ಲಾಕ್​​​ಡೌನ್ ಎಫೆಕ್ಟ್: ಪುಸ್ತಕ ಮಾರಾಟವಿಲ್ಲದೆ ಕಂಗಾಲಾದ ಪುಸ್ತಕ ವ್ಯಾಪಾರಿಗಳು

ಕೊರೊನಾ ಲಾಕ್​ಡೌನ್​ನಿಂದಾಗಿ ಅವಳಿ ನಗರಗಳಲ್ಲಿರುವ ಪುಸ್ತಕ ಮಳಿಗೆಗಳ ವ್ಯಾಪಾರಸ್ಥರು ನಷ್ಟ ಅನುಭವಿಸುತ್ತಿದ್ದಾರೆ. ಈ ಸಂಬಂಧ ಸರ್ಕಾರಕ್ಕೆ ಇತ್ತ ಗಮನ ಹರಿಸುವಂತೆ ವಿನಂತಿಸಿಕೊಂಡಿದ್ದಾರೆ.

ಹುಬ್ಬಳ್ಳಿ:ಕೊರೊನಾ ಎಲ್ಲಾ ವರ್ಗದ ಜನರ ಮೇಲೂ ಕೆಟ್ಟ ಪರಿಣಾಮ ಬೀರಿದ್ದು, ಇದಕ್ಕೆ ಪುಸ್ತಕ ವ್ಯಾಪಾರಿಗಳು ಹೊರತಾಗಿಲ್ಲ. ಲಾಕ್​​​ಡೌನ್​​​ನಿಂದ ಪುಸ್ತಕ ವ್ಯಾಪಾರಿಗಳು ಸಾಕಷ್ಟು ನಷ್ಟ ಅನುಭವಿಸುವಂತಾಗಿದೆ.

ಅವಳಿನಗರದಲ್ಲಿ ಸುಮಾರು 40ಕ್ಕೂ ಹೆಚ್ಚು ಪುಸ್ತಕ ವ್ಯಾಪಾರಸ್ಥರಿದ್ದಾರೆ. ಇಂದಿನ ಡಿಜಿಟಲ್ ಯುಗದಿಂದಾಗಿ ಪುಸ್ತಕಗಳನ್ನೇ ನಂಬಿಕೊಂಡು ಬದುಕುತ್ತಿರುವ ಕುಟುಂಬಗಳು ಅಕ್ಷರಶಃ ಮೂಲೆ ಸೇರಿದ್ದು, ಕಣ್ಣೀರಿನಲ್ಲಿ ಕೈ ತೊಳೆಯುತ್ತಿವೆ‌. ಕೊರೊನಾದಿಂದ ಶಾಲಾ- ಕಾಲೇಜುಗಳು ಬಂದ್ ಆಗಿದ್ದು, ವ್ಯಾಪಾರ- ವಹಿವಾಟು ಇಲ್ಲದೇ ಪುಸ್ತಕದ ಅಂಗಡಿಗಳಿಗೆ ನಷ್ಟ ಉಂಟಾಗಿದೆ. ಲಾಕ್​​​ಡೌನ್ ಸಂದರ್ಭದಲ್ಲಿ ಪುಸ್ತಕ ಅಂಗಡಿ ತೆರೆಯಲು ಸರ್ಕಾರ ಅನುಮತಿ‌ ನೀಡಿರಲಿಲ್ಲ. ಇದರಿಂದ ಹಲವು ತರಗತಿಗಳ ಪುಸ್ತಕಗಳು ಮಾರಾಟವಾಗದೆ ಹಾಳಾಗಿ ಹೋಗಿವೆ ಎಂದು ಅಳಲು ತೋಡಿಕೊಳ್ಳುತ್ತಿದ್ದಾರೆ.

ಲಾಕ್​ಡೌನ್​ನಿಂದ ಪುಸ್ತಕ ವ್ಯಾಪಾರಿಗಳಿಗೆ ನಷ್ಟ

ಇನ್ನೇನು ಶಾಲೆಗಳು ಪ್ರಾರಂಭವಾಗುತ್ತವೆ ಎಂದು ಕೈಯಲ್ಲಿರುವ ಹಣ ಹಾಗೂ ಸಾಲ ಪಡೆದು ಅಂಗಡಿಗಳಿಗೆ ಮತ್ತಷ್ಟು ಬಂಡವಾಳ ಹಾಕಿದ್ದಾರೆ. ಆದರೆ ಕಿಲ್ಲರ್ ಕೊರೊನಾ ಹಾವಳಿ ಪುಸ್ತಕ ವ್ಯಾಪಾರಸ್ಥರ ಬದುಕಿನಲ್ಲಿ ಬಿರುಗಾಳಿ ಎಬ್ಬಿಸಿದ್ದು, ಸಾಕಷ್ಟು ನಷ್ಟ ಸಂಭವಿಸಿದೆ.