ಹಾಲ್​ಮಾರ್ಕ್​ ಹೆಸರಲ್ಲಿ ವಂಚನೆ: ವಿದ್ಯಾನಗರ ಪೊಲೀಸರಿಂದ ಆರೋಪಿಯ ಬಂಧನ

ಚಿನ್ನಕ್ಕೆ ಪಾಲಿಶ್​ ಮತ್ತು ಹಾಲ್​ಮಾರ್ಕ್​ ಹಾಕುತ್ತೇನೆ ಎಂದು ನಂಬಿಸಿ ಗ್ರಾಹಕರಿಗೆ ವಂಚನೆ ಮಾಡುತ್ತಿದ್ದ ಖದೀಮ ಇದೀಗ ವಿದ್ಯಾನಗರ ಠಾಣೆ ಪೊಲೀಸರ ಅತಿಥಿಯಾಗಿದ್ದಾನೆ.

ಹುಬ್ಬಳ್ಳಿ:ಬಂಗಾರಕ್ಕೆ ಹಾಲ್​ಮಾರ್ಕ್ ಹಾಕಿ ಕೊಡ್ತೀನಿ, ಕಲರ್ ಪಾಲಿಶ್​ ಮಾಡುತ್ತೀನಿ ಎಂದು ಮೋಸ ಮಾಡುತ್ತಿದ್ದ ವಂಚಕನನ್ನು ಬಂಧಿಸುವಲ್ಲಿ ವಿದ್ಯಾನಗರ ಠಾಣೆ ಪೊಲೀಸರು ಯಶಸ್ವಿಯಾಗಿದ್ದಾರೆ.

ಸುನಿಲ್ ಪತ್ತಾರ ಬಂಧಿತ ಆರೋಪಿ. ಈತ ಬಂಗಾರಕ್ಕೆ ಹಾಲ್​ಮಾರ್ಕ್ ಮತ್ತು ಕಲರ್ ಪಾಲಿಶ್​ ಮಾಡಿಕೊಡುತ್ತೇನೆ ಎಂದು ಹೇಳಿ ಸ್ವಲ್ಪ ಚಿನ್ನವನ್ನು ತೆಗೆದು ಬಳಿಕ ಅದಕ್ಕೆ ನಕಲಿ ವಸ್ತುಗಳನ್ನು ಸೇರಿಸಿ ಮೋಸ ಮಾಡುತ್ತಿದ್ದ. ಈ ವಿಚಾರ ತಿಳಿದ ಗ್ರಾಹಕರು ಪೊಲೀಸರಿಗೆ ದೂರು ನೀಡಿದ್ದಾರೆ.

ಬಳಿಕ ಪ್ರಕರಣ ದಾಖಲಿಸಿಕೊಂಡು ದಾಳಿ ನಡೆಸಿದ ಪೊಲೀಸರು, ಸುನಿಲ್​ ಬಳಿಯಿಂದ 20 ಲಕ್ಷ ರೂ. ಮೌಲ್ಯದ 330 ಗ್ರಾಂ ಚಿನ್ನಾಭರಣ ಹಾಗೂ 3.56 ಲಕ್ಷ ರೂ. ಜಪ್ತಿ ಮಾಡಿದ್ದಾರೆ.