ಹುಬ್ಬಳ್ಳಿ:ಪ್ರಮೋದ್ ಮುತಾಲಿಕ್ ಹಿಂದೂ ಪರನೂ ಅಲ್ಲ, ಮುಸ್ಲಿಂ ಪರನೂ ಅಲ್ಲ. ಮುತಾಲಿಕ್ ಹೇಳಿದ ತಕ್ಷಣ ಯಾರೂ ಮುಸ್ಲಿಮರ ಬಳಿ ವಸ್ತುಗಳನ್ನು ಖರೀದಿ ಮಾಡೋದೇ ಇಲ್ವಾ?. ನನ್ನ ಜೊತೆ ಬನ್ನಿ ನಾನು ತೋರಿಸ್ತೀನಿ. ಅವರು ತಮ್ಮ ಬೇಳೆ ಬೇಯಿಸಿಕೊಳ್ಳೋಕೆ ಮಾತಾಡ್ತಾರೆ ಎಂದು ಜಮೀರ್ ಮಹಮ್ಮದ್ ಖಾನ್ ಟೀಕಿಸಿದರು.
ಹಲಾಲ್ ಕಟ್ ಬಗ್ಗೆ ಮಾತಾಡಿದ್ದು ಕೇವಲ ನಾಲ್ಕೈದು ಜನ ಮಾತ್ರ. ಹಿಂದೂಗಳು ನಾನು ಮುಸ್ಲಿಮರ ಬಳಿ ಖರೀದಿ ಮಾಡ್ತೀನಿ ಅಂತಾರೆ. ಆದರೆ ಕೆಲವರು ಮಾತ್ರ ಹಿಂದೂ-ಮುಸ್ಲಿಂ ಅಂತಿದ್ದಾರೆ. ಹಿಂದೂಗಳೇ ಇದನ್ನು ವಿರೋಧ ಮಾಡಿದ್ದಾರೆ. ನಾವು ಹಲಾಲ್ ತಿಂದೇ ತಿಂತೀವಿ ಅಂತಾ ಹಿಂದೂಗಳೇ ಹೇಳಿದ್ದಾರೆ. ನಾವು ಇಲ್ಲಿ ಅಣ್ಣ ತಮ್ಮಂದಿರ ಹಾಗಿದ್ದೇವೆ. ಯಾರೂ ಇದನ್ನು ಬದಲಿಸಲು ಮಾಡೋಕೆ ಆಗಲ್ಲ ಎಂದರು.
ಭಾರತ್ ಜೋಡೋದಿಂದ ಬಿಜೆಪಿಗೆ ಭಯ: ಭಾರತ್ ಜೋಡೋಗೆ ಈ ರೀತಿಯ ಬೆಂಬಲ ಸಿಗುತ್ತೆ ಎಂದು ಬಿಜೆಪಿ ನಿರೀಕ್ಷೆ ಮಾಡಿರಲಿಲ್ಲ. ಇದು ಬಿಜೆಪಿಯವರಿಗೆ ಸಹಿಸೋಕೆ ಆಗುತ್ತಿಲ್ಲ. ಕೇರಳದಲ್ಲಿ ರಾಹುಲ್ ಗಾಂಧಿ ಜೊತೆ 25 ಸಾವಿರ ಜನರಿದ್ದರು. ಇದನ್ನು ನೋಡಿ ಬಿಜೆಪಿಯವರು ಯಾವುದೋ ಯಾತ್ರೆ ಶುರು ಮಾಡಿದ್ದಾರೆ. ಮೊದಲೇ ಯಾಕೆ ಯಾತ್ರೆ ಮಾಡಲಿಲ್ಲ ಎಂದು ಜಮೀರ್ ಪ್ರಶ್ನಿಸಿದರು.