ಸರ್ಕಾರದ ಸಹಕಾರ ಬಯಸದೇ ತಮ್ಮ ಊರಿನ ಕೆರೆ ಹೂಳೆತ್ತುತ್ತಿರೋ ಅನ್ನದಾತರು!

ಸರ್ಕಾರದ ಯಾವೊಂದೂ ಸಹಕಾರವನ್ನೂ ಬಯಸದೆ ಗದಗ ಜಿಲ್ಲೆ ಲಕ್ಷ್ಮೇಶ್ವರ ತಾಲೂಕಿನ ರೈತರು ತಮ್ಮ ಸ್ವಂತ ಹಣದಿಂದಲೇ ಈ ಕೆರೆಯ ಅಭಿವೃದ್ಧಿಗೆ ಮುಂದಾಗಿದ್ದಾರೆ.

ಗದಗ : 84 ಎಕರೆ ವಿಸ್ತೀರ್ಣದ ಬಹುದೊಡ್ಡ ಕೆರೆ ತುಂಬಿಸಲು ಸರ್ಕಾರದಿಂದ ಒಂಭತ್ತು ಕೋಟಿ ರೂಪಾಯಿ ಅನುದಾನ ಬಿಡುಗಡೆಗೊಂಡಿತ್ತು. ಅಲ್ಲದೆ ನದಿಯ ನೀರು ಕೆರೆಗೆ ತರಲು ಅಗತ್ಯ ಕಾಮಗಾರಿಯೂ ನಡೆದಿತ್ತು. ವಿಪರ್ಯಾಸ ಅಂದ್ರೆ ನದಿಯಿಂದ ಬರಲಿರುವ ನೀರನ್ನುಆ ಕೆರೆ ತನ್ನೊಡಲಲ್ಲಿ ಇಟ್ಟುಕೊಳ್ಳುವ ಸ್ಥಿತಿಯಲ್ಲೇ ಇಲ್ಲ. ಹಾಗಾಗಿ ಕೆರೆಯ ಒಡಲಲ್ಲಿ ನೀರು ನಿಲ್ಲುವಂತೆ ಅಲ್ಲಿನ ಅನ್ನದಾತರೆಲ್ಲ ಸೇರಿ ಸರ್ಕಾರದ ಸಹಾಯ ಬಯಸದೇ ಸ್ವಾಮೀಜಿಯೊಬ್ಬರ ಸಹಕಾರದಿಂದ ವಿಶೇಷ ಪ್ರಯತ್ನ ನಡೆಸಿದ್ದಾರೆ.

ಹೌದು, ಗದಗ ಜಿಲ್ಲೆ ಲಕ್ಷ್ಮೇಶ್ವರ ತಾಲೂಕಿನ ಬಾಲೇಹೊಸೂರ ಗ್ರಾಮದಲ್ಲಿ 1979ರಲ್ಲಿ ಸಣ್ಣ ನೀರಾವರಿ ಇಲಾಖೆಯಿಂದ ನಿರ್ಮಾಣಗೊಂಡ ಈ ಕೆರೆಯಿಂದ ಈ ಗ್ರಾಮದಲ್ಲಿ ಸುಮಾರು ಹತ್ತು ಸಾವಿರಕ್ಕೂ ಹೆಚ್ಚು ಜನಸಂಖ್ಯೆ ಕುಡಿಯುವ ನೀರಿನ ದಾಹವನ್ನ ತೀರಿಸಿಕೊಳ್ತಿದೆ. ಅಲ್ಲದೇ ಇಲ್ಲಿನ ರೈತರ ಬೋರವೆಲ್​​ಗಳು ಸಹ ರಿಚಾರ್ಜ್​ ಆಗ್ತಾಯಿದ್ವು. ಕಾಲಕ್ರಮೇಣ ಕೆರೆಯಲ್ಲಿ ಹೂಳು ತುಂಬುತ್ತಾ ಬಂದು ಇಲ್ಲಿನ ಅಂತರ್ಜಲ ಕೂಡಾ ಕುಸಿದಿದೆ. ಸರ್ಕಾರದ ಗಮನಕ್ಕೆ ಈ ಸಮಸ್ಯೆಯನ್ನು ತಂದ್ರು ಕೂಡಾ ಏನು ಪ್ರಯೋಜನವಾಗದೇ ಇಂದು ಅಲ್ಲಿನ ರೈತರು ಸೇರಿದಂತೆ ಸುತ್ತಮುತ್ತಲಿರುವ ಅಂಕಲಿ ಕೊಗನೂರ, ಕೊಕ್ಕರಗುಂದಿ, ಬೂದಿಹಾಳ, ಸೂರಣಗಿ, ಎಲ್ಲಾಪೂರ, ದೊಡ್ಡೂರ ಸೇರಿದಂತೆ ಹತ್ತಾರು ಗ್ರಾಮಗಳ ರೈತರು ತಮ್ಮ ಸ್ವಂತ ಹಣದಿಂದಲೇ ಈ ಕೆರೆಯ ಅಭಿವೃದ್ಧಿಗೆ ಮುಂದಾಗಿದ್ದಾರೆ.

ಕಾರಣ ಏನಪ್ಪ ಅಂದ್ರೆ ಈ ಹಿಂದಿನ ಸರ್ಕಾರ ಈ ಕೆರೆಗೆ ನೀರು ತುಂಬಲಿಕ್ಕಾಗಿ ಒಂಭತ್ತು ಕೋಟಿ ರೂಪಾಯಿ ಬಿಡುಗಡೆ ಮಾಡಿ ಹಾವೇರಿ ಜಿಲ್ಲೆ ಸವಣೂರ ತಾಲೂಕಿನ ಮರಡೂರ ಗ್ರಾಮದಿಂದ ನೀರು ತರುವ ಕಾಮಗಾರಿ ನಡೆಸಿದೆ. ನೀರು ಬಂದ್ರೂ ಕೆರೆ ಒಡಲಲ್ಲಿ ಜಾಗವಿಲ್ಲ ಅಂತಾ ಸರ್ಕಾರದ ಸಹಾಯ ಪಡೆಯದ ರೈತರು ಹೂಳೆತ್ತುವ ಮೂಲಕ ತಮ್ಮ ಅಭಿವೃದ್ಧಿಗೆ ತಾವೇ ನಾಂದಿ ಹಾಡಿದ್ದಾರೆ. ಇದಕ್ಕೆ ಬಾಳೆಹೊಸೂರಿನ ದಿಂಗಾಲೇಶ್ವರ ಸ್ವಾಮೀಜಿ ಬೆನ್ನೆಲುಬಾಗಿ ನಿಂತಿದ್ದಾರೆ. ಸ್ವಾಮೀಜಿಗಳ ಸಹಕಾರ ಹಾಗೂ ಮಾರ್ಗದರ್ಶನದಲ್ಲಿ ಸ್ಥಳೀಯರೆಲ್ಲರೂ ಸೇರಿ ಮಾಡುತ್ತಿರುವ ಅಭಿವೃದ್ಧಿ ಕಾಮಗಾರಿ ನದಿಯ ನೀರು ಕೆರೆಯನ್ನ ತಲುಪುವ ಒಳಗಾಗಿ ಕೆರೆಯ ಹೂಳನ್ನು ಸಂಪೂರ್ಣವಾಗಿ ಹೊರಗೆ ಹಾಕುವ ಪಣ ತೊಟ್ಟಿದ್ದಾರೆ.

ರೈತರ ಶ್ರಮದಾನದ ಫಲವಾಗಿ ಈ ಕೆರೆಯಲ್ಲಿನ ಹೂಳು ಸಂಪೂರ್ಣವಾಗಿ ಹೊರಗಡೆ ಹೋದರೆ ಸುಮಾರು 07.40 ಮಿಲಿಯನ್ ಲೀಟರ್​ಗೂ ಅಧಿಕ ನೀರು ಶೇಖರಣೆಯಾಗಲಿದೆ. ಇದರಿಂದ ಕೇವಲ ಬಾಳೆಹೊಸುರು ಗ್ರಾಮಕ್ಕೆ ಕುಡಿಯುವ ನೀರು ಮಾತ್ರವಲ್ಲದೇ ಅಕ್ಕಪಕ್ಕದ ರೈತರ ಜಮೀನುಗಳಿಗೆ ನೀರು ಕೂಡಾ ದೊರಕಲಿದೆ. ಅಲ್ಲದೇ ಗ್ರಾಮದಲ್ಲಿನ ಬೋರವೆಲ್​ಗಳು ರಿಚಾರ್ಜ್​ ಆಗುವ ಮೂಲಕ ಅಂತರ್ಜಲ ಮಟ್ಟ ಕೂಡಾ ಹೆಚ್ಚಾಗಲಿದೆ.