ಉದ್ಘಾಟನೆ ಕಾಣದ ಧಾರವಾಡ ಪೂರ್ವ ಆರ್​ಟಿಒ ಕಚೇರಿ: ಬಾಡಿಗೆ ಕಟ್ಟಡದಲ್ಲೇ ಇನ್ನೂ ಕಾರ್ಯ

2019 ರಲ್ಲಿ ಪ್ರಾರಂಭಿಸಲಾದ ಧಾರವಾಡ ಪೂರ್ವ ಆರ್​ಟಿಒ ಕಚೇರಿ ಕಾಮಗಾರಿಯು ಅನೇಕ ಕಾರಣದಿಂದ ಕುಂಟುತ್ತ, ತೆವಳುತ್ತಾ ಸಾಗಿ ಕಳೆದ ಸೆಪ್ಟೆಂಬರ್‌ನಲ್ಲಿ ಪೂರ್ಣಗೊಂಡಿದೆ. ಆದರೂ ಉದ್ಘಾಟನೆ ಭಾಗ್ಯ ಮಾತ್ರ ಒಲಿದು ಬಂದಿಲ್ಲ.‌

ಹುಬ್ಬಳ್ಳಿ :ನಗರದ ಗಬ್ಬೂರು ಕ್ರಾಸ್‌ನಲ್ಲಿ ನೂತನವಾಗಿ ನಿರ್ಮಿಸಿರುವ ಧಾರವಾಡ ಪೂರ್ವ ಆರ್‌ಟಿಒ ಕಚೇರಿ ಕಾಮಗಾರಿ ಕಾರ್ಯ ಕಳೆದ ಸೆಪ್ಟೆಂಬರ್‌ನಲ್ಲೇ ಪೂರ್ಣಗೊಂಡಿದೆ. ಆದರೂ ಇನ್ನು ಉದ್ಘಾಟನಾ ಭಾಗ್ಯ ಒಲಿದು ಬಂದಿಲ್ಲ.‌

ಧಾರವಾಡ ಜಿಲ್ಲೆಗೆ ಒಂದೇ ಆರ್​ಟಿಒ ಕಚೇರಿ 2017ರ ವರೆಗೆ ನವನಗರದಲ್ಲಿ ಕಾರ್ಯನಿರ್ವಹಿಸುತ್ತಿತ್ತು. ಇದರಿಂದ ಆಡಳಿತ ಹಾಗೂ ವಿವಿಧ ಸೇವೆಗಳಿಗೆ ಆಗಮಿಸುವ ಸಾರ್ವಜನಿಕರಿಗೆ ನಾನಾ ಸಮಸ್ಯೆಯಾಗುತ್ತಿತ್ತು. ಈ ಕಾರಣದಿಂದ 2017ರಲ್ಲಿ ಸಾರ್ವಜನಿಕರ ಅನುಕೂಲಕ್ಕಾಗಿ ಧಾರವಾಡ ಪೂರ್ವ ಮತ್ತು ಧಾರವಾಡ ಪಶ್ಚಿಮವನ್ನು ಎರಡು ಆರ್‌ಟಿಒ ಕಚೇರಿಗಳಾಗಿ ವಿಂಗಡಿಸಲಾಗಿತ್ತು.

ಅದರಂತೆ ನಗರದ ರಾಷ್ಟ್ರೀಯ ಹೆದ್ದಾರಿ 4 ರ ಬಳಿಯ ಗಬ್ಬೂರು ಬೈಪಾಸ್ ಸಮೀಪ ಸಾರ್ವಜನಿಕರಿಗೆ ಅನುಕೂಲವಾಗುವ ನಿಟ್ಟಿನಲ್ಲಿ ಪೂರ್ವ ಆರ್ ಟಿ ಒ ಕಚೇರಿಯನ್ನು 2017 ರಲ್ಲಿ ಪ್ರಾರಂಭಿಸಲಾಯಿತು.‌ ಈ ವೇಳೆ ಶಾಸಕರಾಗಿದ್ದ ಪ್ರಸಾದ್ ಅಬ್ಬಯ್ಯ ಅವರು ಮುತುವರ್ಜಿ ವಹಿಸಿ ತಮ್ಮ ಕ್ಷೇತ್ರದಲ್ಲಿ ಆರ್​ಟಿಒ ಕಚೇರಿ ಇರುವಂತೆ ನೋಡಿಕೊಂಡರು. ಅದರಂತೆ ಆರ್‌ಟಿಒ ಪೂರ್ವ ಕಚೇರಿಯನ್ನು ಬಾಡಿಗೆ ಕಟ್ಟಡದಿಂದ ಕಾರ್ಯಾರಂಭ ಮಾಡಿದ್ದು, ಪ್ರತಿ ತಿಂಗಳು 4.8 ಲಕ್ಷ ಬಾಡಿಗೆ ಪಾವತಿಸುತ್ತಿದೆ.

ನಂತರ 2019 ರಲ್ಲಿ ಸರ್ಕಾರ 1 ಎಕರೆ 20 ಗುಂಟಾ ಜಾಗದಲ್ಲಿ 8 ಕೋಟಿ ರೂಪಾಯಿಗಳಲ್ಲಿ ಹೊಸ ಕಟ್ಟಡ ಮಂಜೂರು ಮಾಡಿತ್ತು. ಕಾಮಗಾರಿಯನ್ನು 2019 ರಲ್ಲಿ ಪ್ರಾರಂಭಿಸಲಾಯಿತು. ಆದರೂ ಅನೇಕ ಕಾರಣದಿಂದ ಕಾಮಗಾರಿ ಕುಂಟುತ್ತಾ, ತೆವಳುತ್ತಾ ಕಳೆದ ಸೆಪ್ಟೆಂಬರ್‌ನಲ್ಲಿ ಪೂರ್ಣಗೊಳಿಸಲಾಗಿದೆ. ಆದರೆ, ಈ ನೂತನ ಕಟ್ಟಡಕ್ಕೆ ಮಾತ್ರ ಇನ್ನು ಉದ್ಘಾಟನೆ ಭಾಗ್ಯ ಸಿಕ್ಕಿಲ್ಲ. ಈ ಹಿಂದೆ ಆರ್​ಟಿಒ ಕಚೇರಿ ಸ್ಥಾಪಿಸಲು ಪ್ರಸಾದ್ ಅಬ್ಬಯ್ಯ ಮಹತ್ವದ ಪಾತ್ರ ವಹಿಸಿದ್ದರು. ಅದೇ ರೀತಿ ಈಗ ಶಾಸಕರು ಹೆಚ್ಚಿನ ಕಾಳಜಿ ವಹಿಸಿ ಉದ್ಘಾಟನೆಗೆ ಮುಂದಾಗಬೇಕಿದೆ.

ಈ ಬಗ್ಗೆ ಧಾರವಾಡ ಪೂರ್ವ ವಲಯದ ಪ್ರಾದೇಶಿಕ ಸಾರಿಗೆ ಅಧಿಕಾರಿ ಕೆ.ದಾಮೋದರ ಅವರು ಪ್ರತಿಕ್ರಿಯೆ ನೀಡಿದ್ದು, ಹೊಸ ಆರ್‌ಟಿಒ ಪೂರ್ವ ಕಚೇರಿಯ ಕೆಲಸ ಇನ್ನೂ ನಡೆಯುತ್ತಿದೆ. ನೆಲಹಾಸು ಕಾಮಗಾರಿ ಸೇರಿದಂತೆ ಅಲ್ಪಸ್ವಲ್ಪ ಕಾಮಗಾರಿ ಬಾಕಿ‌ ಇದೆ. ಅದರ ಜೊತೆಗೆ ಪಿಠೋಪಕರಣಗಳು ಬರಬೇಕಿದೆ ಎನ್ನುತ್ತಿದ್ದಾರೆ.

ಇದನ್ನೂ ಓದಿ :ದೇವನಹಳ್ಳಿಯಲ್ಲಿ ಆರ್​ಟಿಒ ಅಧಿಕಾರಿಗಳ ಕಾರ್ಯಾಚರಣೆ : ಟ್ಯಾಕ್ಸ್ ಕಟ್ಟದೇ ಸಂಚರಿಸುತ್ತಿದ್ದ ವಾಹನಗಳಿಗೆ ದಂಡದ ಬಿಸಿ

8 ಕೋಟಿ ರೂ. ವೆಚ್ಚದಲ್ಲಿ ಕಟ್ಟಡ ನಿರ್ಮಿಸಲಾಗಿದೆ. ಕಳೆದ ಅಕ್ಟೋಬರ್‌ನಲ್ಲಿ ಉದ್ಘಾಟನೆಗೆ ಯೋಜಿಸಲಾಗಿತ್ತು. ಆದರೆ ಕಾರಣಾಂತರಗಳಿಂದ ದಿನಾಂಕವನ್ನು ವಿಸ್ತರಿಸಲಾಯಿತು. ನೂತನ ಆರ್‌ಟಿಒ ಕಚೇರಿ ಉದ್ಘಾಟನೆ ಕುರಿತು ನಮ್ಮ ಇಲಾಖೆಯ ಉನ್ನತ ಅಧಿಕಾರಿಗಳು ಸಾರಿಗೆ ಸಚಿವ ರಾಮಲಿಂಗಾರೆಡ್ಡಿ, ಸ್ಥಳೀಯ ಶಾಸಕರೊಂದಿಗೆ ಸಂಪರ್ಕದಲ್ಲಿದ್ದಾರೆ. ಅತಿ ಶೀಘ್ರದಲ್ಲಿ ಉದ್ಘಾಟನೆಗೆ ದಿನಾಂಕ ನಿಗದಿ ಮಾಡುತ್ತೇವೆ ಎಂದು ತಿಳಿಸಿದ್ದಾರೆ.

ಕೋಟ್ಯಂತರ ರೂಪಾಯಿ ವೆಚ್ಚದಲ್ಲಿ ನೂತನ ಸಾರಿಗೆ ಕಚೇರಿ ನಿರ್ಮಾಣ ಮಾಡಲಾಗಿದೆ. ಆದರೂ ಉದ್ಘಾಟನೆಯಿಲ್ಲದೆ ಪ್ರತಿ ತಿಂಗಳು ಲಕ್ಷಾಂತರ ರೂಪಾಯಿ ಬಾಡಿಗೆಗೆ ಹೋಗುತ್ತಿದೆ. ಇದರಿಂದ ಜನಸಾಮಾನ್ಯರ ತೆರಿಗೆ ಹಣ ಪೋಲಾಗುತ್ತಿದೆ. ಈ ಬಗ್ಗೆ ಸಂಬಂಧಿಸಿದ ಸಚಿವರು, ಅಧಿಕಾರಿಗಳು ಇತ್ತ ಗಮನ ಹರಿಸಿ ಶೀಘ್ರ ಕಚೇರಿ ಉದ್ಘಾಟನೆ ಮಾಡಬೇಕೆಂಬುದು ಸಾರ್ವಜನಿಕರ ಆಗ್ರಹವಾಗಿದೆ.