ಹಾಸನ: ಐಫೋನ್ಗಾಗಿ ಕೊರಿಯರ್ ಬಾಯ್ ಕೊಲೆ, 3 ದಿನ ಮನೆಯ ಬಾತ್ರೂಮ್ನಲ್ಲಿ ಶವ ಇಟ್ಟಿದ್ದ ಆರೋಪಿ ಹಾಸನ:ಐಫೋನ್ ಆಸೆಗಾಗಿ ಕೊರಿಯರ್ ಬಾಯ್ನನ್ನು ಬರ್ಬರವಾಗಿ ಕೊಲೆ ಮಾಡಿರುವ ಘಟನೆ ಜಿಲ್ಲೆಯ ಅರಸೀಕೆರೆ ನಗರದಲ್ಲಿ ನಡೆದಿದೆ. ಹೇಮಂತ್ ನಾಯಕ್ (23) ಎಂಬಾತನೇ ಕೊಲೆಯಾದ ಕೊರಿಯರ್ ಬಾಯ್ ಆಗಿದ್ದು, ಹೇಮಂತ್ ದತ್ತ (20) ಕೊಲೆ ಮಾಡಿದ ಆರೋಪಿ. ಈಗಾಗಲೇ ಆರೋಪಿಯನ್ನು ಪೊಲೀಸರು ಬಂಧಿಸಿದ್ದಾರೆ.
ಪ್ರಕರಣ ಹಿನ್ನೆಲೆ:ಇತ್ತೀಚೆಗೆಅರಸೀಕೆರೆ ತಾಲೂಕಿನ ಹೊರವಲಯದ ಕೊಪ್ಪಲು ರೈಲ್ವೆ ಗೇಟ್ ಸಮೀಪಯ ಅಪರಿಚಿತ ಯುವಕನ ಶವ ಸುಟ್ಟು ಹಾಕಿದ ಸ್ಥಿತಿಯಲ್ಲಿ ಪತ್ತೆಯಾಗಿತ್ತು. ಈ ಬಗ್ಗೆ ಪ್ರಕರಣದ ದಾಖಲಿಸಿಕೊಂಡಿದ್ದ ಪೊಲೀಸರು ಮೃತದೇಹದ ಗುರುತು ಪತ್ತೆ ಕಾರ್ಯವನ್ನು ಕೈಗೊಂಡಿದ್ದರು. ಇದರ ನಡುವೆ ಪೆಟ್ರೋಲ್ ಬಂಕ್ವೊಂದರಲ್ಲಿ ಬೈಕ್ ಮೇಲೆ ಚೀಲವೊಂದನ್ನು ಸಾಗಿಸುವುದು ದೃಶ್ಯ ಸಿಸಿಟಿವಿಯಲ್ಲಿ ಸೆರೆಯಾಗಿದ್ದು, ಇದರ ಮೇಲೆ ತನಿಖೆ ನಡೆಸಿದಾಗ ಕೊಲೆ ರಹಸ್ಯ ಬೆಳಕಿಗೆ ಬಂದಿದೆ.
ಐಫೋನ್ ಕೊಡಲು ಹೋದಾಗ ಕೊಲೆ:ಅರಸೀಕೆರೆಯ ಹಳೆ ಕಲ್ಲನಾಯಕನ ಹಳ್ಳಿ ಗ್ರಾಮದ ಆರೋಪಿ ಹೇಮಂತ್ ದತ್ತ ಡೆಲಿವರಿ ಬಾಯ್ ಆಗಿದ್ದ. ಆನ್ಲೈನ್ನಲ್ಲಿ ಅಂದಾಜು 46 ಸಾವಿರ ರೂಪಾಯಿ ಬೆಲೆಯ ಸೆಕೆಂಡ್ ಹ್ಯಾಂಡ್ ಐಫೋನ್ ಬುಕ್ ಮಾಡಿದ್ದ. ಇದು ಫೆಬ್ರವರಿ 7ರಂದು ಕೊರಿಯರ್ ಬಂದಿದ್ದರಿಂದ ಹೇಮಂತ್ ನಾಯಕ್ ಡೆಲಿವರಿ ಮಾಡಲೆಂದು ಲಕ್ಷ್ಮೀಪುರ ಬಡಾವಣೆಯಲ್ಲಿರುವ ಹೇಮಂತ ದತ್ತ ಮನೆಗೆ ಹೋಗಿದ್ದ ಎಂದು ಪೊಲೀಸರು ತಿಳಿಸಿದ್ದಾರೆ.
ಐಫೋನ್ಗಾಗಿ ಕೊರಿಯರ್ ಬಾಯ್ ಕೊಲೆ ಈ ವೇಳೆ ಹೇಮಂತ್ ದತ್ತ ನನ್ನ ಬಳಿ ಅಷ್ಟೊಂದು ಹಣ ಇಲ್ಲ. ಹಾಗೆಯೇ ಐಫೋನ್ ಬಾಕ್ಸ್ ಓಪನ್ ಮಾಡು ಎಂದು ಹೇಳಿದ್ದಾನೆ. ಆದರೆ, ಆಗ ಹೇಮಂತ್ ನಾಯಕ್ ಹಣ ನೀಡದೆ ಬಾಕ್ಸ್ ಓಪನ್ ಮಾಡುವುದಿಲ್ಲ ಎಂದು ಸ್ಪಷ್ಟವಾಗಿ ತಿಳಿಸಿದ್ಧಾನೆ. ಇದರಿಂದ ಕೋಪಗೊಂಡಿದ್ದ ಆರೋಪಿ ಹೇಮಂತ್ ದತ್ತನು ಹೇಮಂತ್ ನಾಯಕನನ್ನು ಮನೆ ಒಳಗೆ ಕರೆದಿದ್ದಾನೆ. ನನ್ನ ಸ್ನೇಹಿತ ಹಣ ತರುತ್ತಿದ್ದಾನೆ ಸ್ವಲ್ಪ ಹೊತ್ತು ಕುಳಿತುಕೊಳ್ಳುವಂತೆ ಹೇಳಿದ್ದಾನೆ ಎಂದು ಎಸ್ಪಿ ಹರಿರಾಮ್ ಶಂಕರ್ ಮಾಹಿತಿ ನೀಡಿದ್ದಾರೆ.
ಗೋಣಿಚೀಲದಲ್ಲಿ ಶವ ಸುಟ್ಟಿದ್ದ ಹಂತಕ:ಅಂತೆಯೇ, ಹೇಮಂತ್ ನಾಯಕ್ ಮೊಬೈಲ್ ನೋಡುತ್ತಾ ಮನೆಯಲ್ಲಿ ಕುಳಿತಿದ್ದಾನೆ. ಇದೇ ಸಮಯ ಸಾಧಿಸಿದ ಆರೋಪಿ ಹೇಮಂತ್ ದತ್ತ ಹಿಂದಿನಿಂದ ಬಂದು ಚಾಕುವಿನಿಂದ ಹೇಮಂತ್ ನಾಯಕನಿಗೆ ಇರಿದು ಬರ್ಬರವಾಗಿ ಕೊಲೆ ಮಾಡಿದ್ದಾನೆ. ಅಲ್ಲದೇ, ಶವವನ್ನು ಗೋಣಿ ಚೀಲದಲ್ಲಿ ಸುತ್ತಿ ಮೂರು ದಿನಗಳ ಕಾಲ ಮನೆಯ ಬಾತ್ರೂಮ್ನಲ್ಲೇ ಇರಿಸಿಕೊಂಡಿದ್ದಾನೆ.
ಇದಾದ ಬಳಿಕ ಫೆಬ್ರವರಿ 11ರಂದು ರಾತ್ರಿ ಬೈಕ್ನಲ್ಲಿ ಶವ ಸಾಗಿಸಿದ್ದಾನೆ. ಅರಸೀಕೆರೆ ನಗರದ ಅಂಚೆಕೊಪ್ಪಲು ಸಮೀಪದ ರೈಲ್ವೆ ಹಳಿ ಬಳಿಗೆ ತಂದು ಶವವನ್ನು ಸುಟ್ಟು ಹಾಕಿದ್ದಾನೆ. ಆದರೆ, ಸುಟ್ಟು ಹಾಕುವ ಮೊದಲು ಪೆಟ್ರೋಲ್ ಬಂಕ್ನಲ್ಲಿ ಬೈಕ್ಗೆ ಪೆಟ್ರೋಲ್ ಹಾಕಿಸಲು ಆರೋಪಿ ಹೇಮಂತ್ ದತ್ತ ಹೋಗಿದ್ದ ಎಂಬುದನ್ನು ಪೊಲೀಸರು ಪತ್ತೆ ಹಚ್ಚಿಸಿದ್ದಾರೆ. ಮತ್ತೊಂದೆಡೆ, ಹೇಮಂತ್ ನಾಯಕ್ ಕುಟುಂಬಸ್ಥರು ಫೆಬ್ರವರಿ 7ರಿಂದ ಮಗ ನಾಪತ್ತೆಯಾಗಿದ್ದಾನೆ ಎಂದು ಪೊಲೀಸರಿಗೆ ದೂರು ಕೊಟ್ಟಿದ್ದರು. ಇದರ ಆಧಾರದ ಮೇಲೆ ಆರೋಪಿಯನ್ನು ಪೊಲೀಸರು ಬಂಧಿಸಿದ್ದಾರೆ.
ಇದನ್ನೂ ಓದಿ:ಸುಟ್ಟ ಸ್ಥಿತಿಯಲ್ಲಿ ಅಪರಿಚಿತ ವ್ಯಕ್ತಿಯ ಶವ ಪತ್ತೆ : ಕೊಲೆ ಶಂಕೆ
