ಸಿದ್ದರಾಮಯ್ಯ,ಡಿಕೆಶಿ ಸಿಎಂ ಆಗೋದು ಹಗಲುಗನಸು: ಸಚಿವ ಸಿಸಿ ಪಾಟೀಲ್

ಡಿಕೆಶಿ ಮತ್ತು ಸಿದ್ದರಾಮಯ್ಯ ಒಂದೊಂದು ನಾಟಕ ಮಾಡಿ ಅದರಲ್ಲಿ ಸಿಎಂ ಆಗಲಿ ಎಂದು ಸಚಿವ ಸಿಸಿ ಪಾಟೀಲ್ ವ್ಯಂಗ್ಯವಾಡಿದ್ದಾರೆ.

ಗದಗ:ಸಿದ್ದರಾಮಯ್ಯ ಮತ್ತು ಡಿಕೆ ಶಿವಕುಮಾರ್ ಸಿಎಂ ಆಗೋದು ಹಗಲು ಕನಸು. ಒಂದು ಕಡೆ ಸಿದ್ದರಾಮಯ್ಯ ಮತ್ತೊಂದ್ಕಡೆ ಡಿಕೆಶಿ ನಾನೇ ಸಿಎಂ ಅಂತಿದಾರೆ. ಈ ರಾಜ್ಯಕ್ಕೆ ಎಷ್ಟು ಜನ ಸಿಎಂ ಅನ್ನೋದು ನನಗೆ ತಿಳಿಯುತ್ತಿಲ್ಲಾ ಅಂತಾ ಸಚಿವ ಸಿಸಿ ಪಾಟೀಲ್ ವ್ಯಂಗ್ಯವಾಡಿದ್ದಾರೆ.

ಜಿಲ್ಲಾ ಆಡಳಿತ ಭವನದಲ್ಲಿ ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿದ ಅವರು, ಚುನಾವಣೆಗೆ ಇನ್ನೂ ಸಮಯ ಇದೆ. ಈಗಲೇ ಮುಂದಿನ ಸಿಎಂ ಅಂತಿದಾರೆ, ಮುಂದಿನ ಸಿಎಂ ಕ್ಯಾಂಪೇನ್​ಗೆ ನಗಬೇಕೋ ಅಳಬೇಕೋ ತಿಳಿಯುತ್ತಿಲ್ಲ. ಚುನಾವಣೆಯಲ್ಲಿ ಗೆಲ್ಲಬೇಕು ಅಂದರೆ 113 ಸೀಟ್ ಬೇಕು. ಬಳಿಕ ಶಾಸಕಾಂಗ ಸಭೆಯಲ್ಲಿ ಸಿಎಂ ನಿರ್ಧಾರ ಮಾಡ್ತಾರೆ.

ನಮ್ಮಲ್ಲಿ ಶಾಸಕರು ಮುಖ್ಯಮಂತ್ರಿಯನ್ನ ಆರಿಸುತ್ತೇವೆ. ಕಾಂಗ್ರೆಸ್​ನಲ್ಲಿ ದೆಹಲಿಯಿಂದ ಚೀಟಿ ಯಾರ ಪರವಾಗಿ ಬರುತ್ತೆ ಅನ್ನೋದು ಯಾರಿಗೂ ಗೊತ್ತಿಲ್ಲಾ. ಇಬ್ಬರ ಹೊರತುಪಡಿಸಿ ಬೇರೆಯವರಿಗೆ ಬಂದರೇ ಏನಾಗುತ್ತೆ. ಹೇಳಿಕೆ ನೀಡುವುದಕ್ಕೆ ಏನು. ಹಣವಂತೂ ಖರ್ಚು ಆಗುವುದಿಲ್ಲ ಅಂತ ಪ್ರತಿಕ್ರಿಯಿಸಿದ್ದಾರೆ.

ಕಾಂಗ್ರೆಸ್ ನಾಯಕರ ಸಿಎಂ ಕ್ಯಾಂಪೇನ್​ಗೆ ಮಿರ್ಚಿ ಕಥೆ ಹೇಳಿದ ಸಚಿವರು, ತೋಂಟದಾರ್ಯ ಮಠದ ಸ್ವಾಮೀಜಿ ಈ ಹಿಂದೆ ಕಥೆಯೊಂದನ್ನ ಹೇಳ್ತಿದ್ರು. ಮಠದ ಎದುರಿಗೆ ಒಬ್ಬ ವ್ಯಕ್ತಿ ಕೂತು ಏನೋ ತಿಂದಹಾಗೆ ಮಾಡುತ್ತಿದ್ದನಂತೆ. ಸ್ವಾಮಿಗಳು ಕೇಳಿದ್ರೆ ಆ ವ್ಯಕ್ತಿ ಮಿರ್ಚಿ ತಿಂದಹಾಗೆ ಸುಮ್ನೆ ಮಾಡುತ್ತಿದ್ದೇನೆ ಎಂದಿದ್ದನಂತೆ.

ತಿಂದಹಾಗೆ ಮಾಡೋದಾದ್ರೆ ಧಾರವಾಡ ಪೇಡಾ ತಿನ್ನು ಗೋಕಾಕ್​ ಕರದಂಟು ತಿನ್ನು ಎಂದು ಸ್ವಾಮಿಗಳು ಹೇಳಿದ್ದರಂತೆ. ಅದರಂತೆ ನೀವು ಕನಸು ಕಾಣೋದಾದ್ರೆ ಪ್ರಧಾನ ಮಂತ್ರಿ, ವರ್ಡ್ಡ್ ಬ್ಯಾಂಕ್ ಅಧ್ಯಕ್ಷ ಆಗೋದನ್ನು ಕಾಣಿ ಅಂತಾ ಕಾಂಗ್ರೆಸ್​ ನಾಯಕರಿಗೆ ಟಾಂಗ್​ ನೀಡಿದ್ದಾರೆ.