ಮಳೆ ಅವಾಂತರ: ಕಣ್ಣೆದುರೇ ಕುಸಿದು ಬಿತ್ತು ಮನೆ - ವಿಡಿಯೋ

ನರಗುಂದ ತಾಲೂಕಿನ ವಾಸನ ಗ್ರಾಮದಲ್ಲಿ ನೋಡ‌ ನೋಡುತ್ತಿದ್ದಂತೆಯೇ ಮನೆಯೊಂದು ನೆಲಕ್ಕುರುಳಿದೆ. ಮನೆಯ ಗೋಡೆ ಬೀಳುತ್ತಿರುವ ದೃಶ್ಯ ಸ್ಥಳೀಯರ ಮೊಬೈಲ್​ನಲ್ಲಿ ಸೆರೆಯಾಗಿದೆ.

ಗದಗ: ಭಾರಿ ಮಳೆ, ಪ್ರವಾಹ ಕಡಿಮೆಯಾಗಿದ್ದರೂ ಅದರ ದುಷ್ಪರಿಣಾಮಗಳು ಈಗ ಉಂಟಾಗುತ್ತಿವೆ.​ ಜಿಲ್ಲೆಯ ನರಗುಂದ ಹಾಗೂ ರೋಣ ತಾಲೂಕಿನ ಹಲವು ಗ್ರಾಮಗಳು ಪ್ರವಾಹಕ್ಕೆ ತುತ್ತಾಗಿ ಮುಳಗಡೆಯಾಗಿದ್ದವು.

ಕಳೆದ 3 ದಿನಗಳಿಂದ ಪ್ರವಾಹ ಇಳಿಮುಖವಾಗಿದ್ದು ಗಾಮಸ್ಥರೆಲ್ಲ ತಮ್ಮ-ತಮ್ಮ ಮನೆಗಳಿಗೆ ತೆರಳುತ್ತಿದ್ದಾರೆ. ಆದರೆ ಪ್ರವಾಹಕ್ಕೆ ತುತ್ತಾಗಿರೋ ಮನೆಗಳು ನೀರಿನಿಂದ ನೆನೆದು ಯಾವ ಹೊತ್ತಲ್ಲಿ ನೆಲಕ್ಕುರುಳತ್ತವೆಯೋ ಎಂಬ ಭಯ ಜನರನ್ನು ಕಾಡುತ್ತಿದೆ.

ವಾಸನ ಗ್ರಾಮದಲ್ಲಿ ಮನೆಯೊಂದು ದಿಢೀರ್​ ನೆಲಕ್ಕುರುಳಿದೆ. ಮನೆಯ ಗೋಡೆ ಬೀಳುತ್ತಿರುವ ಭಯಾನಕ ದೃಶ್ಯ ಸ್ಥಳೀಯರ ಮೊಬೈಲ್​ನಲ್ಲಿ ಸೆರೆಯಾಗಿದೆ. ಆದರೆ ಅದೃಷ್ಟವಶಾತ್ ಯಾವುದೇ ಪ್ರಾಣ ಹಾನಿ ಆಗಿಲ್ಲ. ತಾತ್ಕಾಲಿಕ ಶೆಡ್ ನಿರ್ಮಾಣ ಮಾಡಿ ನಮ್ಮ ಜೀವ ಉಳಿಸಿ ಎಂದು ಗ್ರಾಮಸ್ಥರು ಜಿಲ್ಲಾಡಳಿತಕ್ಕೆ ಒತ್ತಾಯಿಸುತ್ತಿದ್ದಾರೆ.