆಕಟ್ಟು: ಅರಕಲಗೂಡು ಭಾಗದಲ್ಲಿ ಪ್ರವಾಹ ಭೀತಿ

ಹಾಸನ ಜಿಲ್ಲೆಯ ಕಟ್ಟೆಪುರ ಅಣೆಕಟ್ಟು ತುಂಬಿರುವ ಕಾರಣ ಹೊರಕ್ಕೆ ನೀರು ಬಿಡಲಾಗುತ್ತಿದೆ. ಇದರಿಂದ ಅರಕಲಗೂಡು ಭಾಗದಲ್ಲಿ ಪ್ರವಾಹ ಭೀತಿ ಎದುರಾಗಿದೆ.

ಹಾಸನ: ಜಿಲ್ಲೆಯಲ್ಲಿ ಮಳೆ ಕಡಿಮೆಯಾಗಿದ್ದರೂ ಮಲೆನಾಡು ಭಾಗದಲ್ಲಿ ಮಾತ್ರ ಅಬ್ಬರಿಸುತ್ತಿದೆ. ಜಲಾಶಯಕ್ಕೆ ಒಳಹರಿವಿನ ಪ್ರಮಾಣ ದಿನದಿಂದ ದಿನಕ್ಕೆ ಹೆಚ್ಚಾಗುತ್ತಿದ್ದು, ಇತಿಹಾಸದಲ್ಲಿಯೇ ಮೊದಲ ಬಾರಿಗೆ ಜಲಾಶಯಕ್ಕೆ ಒಳಹರಿವಿನ ಪ್ರಮಾಣ ವಾಡಿಕೆಗಿಂತ ನಾಲ್ಕು ಪಟ್ಟು ಹೆಚ್ಚಾಗಿದೆ.

ಜಲಾಶಯದಿಂದಲೂ 30 ಸಾವಿರಕ್ಕೂ ಅಧಿಕ ಕ್ಯೂಸೆಕ್ ನೀರು ಹೊರಕ್ಕೆ ಬಿಡಲಾಗಿದೆ. ಇದರಿಂದ ಅರಕಲಗೂಡು ಭಾಗದಲ್ಲಿ ಪ್ರವಾಹ ಭೀತಿ ಎದುರಾಗಿದೆ. 1910ರಲ್ಲಿ ಮೈಸೂರಿನ ಒಡೆಯರು ನಿರ್ಮಾಣ ಮಾಡಿದ್ದ ಈ ಅಣೆಕಟ್ಟು 1961ರಲ್ಲಿ ಮೊದಲ ಬಾರಿಗೆ ತುಂಬಿದ್ದರಿಂದ ಕಾವೇರಿ ಮೈದುಂಬಿ ಹರಿದಿದ್ದು ಬಿಟ್ಟರೆ 57 ವರ್ಷಗಳ ಬಳಿಕ 2018ರಲ್ಲಿ ಮತ್ತು ಈ ಬಾರಿ ಮೈದುಂಬಿ ಪ್ರವಾಸಿ ತಾಣವಾಗುತ್ತಿದೆ.

ಇದು ಪ್ರವಾಸಿಗರಿಗೆ ನೆಚ್ಚಿನ ತಾಣವಾದರೆ, ಈ ಭಾಗದ ಜನರಿಗೆ ಮಾತ್ರ ಪ್ರವಾಹ ಸಂಕಷ್ಟವನ್ನು ತಂದೊಡ್ಡಿದೆ. ಕಷ್ಟಪಟ್ಟು ಮಾಡಿದ ಕೃಷಿ ಚಟುವಟಿಕೆ ಪ್ರವಾಹದಿಂದ ನೀರುಪಾಲಾಗಿದೆ. ಇತಿಹಾಸದಲ್ಲಿಯೇ ಕಂಡರಿಯದ ನೀರನ್ನು ನೋಡುತ್ತಿರುವ ಜನರು ಕೂಡ ಭಯಭೀತರಾಗಿದ್ದಾರೆ .

ಈ ಬಗ್ಗೆ ನಮ್ಮ ಈಟಿವಿ ಭಾರತದ ಪ್ರತಿನಿಧಿ ಕಟ್ಟೆಪುರ ಅಣೆಕಟ್ಟಿನಿಂದ ಪ್ರತ್ಯಕ್ಷ ವರದಿ ನೀಡಿದ್ದಾರೆ.