ಚಾಲಕರ ಕೊರತೆಯಿಂದ ಸಂಕಷ್ಟದಲ್ಲಿದೆ ಗೂಡ್ಸ್ ಟ್ರಾನ್ಸ್​​​ಪೋರ್ಟ್ ಉದ್ಯಮ

ಲಾರಿ ಡ್ರೈವರ್​ಗಳ ಕೊರತೆಯೂ ಕೂಡ ಲಾರಿ ಮಾಲೀಕರನ್ನು ಹೈರಾಣಾಗಿಸಿದೆ‌. ಲಾರಿ ಚಾಲಕನ ಕೆಲಸವು ಸುದೀರ್ಘ ಪ್ರಯಾಣದ್ದಾಗಿದ್ದು, ಕುಟುಂಬದಿಂದ ದೂರವಿರುವುದು ಮತ್ತು ಹಗಲು-ರಾತ್ರಿ ಗಾಡಿ ಓಡಿಸುವುದು, ಮಾರ್ಗಮಧ್ಯೆ ಆಹಾರ-ನೀರಿನ ಕೊರತೆ ಸೇರಿದಂತೆ ಕೆಲ ಸಮಸ್ಯೆ ಇದೆ. ಬೇರೆ ಕೆಲಸದೆಡೆ ಮೊರೆ ಹೋಗುತ್ತಿರುವುದರಿಂದ ಲಾರಿ ಚಾಲಕರ ಕೊರತೆಯಿದೆ.

ಹುಬ್ಬಳ್ಳಿ: ಅಗತ್ಯ ವಸ್ತುಗಳನ್ನು ಒಂದೆಡೆಯಿಂದ ಮತ್ತೊಂದೆಡೆಗೆ ತಲುಪಿಸುವ ಕಾರ್ಯವನ್ನು ಗೂಡ್ಸ್ ಟ್ರಾನ್ಸ್​​​ಪೋರ್ಟ್ ಉದ್ಯಮ ಮಾಡುತ್ತಿದ್ದು, ಇದೀಗ ಸಂಕಷ್ಟಕ್ಕೆ ಸಿಲುಕಿದೆ. ಕೊರೊನಾ - ಲಾಕ್​​​ಡೌನ್ ಎಫೆಕ್ಟ್​​, ಇಂಧನ ಬೆಲೆ ಏರಿಕೆ ಮತ್ತು​​ ಲಾರಿ ಚಾಲಕರ ಕೊರತೆಯೇ ಕಾರಣ ಎಂಬ ವಿಚಾರ ಬೆಳಕಿಗೆ ಬಂದಿದೆ.

ಕೋವಿಡ್ ಭೀತಿ, ಇಂಧನ ಬೆಲೆ ಏರಿಕೆ, ಲಾರಿ ಚಾಲಕರ ಕೊರತೆ ಸೇರಿದಂತೆ ವಾಹನದ ಬಿಡಿಭಾಗಗಳ ಮೇಲೆ ಅತಿ ಹೆಚ್ಚಿನ ಜಿಎಸ್​ಟಿ ವಿಧಿಸುತ್ತಿರುವುದರಿಂದ ನಿರಂತರ ನಷ್ಟವನ್ನು ಲಾರಿ ಮಾಲೀಕರು ಅನುಭವಿಸುತ್ತಿದ್ದಾರೆ‌. ಡೀಸೆಲ್ ಬೆಲೆ ಹೆಚ್ಚಾದರೂ ಕೂಡ ಸಾರಿಗೆ ವೆಚ್ಚ ಹೆಚ್ಚಿಸಲು ಸಾಧ್ಯವಾಗದ ಪರಿಸ್ಥಿತಿ ಇದೆ.

ಸಾರಿಗೆ ವೆಚ್ಚ ಹೆಚ್ಚಿಸಿದ್ರೆ ಗ್ರಾಹಕರು ತಮ್ಮ ಸರಕು ಸಾಗಿಸಲು ಲಾರಿಗಳನ್ನು ಬಳಸಲು ಹಿಂದೇಟು ಹಾಕುತ್ತಾರೆ. ಡೀಸೆಲ್ ಬೆಲೆ ಮತ್ತು ವಾಹನದ ಬಿಡಿಭಾಗಗಳ ಬೆಲೆ ಹೆಚ್ಚಾಗಿರುವುದರಿಂದ ಫೈನಾನ್ಸ್ ಮತ್ತು ಬ್ಯಾಂಕುಗಳಲ್ಲಿ ಸಾಲ ಪಡೆದು ಲಾರಿಗಳನ್ನು ನಿರ್ವಹಿಸುವುದು ಕಷ್ಟಕರವಾಗಿದೆ. ಕಂತುಗಳನ್ನು ಪಾವತಿಸಲು ಆಗುತ್ತಿಲ್ಲ. ದೇಶಕ್ಕೆ ಕೋವಿಡ್​ ವಕ್ಕರಿಸಿದಾಗಿನಿಂದಲೂ ಲಾರಿಗಳ ಸಂಚಾರ ಅಷ್ಟಕಷ್ಟೆ ಅನ್ನುವಂತಾಗಿದೆ. ಫೈನಾನ್ಸ್, ಬ್ಯಾಂಕ್‌ನವರು ಸಾಲದ ಕಂತುಗಳನ್ನು ಪಾವತಿಸುವಂತೆ ಒತ್ತಡ ಹೇರುತ್ತಿದ್ದಾರೆ. ಇದರಿಂದ ಲಾರಿ ಮಾಲೀಕರು ಪರದಾಡುವಂತಾಗಿದೆ.

ಇದನ್ನೂ ಓದಿ:ಮಂಗಳೂರು: ಸಂಕಷ್ಟದಲ್ಲಿದೆ ಗೂಡ್ಸ್ ಟ್ರಾನ್ಸ್​​​ಪೋರ್ಟ್ ಉದ್ಯಮ

ಇನ್ನೂ ಸರಕು ಸಾಗಣೆಯ ಲಾರಿಗಳನ್ನು ಓಡಿಸಲು ನುರಿತ ಚಾಲಕರ ಬೇಡಿಕೆ ಇದೆ. ಆದ್ರೆ ಲಾರಿ ಡ್ರೈವರ್​ಗಳ ಕೊರತೆಯೂ ಕೂಡ ಲಾರಿ ಮಾಲೀಕರನ್ನು ಹೈರಾಣಾಗಿಸಿದೆ‌. ಲಾರಿ ಚಾಲಕನ ಕೆಲಸವು ಸುದೀರ್ಘ ಪ್ರಯಾಣದ್ದಾಗಿದ್ದು, ಕುಟುಂಬದಿಂದ ದೂರವಿರುವುದು ಮತ್ತು ಹಗಲು - ರಾತ್ರಿ ಗಾಡಿ ಓಡಿಸುವುದು ಸೇರಿದಂತೆ ಒಂದಿಷ್ಟು ಸಮಸ್ಯೆಯಿದೆ. ಜತೆಗೆ ಸರಿಯಾದ ಭದ್ರತೆ ಇಲ್ಲ ಎನ್ನುವುದು ಕೆಲ ಲಾರಿ ಚಾಲಕರ ಆರೋಪ. ಹೀಗಾಗಿ ಸಾಕಷ್ಟು ಚಾಲಕರು ಡ್ರೈವಿಂಗ್ ವೃತ್ತಿ ಬಿಟ್ಟು ಬೇರೆ ಬೇರೆ ಕೆಲಸಗಳತ್ತ ಮುಖ ಮಾಡುತ್ತಿದ್ದಾರೆ.

ಲಾಕ್​​​ಡೌನ್ ಪ್ರಭಾವ, ತೈಲ ಬೆಲೆ ಹೆಚ್ಚಳ, ಚಾಲಕರ ಕೊರತೆಯು ಸರಕು ಸಾಗಣೆ ಕ್ಷೇತ್ರದ ಮೇಲೆ ಭಾರಿ ಪ್ರಭಾವ ಬೀರಿದ್ದು, ಉದ್ಯಮ ಸಾಕಷ್ಟು ನಷ್ಟದಲ್ಲಿ ಸಾಗುತ್ತಿದೆ. ಕೇಂದ್ರ ಹಾಗೂ ರಾಜ್ಯ ಸರ್ಕಾರ ನಮ್ಮ ನೆರವಿಗೆ ಬರಬೇಕಾಗಿದೆ ಎಂದು ಲಾರಿ ಮಾಲೀಕರು ಮತ್ತು ಚಾಲಕರು ಒತ್ತಾಯಿಸಿದ್ದಾರೆ.