ಲಾಕ್​ಡೌನ್​ ಎಫೆಕ್ಟ್... ತುತ್ತಿನ ಚೀಲ ತುಂಬಿಸಿಕೊಳ್ಳಲು ಮನೆ ಮನೆಗೆ ತೆರಳಿ ಚಮ್ಮಾರರ ಕಾಯಕ!

ಗದಗ ಜಿಲ್ಲೆಯಲ್ಲಿ ಕೊರೊನಾ ಸೋಂಕು ಕಾಣಿಸಿಕೊಂಡ ಹಿನ್ನಲೆ ಜಿಲ್ಲೆಯನ್ನು ಸಂಪೂರ್ಣ ಲಾಕ್​ಡೌನ್​ ಮಾಡಲಾಗಿದೆ. ಇದರಿಂದ ದಿನದ ಕೆಲಸವನ್ನು ನಂಬಿಕೊಂಡಿದ್ದ ಚಮ್ಮಾರರ ಬದುಕು ಈಗ ಅತಂತ್ರವಾಗಿದೆ.

ಗದಗ: ಕೊರೊನಾ ಎಫೆಕ್ಟ್​ನಿಂದ ದೇಶದಲ್ಲಿ ನಿರುದ್ಯೋಗ ಸಮಸ್ಯೆ ತಲೆದೋರಿದೆ. ಜಿಲ್ಲೆಯ ಚಮ್ಮಾರರಿಗೂ ಇದರ ಕಹಿ ಅನುಭವ ಆಗಿದೆ.

ಹೌದು, ಚಮ್ಮಾರರ‌ ಬದುಕು ಸಹ ಅತಂತ್ರವಾಗಿದೆ.‌ ಬೀದಿ ಪಕ್ಕದಲ್ಲಿ ಮುರುಕು ಕೊಡೆಯ ಕೆಳಗೆ ಪಾದರಕ್ಷೆ ಹೊಲೆಯುವ ಕೈಗಳಿಗೆ ಈಗ ಕೊರೊನಾ ಲಾಕ್​ಡೌನ್ ಬಿಸಿ ತಟ್ಟಿದೆ. ಪರಿಣಾಮ ನೂರಾರು ಜನರ ಬದುಕು ಈಗ ಮೂರಾಬಟ್ಟೆಯಾಗಿದೆ. ಸಂತೆ, ಬಜಾರ್​ಗಳಿಗೆ ಬ್ರೇಕ್ ಬಿದ್ದಿದ್ದರಿಂದ ಚಮ್ಮಾರರು ಹೊಟ್ಟೆಪಾಡಿಗೆ ಪಡಬಾರದ ಕಷ್ಟಪಡುತ್ತಿದ್ದಾರೆ.

ಇದರಿಂದ ತುತ್ತಿನ ಚೀಲ ತುಂಬಿಸಿಕೊಳ್ಳಲು ಮನೆ ಮನೆಗೆ ತೆರಳಿ ಚಪ್ಪಲಿ ರಿಪೇರಿ ಮಾಡಲು ಮುಂದಾಗಿದ್ದಾರೆ. ಕುರಿಗಾಹಿಗಳಿಗೆ ರೈತರಿಗೆ ಚಪ್ಪಲಿ ತಯಾರಿಸುತ್ತಿದ್ದ ಈ ಕುಟುಂಬಗಳು ಕೆಲಸವಿಲ್ಲದೆ ಬದುಕು ನಡೆಸಲು ಪರದಾಡುತ್ತಿದ್ದಾರೆ.