ಜನರಿಗಾಗಿ ರಾಜಕಾರಣ, ಅದಕ್ಕಾಗಿ ಹೊಸ ಚಿಂತನೆಯ ವಿಚಾರ: ಮಹಿಮಾ ಪಟೇಲ್

ಮಾಜಿ ಮುಖ್ಯಮಂತ್ರಿ ದಿ.ಜೆ.ಎಚ್.ಪಟೇಲ್​​ರ 19ನೇ‌ ಪುಣ್ಯಸ್ಮರಣೆ ಕಾರ್ಯಕ್ರಮ ಗದಗದಲ್ಲಿ ನಡೆಯಿತು.

ಗದಗ: ರಾಜಕಾರಣ ಮಾಡುವುದನ್ನು ಜನರಿಗಾಗಿ ಎಂಬುದನ್ನು ಅರ್ಥೈಸಬೇಕಾಗಿದೆ. ಹೀಗಾಗಿ ಎಸ್​​.ಎಸ್.ಪಾಟೀಲ್ ಹಾಗೂ ಇನ್ನುಳಿದ ಹಿರಿಯ ನಾಯಕರ ಮುಖಂಡತ್ವದಲ್ಲಿ ಜನರಿಗಾಗಿ ರಾಜ್ಯಾದ್ಯಂತ ಹೊಸ ಚಿಂತನೆ ತರುವ ವಿಚಾರವಿದೆ. ಅದನ್ನು ಗದಗನಿಂದಲೇ ಆರಂಭವಾಗುತ್ತದೆ ಎಂದು ಮಾಜಿ ಮುಖ್ಯಮಂತ್ರಿ ದಿ.ಜೆ.ಎಚ್.ಪಟೇಲ್​​ ಪುತ್ರ ಮಹಿಮಾ ಪಟೇಲ್​​ ಹೇಳಿದರು.

ದಿ.ಜೆ.ಎಚ್.ಪಟೇಲ್​​ರ 19ನೇ‌ ಪುಣ್ಯಸ್ಮರಣೆ ಕಾರ್ಯಕ್ರಮದಲ್ಲಿ ಮಾತನಾಡಿದ ಅವರು, ದೇಶದಲ್ಲಿ ಪ್ರಜಾಪ್ರಭುತ್ವ ಶೈಶಾವಸ್ಥೆಯಲ್ಲಿದೆ. ಇದನ್ನು ಪ್ರಬುದ್ಧವಾಗಿಸುವ ನಿಟ್ಟಿನಲ್ಲಿ ಎಲ್ಲರನ್ನು ಹೊಸ ದಿಕ್ಕಿನತ್ತ ಕೊಂಡೊಯ್ಯುವ ಕೆಲಸ ಮಾಡಬೇಕಿದೆ. ರಾಜಕಾರಣದಲ್ಲಿ ಬದ್ಧತೆ ಜವಾಬ್ದಾರಿ ತರುವ ಉದ್ದೇಶದಿಂದ ಎಲ್ಲಾ ಜಿಲ್ಲೆಗಳಲ್ಲಿ ಈ ಬಗೆಯ ಕಾರ್ಯಕ್ರಮ ಹಮ್ಮಿಕೊಳ್ಳಲಿದ್ದೇವೆ ಎಂದು ತಿಳಿಸಿದರು.

ಹಿರಿಯರಾದ ಎಸ್​​.ಎಸ್.ಪಾಟೀಲ್, ಎಚ್.ಕೆ.ಪಾಟೀಲ್, ಬಸವರಾಜ್ ಹೊರಟ್ಟಿ ಅವರು ಆಲೋಚಿಸಿ ಈ ಬಗೆಯ ಕಾರ್ಯಕ್ರಮ‌ ರೂಪಿಸಿದ್ದಾರೆ. ಇದನ್ನು ಒಂದು‌ ಪಕ್ಷಕ್ಕೆ ಸೀಮಿತಗೊಳಿಸಿಲ್ಲ. ಎಲ್ಲಾ ಪಕ್ಷದವರನ್ನು ಇಲ್ಲಿ ಸೇರಿಸಿದ್ದೇವೆ. ಜೊತೆಗೆ ಎಲ್ಲಾ ಪಕ್ಷಗಳಲ್ಲಿ ಒಳ್ಳೆಯ ಆಲೋಚನೆಗಳನ್ನು ಒಳಗೊಂಡಿರುವವರನ್ನೇ ಸೇರಿಸಿದ್ದೇವೆ. ಇದು ನಿರಂತರವಾಗಿ ಬದಲಾವಣೆಯಾಗುವ ಸಮಾಜ. ಆ ಮೂಲಕ ಬದಲಾವಣೆಯತ್ತ ನಾವು ಹೊಸ ಚಿಂತನೆಗೆ ನಾಂದಿ ಹಾಡಬೇಕಾಗಿದೆ ಎಂದರು.