ಮಸೀದಿಯಲ್ಲಿ ಜವಳ ಕಾರ್ಯಕ್ರಮ: ಭಾವೈಕ್ಯತೆ ಮೆರೆದ ಮುಸ್ಲಿಂ ದಂಪತಿ

ಧಾರ್ಮಿಕ ಸೌಹಾರ್ದ ಭಾವನೆ ಮೂಡಿಸಲು ಮುಸ್ಲಿಂ ದಂಪತಿ ವಿನೂತನ ಪ್ರಯತ್ನ ಮಾಡಿದ್ದಾರೆ. ತಮ್ಮ ಮಗುವಿಗೆ ಮಸೀದಿಯಲ್ಲೇ ಜವಳ ಕಾರ್ಯಕ್ರಮ ಹಮ್ಮಿಕೊಂಡು ಭಾವೈಕ್ಯತೆ ಮರೆದಿದ್ದಾರೆ.

ಹುಬ್ಬಳ್ಳಿ: ಹಿಂದೂ ಧರ್ಮದಲ್ಲಿ ಮಕ್ಕಳ ಜವಳ(ಮುಡಿ) ತೆಗೆಯುವುದು ಸಾಮಾನ್ಯ. ಮುಸ್ಲಿಂ ಸಮುದಾಯದಲ್ಲಿ ಈ ಪದ್ಧತಿ ಇಲ್ಲ. ಆದರೆ ಇಲ್ಲೊಂದು ಮುಸ್ಲಿಂ ಕುಟುಂಬ ಮಸೀದಿಯಲ್ಲಿ ಮಗುವಿನ ಜವಳ ತೆಗೆಸುವ ಮೂಲಕ ಸರ್ವಧರ್ಮ ಸೌಹಾರ್ದತೆಗೆ ಸಾಕ್ಷಿಯಾಗಿದೆ.

ಕುಂದಗೋಳ ತಾಲೂಕಿನ ಚಿಕ್ಕನೇರ್ತಿ ಗ್ರಾಮದ ಲಾಲಸಾಬ ನದಾಫ್ ಹಾಗೂ ಅಮೀನಾ ನದಾಫ್ ದಂಪತಿ ಇಂತಹ ಆಚರಣೆ ಮಾಡಿದ್ದಾರೆ. ಈ ಮೂಲಕ ತಮ್ಮ ಪುತ್ರಿ ಆರೀಫ್ ಎಂಬ ಮಗುವಿನ ಜವಳ ತೆಗೆಸುವ ಕಾರ್ಯಕ್ರಮವನ್ನು ಮಸೀದಿಯಲ್ಲಿ ಹಿಂದೂ-ಮುಸ್ಲಿಂ ಸಂಪ್ರದಾಯದಂತೆ ಮಾಡಿದ್ದು, ಭಾವೈಕ್ಯತೆ ಮೆರೆದಿದ್ದಾರೆ.

ಮಕ್ಕಳು ಕೇವಲ ಒಂದು ಜಾತಿಗೆ ಸೀಮಿತವಾಗಬಾರದು. ಸರ್ವ-ಧರ್ಮವನ್ನು ಗೌರವಿಸಬೇಕು ಎಂಬ ಸದುದ್ದೇಶದಿಂದ ದಂಪತಿ ಇಂತಹ ಮಹತ್ವದ ಕಾರ್ಯ ಮಾಡಿರುವುದು ವಿಶೇಷವಾಗಿದೆ. ಗ್ರಾಮದಲ್ಲಿ ಈ ದಂಪತಿಯ ಸೌಹಾರ್ದತೆಯ ಈ ನಡೆ ಎಲ್ಲರ ಪ್ರಶಂಸೆಗೆ ಪಾತ್ರವಾಗಿದೆ.