ಗುಂಡೇಟು ತಗುಲಿ ಗಾಯಗೊಂಡಿದ್ದ ಯುವಕ ಕೊನೆಯುಸಿರು.. ಸಾವಿನ ಸುತ್ತ ಅನುಮಾನದ ಹುತ್ತ

ಗುಂಡೇಟು ತಗುಲಿ ಗಾಯಗೊಂಡಿದ್ದ ಹಾಸನ ಜಿಲ್ಲೆ ಬೇಲೂರಿನ ಯುವಕ ಮೃತಪಟ್ಟಿದ್ದಾನೆ.

ಹಾಸನ : ಸ್ನೇಹಿತರ ಜೊತೆ ಅರಣ್ಯಕ್ಕೆ ತೆರಳಿದ್ದ ವೇಳೆ ಗುಂಡೇಟು ತಗುಲಿ ತೀವ್ರವಾಗಿ ಗಾಯಗೊಂಡಿದ್ದ ಯುವಕ ಚಿಕಿತ್ಸೆ ಫಲಿಸದೆ ಮೃತಪಟ್ಟಿದ್ದಾನೆ. ಬೇಲೂರು ತಾಲೂಕು ಕುಶಾವರ ಗ್ರಾಮದ ಮಧು (24) ಮೃತ ಯುವಕ. ತಾಲೂಕಿನ ಕಲ್ಲಹಳ್ಳಿಯ ಬಳಿಯ ಅರಣ್ಯದಲ್ಲಿ ಈತನಿಗೆ ಗುಂಡೇಟು ತಗುಲಿತ್ತು.

ಏನಿದು ಘಟನೆ :ಮೃತ ಮಧುಸ್ನೇಹಿತರ ಜೊತೆಗೆ ಶಿಕಾರಿಗೆಂದು ಕಲ್ಲಹಳ್ಳಿ ಬಳಿಯ ಅರಣ್ಯಕ್ಕೆ ತೆರಳಿದ್ದ. ಈ ವೇಳೆ ಆತನಿಗೆ ಗುಂಡೇಟು ತಗುಲಿದೆ. ತೀವ್ರವಾಗಿ ಗಾಯಗೊಂಡಿದ್ದ ಮಧುವನ್ನು ಸ್ನೇಹಿತರು ಹಾಸನದ ಖಾಸಗಿ ಆಸ್ಪತ್ರೆಗೆ ದಾಖಲಿಸಿ ಪರಾರಿಯಾಗಿದ್ದರು. ಇಂದು ಚಿಕಿತ್ಸೆ ಫಲಿಸದೆ ಮಧು ಕೊನೆಯುಸಿರೆಳೆದಿದ್ದಾನೆ.

ಶಿಕಾರಿಗೆ ತೆರಳಿದ್ದಾಗ ಮಿಸ್​ ಆಗಿ ಮಧು ಮೇಲೆ ಫೈರ್ ಆಗಿದೆಯೋ, ಅಥವಾ ಸ್ನೇಹಿತರೇ ಕೊಲೆ ಮಾಡಲು ಗುಂಡು ಹಾರಿಸಿದ್ದಾರೋ ಎಂಬುದು ತಿಳಿದು ಬಂದಿಲ್ಲ. ಈ ಸಂಬಂಧ ಹಳೇಬೀಡು ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.