ವಾಯುವ್ಯ ಸಾರಿಗೆ ಸಂಸ್ಥೆಯಲ್ಲಿ ಡಕೋಟ ಬಸ್​ಗಳದ್ದೇ ಕಾರುಬಾರು: ಜೀವ ಕೈಲಿಡಿದು ಬಸ್​ ಹತ್ತುವ ಪ್ರಯಾಣಿಕರು

ವಾಯುವ್ಯ ಸಾರಿಗೆ ಸಂಸ್ಥೆಗೆ ಸೇರಿದ ಬಸ್​ಗಳಲ್ಲಿ ಸಾವಿರಕ್ಕೂ ಹೆಚ್ಚು ಬಸ್​ಗಳ ಅವಧಿ ಮುಗಿದಿದೆ. ಕೇಂದ್ರ ಸರ್ಕಾರದ ಹಳೆಯ ವಾಹನಗಳ ಗುಜರಿ ನೀತಿ ಅನ್ವಯ ಅವುಗಳನ್ನು ಗುಜರಿಗೆ ಹಾಕಬೇಕು. ಆದರೆ, ಗುಜರಿಗೆ ಹಾಕಬೇಕಾದ ಬಸ್ ಗಳಲ್ಲೇ ಸಾರಿಗೆ ಸಂಸ್ಥೆ ಪ್ರಯಾಣಿಕರಿಗೆ ಸೇವೆ ಒದಗಿಸುತ್ತಿದ್ದು, ಜನರ ಪ್ರಾಣದ ಜೊತೆ ಚೆಲ್ಲಾಡವಾಡುತ್ತಿದೆ.

ಹುಬ್ಬಳ್ಳಿ: 20 ವರ್ಷ ಹಳೆಯದಾದ ವಾಹನಗಳನ್ನು ಗುಜರಿಗೆ ಹಾಕುವ ಕಾನೂನನ್ನು ಕೇಂದ್ರ ಸರ್ಕಾರ ಜಾರಿಗೆ ತಂದಿದೆ. ಆದರೆ, ವಾಯುವ್ಯ ಸಾರಿಗೆ ಸಂಸ್ಥೆಯಲ್ಲಿ 10-15 ವರ್ಷಗಳ ಕಾಲ ಹತ್ತಾರು ಲಕ್ಷ ಕಿ.ಮೀ. ಕ್ರಮಿಸಿರುವ ಹಳೆಯ ವಾಹನಗಳು‌ ಇನ್ನೂ ರಸ್ತೆಗಿಳಿಯುತ್ತಿವೆ.

ವಾಯುವ್ಯ ಕರ್ನಾಟಕ ಸಾರಿಗೆ ಸಂಸ್ಥೆಯಲ್ಲಿ ಸುಮಾರು ಎರಡೂವರೆ ಸಾವಿರ ಬಸ್​ಗಳು ಗುಜರಿ ಸೇರುವ ಸಮಯ ಬಂದಿದ್ದರೂ ಕೂಡ ಈಗಲೂ ಅದೇ ಬಸ್​ಗಳಲ್ಲಿ ಪ್ರಯಾಣಿಕರ ಓಡಾಟಕ್ಕೆ ಬಳಸಲಾಗುತ್ತಿದೆ. ಹೀಗಾಗಿ ಈ ಬಸ್​ಗಳಲ್ಲಿ ಓಡಾಡೋ ಪ್ರಯಾಣಿಕರು ಜೀವ ಕೈಲಿಡಿದು ಪ್ರಯಾಣ ಮಾಡುವ ಸಂದರ್ಭ ಎದುರಾಗಿದೆ. ವಾಯುವ್ಯ ಸಾರಿಗೆ ಸಂಸ್ಥೆಯ ಒಟ್ಟು 5 ಸಾವಿರ ಬಸ್​ಗಳ ಪೈಕಿ 2500 ಬಸ್​ಗಳ ಅವಧಿ ಮುಗಿದಿದೆ.

ಹತ್ತಕ್ಕೂ ಹೆಚ್ಚು ಲಕ್ಷ ಕಿ.‌ಮೀ. ದೂರ ಕ್ರಮಿಸಿರುವ ಬಸ್​ಗಳು ವಾಯುವ್ಯ ಸಾರಿಗೆ ನಿಗಮದಲ್ಲಿ ಸಾವಿರಾರು ಇವೆ. ಏಳೂವರೆ ಲಕ್ಷ ಕಿ.ಮೀ. ಓಡಿದ ಬಸ್​ಗಳನ್ನ ಗುಜರಿಗೆ ಹಾಕಬೇಕಾಗಿದ್ರು ಅದೇ ಬಸ್​​ಗಳಲ್ಲೆ ಪ್ರಯಾಣಿಕರಿಗೆ ಸೇವೆ ಒದಗಿಸಲಾಗುತ್ತಿದೆ. ಗುಜರಿ ಹಾಕಬೇಕಾಗಿರುವ ಬಸ್​​ಗಳನ್ನ ಮತ್ಯಾಕೆ ರೋಡಿಗೆ ಇಳಿಸುತ್ತಿದ್ರೀ ಅಂತಾ ವಾಯುವ್ಯ ಸಾರಿಗೆ ಸಂಸ್ಥೆಯ ಅಧ್ಯಕ್ಷರನ್ನ ಕೇಳಿದ್ರೆ, ಹೊಸ ಬಸ್​ಗಳಿಗಾಗಿ ಸರ್ಕಾರಕ್ಕೆ ಮನವಿ ಮಾಡಿದ್ದೇವೆ.ಲಾಕ್​ಡೌನ್​ ನಷ್ಟ ಇರುವ ಕಾರಣ ವಿಳಂಬವಾಗುತ್ತಿದೆ ಎನ್ನುತ್ತಿದ್ದಾರೆ.

ಈ ಡಕೋಟಾ ಎಕ್ಸ್​ಪ್ರೆಸ್​​ ಬಸ್​ಗಳನ್ನ ಇಟ್ಟುಕೊಂಡು ವಾಯುವ್ಯ ಸಾರಿಗೆ ಸಂಸ್ಥೆ ಬಸ್ ಸೇವೆ ನೀಡುತ್ತಿದೆ. ಅಲ್ಲದೇ ಹೊಸ ಬಸ್​ಗಳನ್ನ ಒದಗಿಸಿ ಅಂತಾ‌ ಸರ್ಕಾರಕ್ಕೆ ಪತ್ರ ಬರೆದ್ರೂ ಸಾರಿಗೆ ಸಚಿವರು ಮಾತ್ರ ವಾಯುವ್ಯ ಸಾರಿಗೆ ಸಂಸ್ಥೆಗೆ ಹೊಸ ಬಸ್​ಗಳನ್ನ ನೀಡ್ತಾ ಇಲ್ಲ. ಹೀಗಾಗಿ ಒಂದೆಡೆ ನಷ್ಟ ಇನ್ನೊಂದೆಡೆ ಪ್ರಯಾಣಿಕರ ಪ್ರಾಣದ ಜೊತೆ ಚೆಲ್ಲಾಡವಾಡುತ್ತಲೇ ಸೇವೆ ನೀಡಬೇಕಾದ ಪರಿಸ್ಥಿತಿ ವಾಯುವ್ಯ ಸಾರಿಗೆ ಸಂಸ್ಥೆ ಬಂದೊದಗಿದೆ.