ಕೋವಿಡ್‌ 2ನೇ ಅಲೆ: ಸರ್ಕಾರಿ ಆಸ್ಪತ್ರೆಗಳ ಅವಿರತ ಶ್ರಮ, ಬೇಕಿದೆ ಸಾರ್ವಜನಿಕರ ಸಹಕಾರ

ಕಳೆದ ವರ್ಷಾರಂಭದಲ್ಲಿ ದೇಶಕ್ಕೆ ವಕ್ಕರಿಸಿದ ಮಹಾಮಾರಿ ಕೊರೊನಾ ಕೊಂಚ ತಣ್ಣಗಾಗುವಷ್ಟರಲ್ಲೇ ಕೋವಿಡ್​ 2ನೇ ಅಲೆ ಆರ್ಭಟಿಸುತ್ತಿದೆ. ಸೋಂಕಿತರಿಗೆ ಚಿಕಿತ್ಸೆ ನೀಡಲು ಸರ್ಕಾರಿ ಆಸ್ಪತ್ರೆಗಳ ಜತೆ ಖಾಸಗಿ ಆಸ್ಪತ್ರೆಗಳೂ ಕೈಜೋಡಿಸಿವೆ. ಆದ್ರೆ ಕೊರೊನಾ ಪ್ರಕರಣಗಳು ಎಗ್ಗಿಲ್ಲದೇ ಏರುತ್ತಿರುವುದರಿಂದ ಸರ್ಕಾರಿ ಆಸ್ಪತ್ರೆಗಳಲ್ಲಿ ಕಾರ್ಯದೊತ್ತಡವೂ ಹೆಚ್ಚಾಗಿದೆ. ಆದ್ರೂ ರೋಗವನ್ನು ಹೊಡೆದೋಡಿಸಲು ಸರ್ಕಾರಿ ಆಸ್ಪತ್ರೆಗಳಿಂದ ಶತಪ್ರಯತ್ನ ನಡೆಯುತ್ತಿದೆ. ಈ ಬಗ್ಗೆ ಒಂದು ವಿಶೇಷ ವರದಿ.

ಹುಬ್ಬಳ್ಳಿ/ಬಳ್ಳಾರಿ:ದೇಶಾದ್ಯಂತ ಕೋವಿಡ್​ ಎರಡನೇ ಅಲೆಯಾರ್ಭಟ ಜೋರಾಗಿದೆ. ಸೋಂಕಿತರಿಗೆ ಪೂರಕ ಚಿಕಿತ್ಸೆ ನೀಡಲು ಸರ್ಕಾರಿ, ಖಾಸಗಿ ಆಸ್ಪತ್ರೆಗಳು ಭಗೀರಥ ಪ್ರಯತ್ನ ಮಾಡ್ತಿವೆ.

ಕೊರೊನಾ ವಿರುದ್ಧದ ಸಮರಕ್ಕೆ ಹುಬ್ಬಳ್ಳಿಯ ಕಿಮ್ಸ್ ಸರ್ವ ಸನ್ನದ್ಧವಾಗಿದೆ. ಇಲ್ಲಿ ಸೋಂಕಿತರಿಗೆಂದೇ 100 ಐಸಿಯು ಬೆಡ್‌ ಹಾಗೂ 200 ಆಕ್ಸಿಜನ್​ಯುಕ್ತ ಬೆಡ್​ಗಳು ಮೀಸಲಾಗಿವೆ. ಜತೆಗೆ 70 ವೆಂಟಿಲೇಟರ್​ ವ್ಯವಸ್ಥೆಯನ್ನೂ ಮಾಡಲಾಗಿದೆ. ಇದ್ರ ಜೊತೆಗೆ 20 ಕೆಎಲ್​​ ಸಾಮರ್ಥ್ಯದ ಆಕ್ಸಿಜನ್ ಘಟಕವೂ ಇಲ್ಲಿದೆ. ಸೋಂಕಿತರ ಸಂಖ್ಯೆ ಹೆಚ್ಚಾದ್ರೆ ಬೆಡ್​ಗಳನ್ನು 500 ರಿಂದ 600 ರವರೆಗೆ ಹೆಚ್ಚಿಸುವ ಯೋಜನೆಯಿದೆ. ಸೋಂಕಿತರಿಗೆ ಯಾವುದೇ ಸಮಸ್ಯೆ ಆಗದಂತೆ ನೋಡಿಕೊಳ್ಳುವುದು ಇಲ್ಲಿನ ಉದ್ದೇಶ.

ಬಳ್ಳಾರಿಯ ಎಲ್ಲಾ ಸರ್ಕಾರಿ ಆಸ್ಪತ್ರೆಗಳಲ್ಲಿ ಪ್ರತ್ಯೇಕ ಕೋವಿಡ್ ವಾರ್ಡ್​​ಗಳನ್ನು ಮಾಡಲಾಗಿದೆ. ರೋಗಿಗಳಿಗೆ ಅಗತ್ಯ ಹಾಸಿಗೆಗಳ ವ್ಯವಸ್ಥೆ ಮಾಡಲಾಗಿದೆ. ಇಲ್ಲಿರುವ 1,017 ಹಾಸಿಗೆಗಳ ಪೈಕಿ 180 ಐಸಿಯು ವಾರ್ಡ್​​ಗಳಾಗಿವೆ. ಹೋಂ ಐಸೊಲೇಷನ್​ಗೆ ಹೆಚ್ಚು ಒತ್ತು ನೀಡಿದ್ದು, ಅಗತ್ಯವೆನಿಸಿದವರಿಗೆ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಒದಗಿಸಲಾಗ್ತಿದೆ.

ಇದನ್ನೂ ಓದಿ:ರಾಜ್ಯದ ಜನತೆಗೆ ಬೇಕಿದೆ ಸುಸಜ್ಜಿತ ಆಟದ ಮೈದಾನಗಳ ವ್ಯವಸ್ಥೆ

ಕೋವಿಡ್‌ ಎರಡನೇ ಅಲೆ ನಿರ್ಮೂಲನೆ ಮಾಡಲು ಸರ್ಕಾರಿ ಆಸ್ಪತ್ರೆಗಳು ಅವಿರತವಾಗಿ ಶ್ರಮಿಸುತ್ತಿವೆ. ಆದ್ರೆ ಪ್ರಕರಣಗಳು ಹೆಚ್ಚಾಗಿ ಸಾಕಷ್ಟು ಅವಾಂತರ ಸೃಷ್ಟಿಸಿದೆ. ಹಾಗಾಗಿ ಕೊರೊನಾ ನಿಯಂತ್ರಿಸಲು ಸರ್ಕಾರದ ಜತೆ ಸಾರ್ವಜನಿಕರ ಸಹಕಾರವೂ ಅಗತ್ಯ.