ಹುಬ್ಬಳ್ಳಿಯಲ್ಲಿ ಕೊತ್ತಂಬರಿ ಜಗಳ.. ತನ್ನ ಬಳಿ ಸೊಪ್ಪು ಖರೀದಿಸಿಲ್ಲವೆಂದು ಚಾಕು ಇರಿದ ವ್ಯಾಪಾರಿ!

ಮಾರಾಟಕ್ಕಿಟ್ಟಿದ್ದ ಕೊತ್ತಂಬರಿ ಸೊಪ್ಪು ಸರಿಯಿಲ್ಲವೆಂದು ಖರೀದಿಸದ ಗ್ರಾಹಕನಿಗೆ ವ್ಯಾಪಾರಸ್ಥ ಹಾಗೂ ಆತನ ಸಹಚರರು ಚಾಕುವಿನಿಂದ ಇರಿದು ಹಲ್ಲೆ ಮಾಡಿರುವ ಘಟನೆ ವಾಣಿಜ್ಯ ನಗರಿಯಲ್ಲಿ ನಡೆದಿದೆ.

ಹುಬ್ಬಳ್ಳಿ: ಪರಿಚಯಸ್ಥರಾಗಿದ್ದರೂ ಕೂಡ ತನ್ನ ಬಳಿ ಕೊತ್ತಂಬರಿ ಸೊಪ್ಪು ಖರೀದಿ ಮಾಡಿಲ್ಲವೆಂದು ಸಿಟ್ಟಾದ ವ್ಯಾಪಾರಿಯೊಬ್ಬ ಗ್ರಾಹಕನಿಗೆ ಚಾಕುವಿನಿಂದ ಇರಿದು ಹಲ್ಲೆ ಮಾಡಿರುವ ವಿಚಿತ್ರ ಘಟನೆ ಹಳೇ ಹುಬ್ಬಳ್ಳಿಯ ಗೌಳಿ ಗಲ್ಲಿಯಲ್ಲಿ ನಡೆದಿದೆ.

ಹಳೇ ಹುಬ್ಬಳ್ಳಿ ಬಾಣತಿಕಟ್ಟಿಯ ಮೆಹಬೂಬನಗರದ ಮೊಹಮ್ಮದ್​ಗೌಸ್​ ಬಿಜಾಪುರ ಗಾಯಗೊಂಡಿರುವ ಗ್ರಾಹಕ. ಅದೇ ಪ್ರದೇಶದ ವ್ಯಾಪಾರಿ ಖಾದರ್​ ಮತ್ತು ಆತನ ಆತನ ಸಹಚರರು ಹಲ್ಲೆ ಮಾಡಿದ್ದಾರೆ ಎಂಬ ಆರೋಪ ಕೇಳಿಬಂದಿದೆ.

ಕೊತ್ತಂಬರಿ ಸೊಪ್ಪಿನ ವ್ಯಾಪಾರ ಮಾಡಿಕೊಂಡಿದ್ದ ಖಾದರ್​ ಬಳಿ, ಮೊಹಮ್ಮದ್​ಗೌಸ್ ​ಖಾಯಂ ಆಗಿ ವ್ಯಾಪಾರ ಮಾಡುತ್ತಿದ್ದರು. ಎಂದಿನಂತೆ ತರಕಾರಿ ಖರೀದಿಗೆ ಬಂದಾಗ ಖಾದರ್​ ಬಳಿ ಕೊತ್ತಂಬರಿ ಸೊಪ್ಪು ಸರಿಯಿಲ್ಲವೆಂದು ಬೇರೆ ಕಡೆಗೆ ಹೋದಾಗ ಸಿಟ್ಟಾದ ವ್ಯಾಪಾರಿ ಜಗಳ ಮಾಡಿ, ಅವಾಚ್ಯ ಪದಗಳಿಂದ ನಿಂದಿಸಿ, ತನ್ನ ಸಹಚರನೊಂದಿಗೆ ಗೌಸ್​ಗೆ ಇರಿದು ಗಾಯಗೊಳಿಸಿದ್ದಾನೆ ಎನ್ನಲಾಗ್ತಿದೆ. ಈ ಕುರಿತು ಹಳೇ ಹುಬ್ಬಳ್ಳಿ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.