ನೂತನ ಸಂಸತ್​ ಭವನ ಉದ್ಘಾಟಿಸುವಾಗ ರಾಷ್ಟ್ರಪತಿ ಆದಿವಾಸಿ, ವಿಧವೆ ಎಂಬ ಕಾರಣಕ್ಕೆ ಕರೆದಿಲ್ಲ: ಸಚಿವ ಸಂತೋಷ್​ ಲಾಡ್

ನೂತನ ಸಂಸತ್ ಭವನಕ್ಕೆ ರಾಷ್ಟ್ರಪತಿಯವರನ್ನು​ ಯಾಕೆ ಕರೆದಿಲ್ಲ ಎಂದು ಕಾರ್ಮಿಕ ಸಚಿವ ಸಂತೋಷ್​ ಲಾಡ್​ ಪ್ರಶ್ನಿಸಿದ್ದಾರೆ.

ಹುಬ್ಬಳ್ಳಿ : ಸೆಲೆಬ್ರಿಟಿಗಳನ್ನು ಕರೆದುಕೊಂಡು ಬಂದು ಮಹಿಳಾ ಮೀಸಲಾತಿ ಬಿಲ್​ ಪಾಸ್ ಮಾಡಿದ್ರು. ನೂತನ ಸಂಸತ್​ ಭವನ ಉದ್ಘಾಟನೆ ವೇಳೆ ರಾಷ್ಟ್ರಪತಿ ಎಲ್ಲಿದ್ರು?. ಆ ಮಹಿಳೆ ಆದಿವಾಸಿ, ವಿಧವೆ ಅನ್ನೋ ಕಾರಣಕ್ಕೆ ಅವರನ್ನು ಕರೆದಿಲ್ಲ ಎಂದು ಕಾರ್ಮಿಕ ಸಚಿವ ಸಂತೋಷ್​ ಲಾಡ್ ಆರೋಪಿಸಿದ್ದಾರೆ.

ನಗರದಲ್ಲಿಂದು ಮಾಧ್ಯಮದವರೊಂದಿಗೆ ಮಾತನಾಡಿದ ಅವರು, ಸೌತ್​ ಇಂಡಿಯನ್ ಹಿರೋಯಿನ್​ಗಳನ್ನು ಕರೆದುಕೊಂಡು ಬಂದು ಮಹಿಳಾ ಬಿಲ್ ಪಾಸ್ ಮಾಡಿ ಪ್ರಚಾರ ತೆಗೆದುಕೊಂಡ್ರಿ. ರಾಷ್ಟ್ರಪತಿಯವರು ಮಹಿಳೆ ತಾನೆ. ಅವರನ್ನು ಯಾಕೆ ನೂತನ ಸಂಸತ್ ಭವನಕ್ಕೆ ಕರೆದುಕೊಂಡು ಬರಲಿಲ್ಲ. ಇದಕ್ಕೆ ಕಾರಣ ಹೇಳಬೇಕು ತಾನೆ?. ರಾಷ್ಟ್ರಪತಿ ದ್ರೌಪದಿ ಮುರ್ಮು ಅವರು ದೇಶದ ಮೊದಲ ಪ್ರಜೆ ಅಲ್ವಾ?. ಬಿಜೆಪಿಯರಿಗೆ ಎಂತಹ ಮನಸ್ಥಿತಿ ಇದೆ ನೋಡಿ. ಅದನ್ನು ಅವರು ಒಪ್ಪಿಕೊಳ್ಳಲ್ಲ. ಮಹಿಳಾ ಬಿಲ್ ಅದು ನಮ್ಮದೆ, ಅದಕ್ಕೆ ಹೊಸ ಹೆಸರು ಇಟ್ರು ಎಂದು ಹೇಳಿದರು.

ಕಾಂಗ್ರೆಸ್​ನ ಡಿಎನ್​ಎ ನಲ್ಲಿ ಚಿಲ್ಲರೆ ರಾಜಕಾರಣ ಇದೆ ಎಂಬ ಕೇಂದ್ರ ಸಚಿವ ಪ್ರಹ್ಲಾದ್ ಜೋಶಿ ಮಾತಿಗೆ ತಿರುಗೇಟು ನೀಡಿದ ಸಂತೋಷ್​ ಲಾಡ್, ಅವರ ನೋಟು ಎಲ್ಲಿ ಹೋಯ್ತು. 75 ವರ್ಷ ನಾವೇ ಚಿಲ್ಲರೆ ಮೇಲೆ ಕಟ್ಟಿದ ಬುನಾದಿ ಮೇಲೆ ಇವರು ನೋಟು ಮಾಡಿದ್ರು. ಇವರ ನೋಟು ಎಲ್ಲಿ ಹೋಯ್ತು‌. ನೀವು ಅವರನ್ನು 2000 ರೂ. ನೋಟು ಎಲ್ಲಿ ಹೋಯ್ತು ಎಂದು ಪ್ರಶ್ನೆ ಕೇಳಬೇಕು ಎಂದರು.

75 ವರ್ಷದಲ್ಲಿ ಎಷ್ಟು ಅಭಿವೃದ್ಧಿ ಆಗಿದೆ. ಇವರು 9 ವರ್ಷದಲ್ಲಿ ಏನು ಅಭಿವೃದ್ಧಿ ಮಾಡಿದ್ದಾರೆ. ಜೋಶಿ ಅವರು ಸಾಲ‌ಮಾಡಿ ದೇಶ ಅಭಿವೃದ್ಧಿ ಅಂತಾರೆ. ಚಿಲ್ಲರೆ ಅದು ಇದು ಎಂದು ಜೋಶಿ ಹೇಳ್ತಾರೆ. ಸಿಎಜಿ ಪ್ರಕಾರ ಏನು ಕೆಲಸ ಆಗಿವೆಯೋ ಅದರಲ್ಲಿ ಭ್ರಷ್ಟಾಚಾರ ಆಗಿದೆ. 18 ಕೋಟಿ ಇರುವ ಹೆದ್ದಾರಿ 250 ಕೋಟಿಯಾಗಿದೆ. ಐದು ಹೊಸ ಕಾರ್ಯಕ್ರಮದಲ್ಲಿ ಹಗರಣ ಇದೆ. ರಾಮ ಮಂದಿರದಲ್ಲಿ ಹಗರಣ ಇದೆ. ಬೇಕಿದ್ರೆ ಜೋಶಿ ಚರ್ಚೆಗೆ ಬರಲಿ ಎಂದು ಸಚಿವ ಲಾಡ್ ಸವಾಲು ಹಾಕಿದರು. ನಾವು 165 ಕೋಟಿ ಸಾಲದ ಬಗ್ಗೆ ಕೇಳುತ್ತಿದ್ದೇವೆ. ಇದು ದೇಶದ ಜನರ ಹಣ ಎಂದು ಹೇಳಿದರು.

ಸಿಎಂ ಅವರಿಗೆ ಎಲ್ಲವೂ ಮಾಹಿತಿ ಇದೆ : ಕಾವೇರಿ ನೀರು ತಮಿಳುನಾಡಿಗೆ ಬಿಟ್ಟ ವಿಚಾರಕ್ಕೆ ಸಂಬಂಧಿಸಿದಂತೆ ಧಾರವಾಡದಲ್ಲಿ ಸಚಿವ ಸಂತೋಷ್ ಲಾಡ್​ ಪ್ರತಿಕ್ರಿಯಿಸಿದ್ದು, ಸಿಎಂ ಅವರಿಗೆ ಎಲ್ಲವೂ ಮಾಹಿತಿ ಇದೆ. ನಾವು ತಡೆ ಹಿಡಿಯಲು ಸಾಕಷ್ಟು ಪ್ರಯತ್ನ ಮಾಡಿದ್ದೇವೆ. ಆದರೆ, ಸುಪ್ರೀಂಕೋರ್ಟ್ ಆದೇಶವನ್ನು ಪಾಲನೆ ಮಾಡಬೇಕು ಎಂದು ಸಚಿವ ಲಾಡ್ ಹೇಳಿದರು.

ಇದನ್ನೂ ಓದಿ:10 ವರ್ಷದಲ್ಲಿ ಮೋದಿ‌ ದೇಶವನ್ನು ದಿವಾಳಿ ಮಾಡಿದ್ದಾರೆ: ಸಚಿವ ಸಂತೋಷ್ ಲಾಡ್