ತಮ್ಮದೇ ಕಷ್ಟಗಳ ಸರಮಾಲೆಯನ್ನು ತೆರೆಮೇಲೆ ತಂದ ಫೋಟೋಗ್ರಾಫರ್ಸ್​​​.. ಇದು ಕ್ಯಾಮೆರಾ ಹಿಂದಿನ ಬದುಕು

ಸರ್ಕಾರವಂತೂ ಅವರತ್ತ ತಿರುಗಿ ನೋಡುವ ಗೋಜಿಗೆ ಹೋಗಿಲ್ಲ. ಈ ನಿಟ್ಟಿನಲ್ಲಿ ತಮ್ಮ ಕಷ್ಟದ ಜೀವನವನ್ನು, ತಮ್ಮ ಕನಸಿನ ಕ್ಯಾಮೆರಾಗಳ ಮೂಲಕ ಪರದೆಯ ಮೇಲೆ ತೋರಿಸಲು ಸಿದ್ಧವಾಗಿರುವ ಫೋಟೋಗ್ರಾಫರ್ಸ್ ಸಂಘದ ಕೆಲವು ಸದಸ್ಯರು ಕಿರುಚಿತ್ರ ಮಾಡುವ ಮೂಲಕ ಸರ್ಕಾರದ ಮುಂದಿಟ್ಟಿದ್ದಾರೆ..

ಚನ್ನರಾಯಪಟ್ಟಣ :ಜನರ ಬದುಕಿನ ಸುಂದರ ಕ್ಷಣಗಳನ್ನು ತಮ್ಮ ಕ್ಯಾಮೆರಾದಲ್ಲಿ ಶೇಖರಿಸುವ, ಫೋಟೋಗ್ರಾಫರ್​ಗಳ ಜೀವನ ಕೊರೊನಾ ಹೊಡೆತಕ್ಕೆ ಮುಗ್ಗರಿಸಿದೆ. ಹಲವಾರು ಕನಸುಗಳನ್ನು ಹೊತ್ತು ಫೋಟೋಗ್ರಫಿ ವ್ಯಾಪಾರ ಪ್ರಾರಂಭ ಮಾಡಿದ ಅದೆಷ್ಟೋ ಜನರ ಬದುಕು ಕಳೆದ ನಾಲ್ಕು ತಿಂಗಳಿನಿಂದ ವ್ಯಾಪಾರವಿಲ್ಲದೆ ಬ್ಲಾಕ್​ ಅಂಡ್​ ವೈಟ್​ ಚಿತ್ರಪಟದಂತಾಗಿದೆ.

ಸಾಲ ಮಾಡಿ ಲಕ್ಷಾಂತರ ರೂ. ಬಂಡವಾಳ ಹಾಕಿ ತಂದ ಕ್ಯಾಮೆರಾ ಮತ್ತು ಸ್ಟುಡಿಯೋಗೆ ಲೋನ್​ ಕಟ್ಟಲು ಹಣವಿಲ್ಲದೆ ಪರದಾಡುವಂತಾಗಿದೆ. ವರ್ಷದ ಆರು ತಿಂಗಳು ಕೆಲಸ ಮಾಡಿ, ಇನ್ನಾರು ತಿಂಗಳು ಹೇಗಾದರೂ ಕಷ್ಟಪಟ್ಟು ತಂಗಿಯ ಮದುವೆ, ಅಪ್ಪ-ಅಮ್ಮನ ಆರೋಗ್ಯ, ಸಾಲ ತೀರಿಸುವ ಬಯಕೆ ಹೊತ್ತ ಅದೆಷ್ಟೊ ಮನಸ್ಸುಗಳ ಕನಸುಗಳಿಗೆ ಲಾಕ್​​ಡೌನ್​ ತಣ್ಣೀರೆರಚಿದೆ.

ಸರ್ಕಾರವಂತೂ ಅವರತ್ತ ತಿರುಗಿ ನೋಡುವ ಗೋಜಿಗೆ ಹೋಗಿಲ್ಲ. ಈ ನಿಟ್ಟಿನಲ್ಲಿ ತಮ್ಮ ಕಷ್ಟದ ಜೀವನವನ್ನು, ತಮ್ಮ ಕನಸಿನ ಕ್ಯಾಮೆರಾಗಳ ಮೂಲಕ ಪರದೆಯ ಮೇಲೆ ತೋರಿಸಲು ಸಿದ್ಧವಾಗಿರುವ ಫೋಟೋಗ್ರಾಫರ್ಸ್ ಸಂಘದ ಕೆಲವು ಸದಸ್ಯರು ಕಿರುಚಿತ್ರ ಮಾಡುವ ಮೂಲಕ ಸರ್ಕಾರದ ಮುಂದಿಟ್ಟಿದ್ದಾರೆ.

ಇದರ ಹಿಂದಿರುವ ಸತ್ಯ ಇಷ್ಟೇ, ಸಿಎಂಗೆ ನಮ್ಮ ವಿಚಾರ ತಲುಪಬೇಕು ಹಾಗೂ ನಮಗೆ ಯಾವುದಾದ್ರೂ ಒಂದು ರೀತಿ ಪರಿಹಾರ ದೊರಕಿಸಿಕೊಡಬೇಕು ಎಂದು ಫೋಟೋಗ್ರಾಫರ್ ಮನವಿ ಮಾಡಿದ್ದಾರೆ.