ಇಂಧನ ದರದ ಹೊಡೆತ.. ಆರ್ಥಿಕ ಸಂಕಷ್ಟದಲ್ಲಿ ವಾಯವ್ಯ ಕರ್ನಾಟಕ ರಸ್ತೆ ಸಾರಿಗೆ ಸಂಸ್ಥೆ..

ಇಷ್ಟೊಂದು ದೊಡ್ಡ ಮೊತ್ತದ ಸಾಲ ಬಾಕಿ ಉಳಿಸಿಕೊಳ್ಳಲು ಡೀಸೆಲ್ ಬೆಲೆ ಹೆಚ್ಚಳ ಮೂಲ ಕಾರಣ. ಆದಾಯದ ಶೇ.70ರಷ್ಟನ್ನ ಇಂಧನಕ್ಕೆ ವ್ಯಯಿಸುವುದರಿಂದ ಸಂಸ್ಥೆ ಭಾರೀ ನಷ್ಟ ಅನುಭವಿಸುತ್ತಿದೆ. ಇದಕ್ಕೆ ಸರ್ಕಾರಗಳೇ ಪರಿಹಾರ ಕಲ್ಪಿಸುವ ಕೆಲಸ ಮಾಡಬೇಕಿದೆ..

ಹುಬ್ಬಳ್ಳಿ: ವಾಯವ್ಯ ಕರ್ನಾಟಕ ರಸ್ತೆ ಸಾರಿಗೆ ಸಂಸ್ಥೆ ಆರ್ಥಿಕ ಮುಗಟ್ಟು ಎದುರಿಸುತ್ತಿದೆ. ಒಂದು ಕಡೆ ಸಾರಿಗೆ ನೌಕರರ ಪ್ರತಿಭಟನೆ, ಮತ್ತೊಂದೆಡೆ ಕೊರೊನಾ ಲಾಕ್​ಡೌನ್ ಎಫೆಕ್ಟ್. ಇದೆಲ್ಲದರ ನಡುವೆ ಡೀಸೆಲ್ ಬೆಲೆ ಹೆಚ್ಚಳವು ಸಾರಿಗೆ ಸಂಸ್ಥೆಗಳಿಗೆ ಹೊರೆಯಾಗಿ ಪರಿಣಮಿಸಿದೆ.

ಮೊದಲೇ ನಷ್ಟದಲ್ಲಿರುವ ಸಾರಿಗೆ ಸಂಸ್ಥೆಗಳ ಮೇಲೆ ಡೀಸೆಲ್‌ ದರ ಗಾಯದ ಮೇಲೆ ಬರೆ ಎಳೆದಿದೆ. ಸಾರಿಗೆ ಸಂಸ್ಥೆಗಳು ತೈಲ ಕಂಪನಿಗಳಿಂದ ಸಗಟು ಡೀಸೆಲ್‌ ಖರೀದಿಸುತ್ತವೆ. 15 ದಿನಗಳಿಗೊಮ್ಮೆ ಕಂಪನಿಗಳ ಜೊತೆ ಒಪ್ಪಂದ ಮಾಡಿಕೊಳ್ಳಲಾಗುತ್ತದೆ.

ಪ್ರತಿ ಲೀಟರ್​​​ಗೆ ಇಂತಿಷ್ಟು ದರದಲ್ಲಿ ಖರೀದಿ ಮಾಡಲಾಗುತ್ತಿದೆ. ಪ್ರತಿ ಎರಡು ವಾರಗಳಿಗೊಮ್ಮೆ ಹಣವನ್ನು ಸಂದಾಯ ಮಾಡುತ್ತವೆ. ಈಗ ಅದೇ ಡೀಸೆಲ್ ದರ ಹೆಚ್ಚಳ ವಾಯವ್ಯ ಕರ್ನಾಟಕ ಸಾರಿಗೆ ಸಂಸ್ಥೆಯ ಆದಾಯಕ್ಕೆ ಮತ್ತೊಂದು ಪೆಟ್ಟು ಕೊಟ್ಟಿದೆ.

ಲಾಕ್​ಡೌನ್‌ಗಿಂತ ಮೊದಲು ವಾಯವ್ಯ ಕರ್ನಾಟಕ ಸಾರಿಗೆ ಬಸ್​ಗಳು ಪ್ರತಿ ದಿನ 17 ಲಕ್ಷ ಕಿ.ಮೀ. ಓಡಾಡುತ್ತಿದ್ದವು. ‌ನಿತ್ಯ 22 ಲಕ್ಷ ಪ್ರಯಾಣಿಕರು ಇದರ ಸೌಲಭ್ಯ ಪಡೆಯುತ್ತಿದ್ದರು. ‌ಆದ್ರೆ, ಲಾಕ್​ಡೌನ್ ನಂತರ ಪ್ರತಿ ದಿನ 14 ಲಕ್ಷ ಕಿ.ಮೀ. ಓಡಾಟ ನಡೆಸುವ ಬಸ್​ಗಳಲ್ಲಿ 12-14 ಲಕ್ಷ ಜನ ಮಾತ್ರ ಪ್ರಯಾಣಿಸುತ್ತಿದ್ದಾರೆ. ಲಾಕ್​ಡೌನ್ ಪೂರ್ವದಲ್ಲಿ 5 ಕೋಟಿ ಇದ್ದ ಆದಾಯವೀಗ 3.5 ಕೋಟಿಗೆ ಇಳಿದಿದೆ. ಇದು ವಾಯವ್ಯ ಕರ್ನಾಟಕ ಸಾರಿಗೆ ಸಂಸ್ಥೆ ನಷ್ಟಕ್ಕೆ ಕಾರಣವಾಗಿದೆ.

ಇದನ್ನೂ ಓದಿ:ಸೋಂಕಿತರಿಗೆ ಸೂಕ್ತ ಚಿಕಿತ್ಸೆ ಒದಗಿಸಲು ತುಮಕೂರು ಜಿಲ್ಲಾಡಳಿತ ಸಿದ್ಧತೆ!

ಲಾಕ್‌ಡೌನ್, ಸಿಬ್ಬಂದಿಯ ಪ್ರತಿಭಟನೆ ನಡುವೆ ಡೀಸೆಲ್ ದರ ಹೆಚ್ಚಳ ತುಂಬಲಾರದ ನಷ್ಟ ತಂದೊಡ್ಡಿದೆ. ಆದಾಯದ ಶೇ.70ರಷ್ಟು ಹಣ ಸಂಸ್ಥೆ ಒಡಂಬಡಿಕೆ ಮಾಡಿಕೊಂಡ ತೈಲ ಸಂಸ್ಥೆಗೆ ಕಟ್ಟಬೇಕಾಗಿದೆ. ಸದ್ಯ ವಾಯವ್ಯ ಕರ್ನಾಟಕ ಸಾರಿಗೆ ಸಂಸ್ಥೆ ತೈಲ ಕಂಪನಿಗೆ 70 ಕೋಟಿ ರೂ. ಬಾಕಿ ಕಟ್ಟಬೇಕಿದೆ.

ಇದರ ಜತೆಗೆ ಸಿಬ್ಬಂದಿಯ ಪಿಎಫ್ ಸೇರಿ ಇತರೆ ನಿರ್ವಹಣೆಗಾಗಿ 272 ಕೋಟಿ ರೂ. ಸಾಲವನ್ನು ಸಂಸ್ಥೆ ತೆಗೆದುಕೊಂಡಿದೆ. ಈಗ ಒಟ್ಟು 892 ಕೋಟಿ ರೂ. ಸಾಲದ ಹೊರೆ ವಾಯವ್ಯ ಕರ್ನಾಟಕ ರಸ್ತೆ ಸಾರಿಗೆ ಸಂಸ್ಥೆ ಮೇಲಿದೆ.

ಇಷ್ಟೊಂದು ದೊಡ್ಡ ಮೊತ್ತದ ಸಾಲ ಬಾಕಿ ಉಳಿಸಿಕೊಳ್ಳಲು ಡೀಸೆಲ್ ಬೆಲೆ ಹೆಚ್ಚಳ ಮೂಲ ಕಾರಣ. ಆದಾಯದ ಶೇ.70ರಷ್ಟನ್ನ ಇಂಧನಕ್ಕೆ ವ್ಯಯಿಸುವುದರಿಂದ ಸಂಸ್ಥೆ ಭಾರೀ ನಷ್ಟ ಅನುಭವಿಸುತ್ತಿದೆ. ಇದಕ್ಕೆ ಸರ್ಕಾರಗಳೇ ಪರಿಹಾರ ಕಲ್ಪಿಸುವ ಕೆಲಸ ಮಾಡಬೇಕಿದೆ.