ಇಷ್ಟು ದಿನ ಇವರು ಮಲಗಿಕೊಂಡಿದ್ದರೇನು? ಜೋಶಿ ವಿರುದ್ಧ ವಿನಯ್​ ಕುಲಕರ್ಣಿ ಕಿಡಿ

ಯಾವತ್ತೋ ಆಗಿರುವ ಪ್ರಕರಣವನ್ನು ಬಿಜೆಪಿ ನಾಯಕರು ಇದೀಗ ಮುನ್ನೆಲೆಗೆ ತರುತ್ತಿದ್ದಾರೆ. ಇಷ್ಟು ದಿನ ಅವರು ಮಲಗಿಕೊಂಡಿದ್ದರೇನು? ಎಂದು ಕಾಂಗ್ರೆಸ್ ಅಭ್ಯರ್ಥಿ ವಿನಯ ಕುಲಕರ್ಣಿ ಸಂಸದ ಪ್ರಹ್ಲಾದ ಜೋಶಿ ವಿರುದ್ಧ ಕಿಡಿಕಾರಿದ್ದಾರೆ.

ಧಾರವಾಡ: ಸಾಕ್ಷ್ಯನಾಶ ಆರೋಪದಡಿ ತಮ್ಮ ಮೇಲೆ ಕೇಸು ದಾಖಲಿಸಲು ಕೋರ್ಟ್ ಸೂಚನೆ ನೀಡಿರುವ ವಿಚಾರದ ಬಗ್ಗೆ ಧಾರವಾಡ ಲೋಕಸಭಾ ಕ್ಷೇತ್ರದ ಕಾಂಗ್ರೆಸ್ ಅಭ್ಯರ್ಥಿ ವಿನಯ್​ ಕುಲಕರ್ಣಿ ಅವರು ಸಂಸದ ಪ್ರಹ್ಲಾದ್​ ಜೋಶಿ ಕಡೆಗೆ ಬೆರಳು ಮಾಡಿದ್ದಾರೆ.

ನ್ಯಾಯಾಂಗದ ಬಗ್ಗೆ ತಮಗೆ ಅಪಾರ ಗೌರವ ಇದೆ. ಅದು ಯಾವತ್ತೋ ಆಗಿರೋ ಪ್ರಕರಣ. ಚುನಾವಣೆಯಲ್ಲಿಯೇ ಮುನ್ನೆಲೆಗೆ ಬಂದಿದ್ದು ಏಕೆ? ಇದೀಗ ಕೇಸು ಹಾಕಿರುವ ಗುರುನಾಥಗೌಡ ಯಾರ ಜೊತೆ ಇರುತ್ತಾರೆ? ಅವರು ಪ್ರಹ್ಲಾದ್​ ಜೋಶಿ ಜೊತೆಯೇ ಇರುತ್ತಾರೆ. ಹಾಗಾದ್ರೆ ಯಾರು ಈ ಕೇಸ್ ಮಾಡಿದಂತಾಯ್ತು? ಅಂತಾ ಜೋಶಿ ವಿರುದ್ಧ ಹರಿಹಾಯ್ದಿದ್ದಾರೆ.

ಪ್ರಕರಣದಲ್ಲಿ ನಾನು ಆರೋಪಿಯೂ ಅಲ್ಲ, ಎಫ್​ಐಆರ್​​ನಲ್ಲಿ ನನ್ನ ಹೆಸರೂ ಇಲ್ಲ. ಇನ್ನು ಚಾರ್ಜ್​ಶೀಟ್​ನಲ್ಲಂತೂ ನನ್ನ ಹೆಸರೇ ಇಲ್ಲ. ಆ ಕೇಸ್​ನಲ್ಲಿ ಒಟ್ಟು 62 ಸಾಕ್ಷಿಗಳು ಇದ್ದವು. ಅದರಲ್ಲಿ 59 ಸಾಕ್ಷಿಗಳು ಮುಗಿದಿವೆ. ಆದರೆ, ಈಗ ಚುನಾವಣೆ ಬಂದಿದೆ. ಹೀಗಾಗಿ ಪ್ರಹ್ಲಾದ್​ ಜೋಶಿ ಇಂಥ ಕುತಂತ್ರ ಮಾಡುತ್ತಿದ್ದಾರೆ. ಧಾರವಾಡದಲ್ಲಿ ಏನೇ ನಡೆದರೂ ಅವರಿಗೆ ವಿನಯ ಕುಲಕರ್ಣಿ ಮಾತ್ರ ಕಾಣುತ್ತಾರೆ. ಮನೆಯನ್ನು ಇಬ್ಭಾಗ ಮಾಡುವಂತಹ ಕುತಂತ್ರಿಗಳಿವರು. ಈ ವಿಚಾರ ಚುನಾವಣೆಯಲ್ಲಿಯೇ ಏಕೆ ಬಂತು? ಇಷ್ಟು ದಿನ ಅವರು ಮಲಗಿಕೊಂಡಿದ್ದರೇನು? ಪ್ರಕರಣ ನಡೆದು 3 ವರ್ಷವಾಯ್ತು. ಇದೆಲ್ಲ ಜೋಶಿಯವರದ್ದೇ ಕುತಂತ್ರ. ಜನ ಇದನ್ನೆಲ್ಲ ನೋಡುತ್ತಿದ್ದಾರೆ ಅಂತಾ ವಿನಯ ಕುಲಕರ್ಣಿ ಹೇಳಿದರು.