ಡ್ಯುಟಿ ಟೈಮ್‌ನಲ್ಲಿ ಬಸ್‌ ಕಂಡಕ್ಟರ್‌, ಡ್ರೈವರ್‌ ಜತೆ ಯುವತಿ ಡ್ಯಾನ್ಸ್‌.. ವಿಡಿಯೋ ವೈರಲ್​!

ಟಿಕ್​ ಟಾಕ್​ ಆ್ಯಪ್,​ ಯುವಕ-ಯುವತಿಯರ ಜೀವನದ ಒಂದು ಭಾಗವಾಗ್ಬಿಟ್ಟಿದೆ. ಹೋದಲ್ಲಿ ಬಂದಲ್ಲೆಲ್ಲಾ ಏನಾದರೊಂದು ಹೊಸ ವಿಡಿಯೋ ಮಾಡಿ ಶೇರ್​ ಮಾಡೋದು ಹವ್ಯಾಸವಾಗಿದೆ. ಇದೇ ಆ್ಯಪ್​ನಿಂದಾಗಿ ಈಗಾಗಲೇ ಹಲವಾರು ಅನಾಹುತಗಳು ಕೂಡಾ ಸಂಭವಿಸಿವೆ. ಅಶ್ಲೀಲ ದೃಶ್ಯ ಶೇರ್​ ಆಗುತ್ತಿವೆ ಎಂದು ಕೆಲದಿನಗಳ ಕಾಲ ಈ ಆ್ಯಪ್​ ಬ್ಯಾನ್​ ಮಾಡ್ಲಾಗಿತ್ತು.

ನವದೆಹಲಿ: ದಿನಕ್ಕೊಂದು ಹೊಸ ಚಾಲೆಂಜ್​ ಟಿಕ್​ ಟಾಕ್​ ಮೂಲಕ ಸೃಷ್ಟಿಯಾಗುತ್ತಿವೆ. ಇಲ್ಲೊಬ್ಬಳು ಯುವತಿ ದೆಹಲಿ ಸಾರಿಗೆ ನಿಗಮ(ಡಿಟಿಸಿ)ದ ಬಸ್​ನೊಳಗೆ ಸಿಬ್ಬಂದಿಯೊಂದಿಗೆ ಮಾಡಿದ ಡ್ಯಾನ್ಸ್​ ವಿಡಿಯೋ ಟಿಕ್​ಟಾಕ್​ನಲ್ಲಿ ವೈರಲ್​ ಆಗಿದೆ.

ಈ ವಿಡಿಯೋ ಈಗ ಬಸ್​ ಸಿಬ್ಬಂದಿಯನ್ನ ಸಂಕಷ್ಟಕ್ಕೆ ಸಿಲುಕಿಸಿದೆ. ಡಿಟಿಸಿಯ ಹರಿನಗರ ಡಿಪೋದ ಡ್ರೈವರ್​, ಕಂಡಕ್ಟರ್​ ಹಾಗೂ ಕ್ಲೀನರ್​ ಇದೇ ಜುಲೈ 12ರಂದು ಜನಕ್​ಪುರಿಯಲ್ಲಿ ಬಸ್​ ನಿಲ್ಲಿಸಿದ್ದಾರೆ. ಆಗ ಕಂಡಕ್ಟರ್‌-ಡ್ರೈವರ್‌ಗೆ ಸ್ನೇಹಿತೆ ಎಂದು ಹೇಳಲಾಗಿರುವ ಯುವತಿಯೊಬ್ಬಳು ಅವರೊಂದಿಗೆ ಡ್ಯಾನ್ಸ್​ ಮಾಡುತ್ತಾ ಟಿಕ್​ ಟಾಕ್​ ವಿಡಿಯೋ ಮಾಡಿದ್ದಾಳೆ. ಈ ವಿಡಿಯೋ ಎಲ್ಲೆಡೆ ವೈರಲ್​ ಆಗಿದೆ.

ಇದು ಡಿಟಿಸಿಯ ಹಿರಿಯ ಅಧಿಕಾರಿಯೊಬ್ಬರ ಗಮನಕ್ಕೂ ಬಂದಿದ್ದು, ಅವರು ಬಸ್​ ಕಂಡಕ್ಟರ್ ಒಬ್ಬ ಗುತ್ತಿಗೆ ನೌಕರ. ಆದ್ದರಿಂದ ಆತನ ಕರ್ತವ್ಯದ ಅವಧಿ ಮುಕ್ತಾಯಕ್ಕಾಗಿ ಶೋಕಾಸ್​ ನೋಟಿಸ್​ ನೀಡಲಾಗಿದೆ. ಇನ್ನೊಬ್ಬ ಬಸ್​ನ ಕ್ಲೀನರ್​ನನ್ನು ಪೋಷಕ ಇಲಾಖೆಗೆ ಕಳಿಸಲಾಗಿದೆ ಎಂದಿದ್ದಾರೆ.

ಬಸ್​ ಸಿಬ್ಬಂದಿ ಮೇಲೆ ಸರ್ಕಾರಿ​ ಸೇವೆಯನ್ನು ದುರ್ಬಳಕೆ ಮಾಡಿಕೊಂಡ ಆರೋಪ ಎದ್ದಿದೆ. ಅಲ್ಲದೆ ತಮ್ಮ ಕರ್ತವ್ಯದ ಸಮಯದಲ್ಲಿ ಯುವತಿಯೊಂದಿಗೆ ವಿಡಿಯೋ ಚಿತ್ರೀಕರಣದಲ್ಲಿ ಪಾಲ್ಗೊಂಡು ಕರ್ತವ್ಯ ನಿರ್ಲಕ್ಷಿಸಿದ್ದಾರೆ ಎಂದು ಅಧಿಕಾರಿ ಹೇಳಿದ್ದಾರೆ.