ನಗರ ಹಸಿರೀಕರಣ ಯೋಜನೆಯಲ್ಲಿ ಅವ್ಯವಹಾರ: ನಿವೃತ್ತ ಆರ್​ಎಫ್​ಒ ಸೇರಿ ಆರೋಪಿಗಳ ಬಂಧನ

ಪ್ರಕರಣದಲ್ಲಿ ಆರೋಪ ಮೇಲ್ನೋಟಕ್ಕೆ ಸಾಬೀತಾಗಿದ್ದರಿಂದ ಸಕ್ಷಮ ಪ್ರಾಧಿಕಾರದ ಅನುಮತಿ ಪಡೆದು ಆರ್​ಎಫ್​ಒ ಸಿ.ಹೆಚ್.ಮಾವಿನತೋಪ ಮತ್ತು ಗುತ್ತಿಗೆದಾರರ ವಿರುದ್ಧ ದೂರು ದಾಖಲಿಸಿ ಬಂಧಿಸಲಾಗಿದೆ.

ಹುಬ್ಬಳ್ಳಿ:ನಗರ ಹಸಿರೀಕರಣ ಯೋಜನೆಯಲ್ಲಿ ಅವ್ಯವಹಾರ ಆರೋಪದಡಿ ಆಗಿನ ಹುಬ್ಬಳ್ಳಿ ಆರ್​ಎಫ್​ಒ ವಿರುದ್ಧ ಧಾರವಾಡ ಎಸಿಬಿ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು, ಆರೋಪಿಗಳನ್ನು ಬಂಧಿಸಲಾಗಿದೆ.

2014-15 ಮತ್ತು 2015-16 ನೇ ಸಾಲಿನ ನಗರ ಹಸಿರೀಕರಣ ಯೋಜನೆಯಡಿ ಹುಬ್ಬಳ್ಳಿ ಅರಣ್ಯ ವಲಯದಲ್ಲಿ ಭಾರಿ ಪ್ರಮಾಣದ ಅವ್ಯವಹಾರ ನಡೆದಿದ್ದು, ಸಂಬಂಧಿಸಿದವರ ವಿರುದ್ದ ಕ್ರಮ ಜರುಗಿಸುವಂತೆ ಕೋರಿ ಸಲ್ಲಿಸಿದ್ದ ಅರ್ಜಿಯನ್ನು ವಿಚಾರಣೆ ನಡೆಸಿ, ಆರೋಪ ಮೇಲ್ನೋಟಕ್ಕೆ ಸಾಬೀತಾಗಿದ್ದರಿಂದ ಸಕ್ಷಮ ಪ್ರಾಧಿಕಾರದ ಅನುಮತಿ ಪಡೆದು ಆರ್​ಎಫ್​ಒ ಸಿ.ಹೆಚ್. ಮಾವಿನತೋಪ ಮತ್ತು ಗುತ್ತಿಗೆದಾರರ ವಿರುದ್ಧ ದೂರು ದಾಖಲಿಸಿ ಬಂಧಿಸಲಾಗಿದೆ.

ಎಸಿಬಿಯಿಂದ ಪತ್ರಿಕಾ ಪ್ರಕಟನೆ

ಇದನ್ನೂ ಓದಿ: ಟಿಪ್ಪರ್​ ಡಿಕ್ಕಿ ಹೊಡೆಸಿ ಕಾಂಗ್ರೆಸ್​​​​ ಮುಖಂಡನ ಕೊಲೆ ಯತ್ನ; ಎಂಎಲ್‌ಸಿ ಪುತ್ರನ ವಿರುದ್ಧ ಆರೋಪ

ಎಸಿಬಿ ಉತ್ತರ ವಲಯ ಪೊಲೀಸ್ ಅಧೀಕ್ಷಕ ಬಿ.ಎಸ್ ನೇಮಗೌಡ ಮಾರ್ಗದರ್ಶನದಲ್ಲಿ ಪ್ರಕರಣದ ತನಿಖೆ ನಡೆಸಿದ ಡಿಎಸ್​ಪಿ ಎಲ್.ವೇಣುಗೋಪಾಲ್, ತನಿಖಾ ಸಹಾಯಕ ಶಿವಾನಂದ ಕೆ.ಕೆಲವಡಿ ಅವರು, ನಗರ ಹಸಿರೀಕರಣ ಯೋಜನೆಯಡಿ ಸುಮಾರು 1 ಕೋಟಿ 20 ಲಕ್ಷ ರೂ. ಹಣ ದುರುಪಯೋಗವಾದ ಬಗ್ಗೆ ಸಾಕ್ಷ್ಯಾಧಾರಗಳನ್ನು ಸಂಗ್ರಹಿಸಿದ್ದು, ಇಂದು ಸಿ.ಹೆಚ್.ಮಾವಿನತೋಪ, ದತಾತ್ರೇಯ ಪಾಟೀಲ, ವಿನಾಯಕ ಪಾಟೀಲ ಸೇರಿದಂತೆ ಗುತ್ತಿಗೆದಾರರನ್ನು ಬಂಧಿಸಿ ನ್ಯಾಯಾಲಯಕ್ಕೆ ಹಾಜರುಪಡಿಸಿದ್ದಾರೆ. ನ್ಯಾಯಾಲಯವು ಆರೋಪಿಗಳನ್ನು ನ್ಯಾಯಾಂಗ ಬಂಧನಕ್ಕೆ ಒಪ್ಪಿಸಿ ಆದೇಶಿಸಿದ್ದು, ಪ್ರಕರಣದ ತನಿಖೆ ಮುಂದುವರೆಯುತ್ತಿದೆ.