ಜೂಜು ಅಡ್ಡೆ ಮೇಲೆ ದಾಳಿ‌ ನಡೆಸಿ ಹಣ ವಸೂಲಿ ಆರೋಪ: ಇಬ್ಬರು ಪೊಲೀಸ್​​​ ಪೇದೆ ಅಮಾನತು

ಗದಗದಲ್ಲಿ ಜೂಜು ಅಡ್ಡೆ ಮೇಲೆ ದಾಳಿ ನಡೆಸಿ ಹಣ ವಸೂಲಿ ಮಾಡಿ, ವಿಷಯ ಮುಚ್ಚಿ ಹಾಕಿದ್ದ ಪ್ರಕರಣಕ್ಕೆ ಸಂಬಂಧಿದಂತೆ ಇಬ್ಬರು ಪೊಲೀಸ್ ಪೇದೆಗಳನ್ನು ಗದಗ ಎಸ್ಪಿ ಶ್ರೀನಾಥ್ ಜೋಶಿ ಅಮಾನತು ಮಾಡಿ ಆದೇಶ ಹೊರಡಿಸಿದ್ದಾರೆ.

ಗದಗ: ಜೂಜು ಅಡ್ಡೆ ಮೇಲೆ ದಾಳಿ ನಡೆಸಿ ಹಣ ವಸೂಲಿ ಮಾಡಿ, ಈ ವಿಷಯ ಮುಚ್ಚಿ ಹಾಕಿದ್ದ ಪ್ರಕರಣಕ್ಕೆ ಸಂಬಂಧಿದಂತೆ ಇಬ್ಬರು ಪೊಲೀಸ್ ಪೇದೆಗಳನ್ನು ಅಮಾನತು ಮಾಡಲಾಗಿದೆ.

ಗದಗ ನಗರ ಠಾಣೆಯ ಹನುಮಂತ ಯಡಿಯಾಪುರ್ ಹಾಗೂ ಬೆಟಗೇರಿ ಬಡಾವಣೆ ಠಾಣೆಯ ಪರಶು ದೊಡ್ಡಮನಿ ಅಮಾನತುಗೊಂಡಿರುವ ಪೊಲೀಸ್ ಪೇದೆಗಳು. ಆ. 9ರಂದು ನಗರದ ಪ್ರತಿಷ್ಠಿತ ಖಾಸಗಿ ಹೋಟೆಲ್​ನಲ್ಲಿ ನಡೆಸಲಾಗುತ್ತಿದ್ದ ಜೂಜಾಟದ ಅಡ್ಡೆ ಮೇಲೆ ಇವರಿಬ್ಬರು ದಾಳಿ ನಡೆಸಿ, ಜೂಜಾಟಕ್ಕಿಟ್ಟಿದ್ದ ಹಣ ವಸೂಲಿ ಮಾಡಿದ್ದಾರೆ ಎನ್ನುವ ಆರೋಪವಿದೆ. ನಂತರ ಈ ಪ್ರಕರಣವನ್ನೇ ಮುಚ್ಚಿ ಹಾಕಲಾಗಿತ್ತು ಎನ್ನಲಾಗಿದೆ.

ಬಡಾವಣೆ ಠಾಣೆ ವ್ಯಾಪ್ತಿಗೆ ಬರುವ ಈ ಹೋಟೆಲ್​ಗೆ ನಗರ ಠಾಣೆಯ ಪೇದೆ ಹನುಮಂತ ಯಡಿಯಾಪುರ್ ಯಾಕೆ ದಾಳಿ ನಡೆಸಿದ್ರು ಎನ್ನೋ ವಿಚಾರ ಪೊಲೀಸ್ ವಲಯದಲ್ಲೇ ಅನುಮಾನಕ್ಕೆ ಎಡೆ ಮಾಡಿಕೊಟ್ಟಿತ್ತು. ಸದ್ಯ ಗದಗ ಎಸ್ಪಿ ಶ್ರೀನಾಥ್ ಜೋಶಿ ಈ ಇಬ್ಬರೂ ಪೇದೆಗಳನ್ನು ಅಮಾನತು ಮಾಡಿ ಆದೇಶ ಹೊರಡಿಸೋ ಮೂಲಕ ಎಲ್ಲಾ ಅನುಮಾನಗಳಿಗೆ ಫುಲ್ ಸ್ಟಾಪ್‌ ಇಟ್ಟಿದ್ದಾರೆ.