ರಾಜ್ಯ ರಾಜಕಾರಣದಲ್ಲಿ ಆಗಲಿದೆಯಾ ನಾಯಕತ್ವ ಬದಲಾವಣೆ?: ನಿಜವಾಗುತ್ತಾ ಧಾರವಾಡ ಗೊಂಬೆ ಭವಿಷ್ಯ?

ಈ ಹಿಂದೆ ಬಿ ಎಸ್​ ಯಡಿಯೂರಪ್ಪ ಅವರ ಬದಲಾವಣೆಯಾದಗಲೂ ಇದೇ ಧಾರವಾಡದ ಬೊಂಬೆ ನಾಯಕತ್ವ ಬದಲಾವಣೆಯ ಭವಿಷ್ಯ ನುಡಿದಿತ್ತು.

ಧಾರವಾಡ:ರಾಜ್ಯ ರಾಜಕಾರಣದಲ್ಲಿ ಆಗಲಿದೆಯಾ ನಾಯಕತ್ವ ಬದಲಾವಣೆ? ಎಂಬ ಪ್ರಶ್ನೆ ಮೂಡಿದೆ. ಧಾರವಾಡದ ಗೊಂಬೆ ಭವಿಷ್ಯದಲ್ಲಿ ನಾಯಕತ್ವ ಬದಲಾವಣೆ ಮುನ್ಸೂಚನೆ ಸಿಕ್ಕಿದೆ. ಚುನಾವಣೆ ವೇಳೆಯಲ್ಲಿಗೆ ನಾಯಕತ್ವ ಬದಲಾವಣೆಯಾಗಬಹುದು ಎಂದು ಬೊಂಬೆ ಭವಿಷ್ಯ ನುಡಿದಿದೆ. ಧಾರವಾಡ ತಾಲೂಕಿನ ಉಪ್ಪಿನ ಬೆಟಗೇರಿ ವ್ಯಾಪ್ತಿಯ ಹನುಮನಕೊಪ್ಪದಲ್ಲಿ ಯುಗಾದಿ ಹಿಂದಿನ ದಿನ ಗೊಂಬೆ ಮಾಡಿಡಲಾಗಿರುತ್ತದೆ. ಅವುಗಳಿಗೆ ಧಕ್ಕೆಯಾದ್ರೆ ನಾಯಕತ್ವ ಬದಲಾವಣೆಯಾಗುತ್ತೆ ಎಂಬುದು ಗೊಂಬೆ ಭವಿಷ್ಯವಾಗಿದೆ.

ಯುಗಾದಿ ದಿನ ನಡೆಯುವ ಮಣ್ಣಿನ ಬೊಂಬೆ ಭವಿಷ್ಯದಲ್ಲಿ ಕರ್ನಾಟಕದ ದಿಕ್ಕಿನ ಗೊಂಬೆ ಕಾಲಿಗೆ ಧಕ್ಕೆಯಾಗಿದೆ. ಈ ಮೂಲಕ ನಾಯಕತ್ವ ಬದಲಾವಣೆಯ ಮುನ್ಸೂಚನೆ ಕೊಟ್ಟಿದೆ.‌ ಯಡಿಯೂರಪ್ಪ ಬದಲಾವಣೆಯನ್ನು ಸಹ ಹನುಮನಕೊಪ್ಪದ ಬೊಂಬೆಗಳು ಮುಂಚಿತವಾಗಿ ಭವಿಷ್ಯ ಹೇಳಿದ್ದವು. ಎರಡು ವರ್ಷದ ಹಿಂದೆಯೂ ಕರ್ನಾಟಕದ ಗೊಂಬೆಗೆ ಧಕ್ಕೆಯಾಗಿತ್ತು.‌‌ ನಾಲ್ಕು ತಿಂಗಳ‌ ಮೊದಲೇ ನಾಯಕತ್ವ ಬದಲಾವಣೆ ಭವಿಷ್ಯ ನುಡಿದಿತ್ತು. ಈಗ ಅದೇ ರೀತಿ ಮತ್ತೊಮ್ಮೆ ಭವಿಷ್ಯ ಬಂದಿದೆ.

‌ಗ್ರಾಮದ ಹಳ್ಳದ ದಂಡೆಯಲ್ಲಿ ನಡೆಯುವ ವಿಸ್ಮಯ ಭವಿಷ್ಯದ ಮೇಲೆ ಗ್ರಾಮಸ್ಥರು ಅಪಾರ ನಂಬಿಕೆ ಇಟ್ಟಿದ್ದಾರೆ. ಯುಗಾದಿ ಅಮಾವಾಸ್ಯೆ ದಿನ ರಾತ್ರಿ ಗೊಂಬೆಗಳ ಪ್ರತಿಷ್ಠಾಪನೆ ಮಾಡಲಾಗುತ್ತದೆ.‌‌ ಪಾಡ್ಯದ ದಿನ ನಸುಕಿನ ಜಾವ ಆ ಸ್ಥಳ ನೋಡುವ ಹಿರಿಯರು ಆಯಾ ದಿಕ್ಕಿನ ಗೊಂಬೆಯ ಪರಿಸ್ಥಿತಿ ಆಧರಿಸಿ ರಾಜಕೀಯ ಭವಿಷ್ಯ ಹೇಳುತ್ತಾರೆ. ಇಂದಿರಾ ಗಾಂಧಿ ನಿಧನದ ವರ್ಷವೂ ಸಹ ಭವಿಷ್ಯ ನಿಜವಾಗಿತ್ತು. ರಾಷ್ಟ್ರ ನಾಯಕರ ಗೊಂಬೆ ಸಂಪೂರ್ಣವಾಗಿ ಉರುಳಿ ಬಿದ್ದಿತ್ತು. ಅದೇ ವರ್ಷ ಇಂದಿರಾ ಗಾಂಧಿ ಹತ್ಯೆಯಾಗಿತ್ತು ಎನ್ನುತ್ತಾರೆ ಗ್ರಾಮಸ್ಥ ನಾಗರಾಜ್​ ಹಾರೋಬೆಳವಡಿ.

ಈಗ ಗೊಂಬೆಗೆ ಧಕ್ಕೆಯಾಗಿದೆ. ಹೀಗಾಗಿ ಗೊಂಬೆಯ ಅಂಗಾಂಗಗಳಿಗೆ ಧಕ್ಕೆಯಾದರೆ ನಾಯಕತ್ವ ಹೋಗುತ್ತದೆ ಎಂಬ ಭವಿಷ್ಯ ಹೇಳಿದೆ. ಬಿಎಸ್‌ವೈ ಸಿಎಂ ಆಗಿದ್ದಾಗಲೂ ಗೊಂಬೆಗೆ ಧಕ್ಕೆಯಾಗಿದ್ದನ್ನು ಇಲ್ಲಿ ಸ್ಮರಿಸಬಹುದು.

ಕೃಷಿ ಭವಿಷ್ಯವನ್ನೂ ತಿಳಿಯುವ ರೈತರು: ರಾಜಕೀಯ ಕ್ಷೇತ್ರ ಮಾತ್ರವಲ್ಲದೆ ರೈತರು ತಮ್ಮ ಕೃಷಿಯ ಬಗ್ಗೆಯೂ ಭವಿಷ್ಯವನ್ನೂ ಈ ಮುಳಕ ಕಂಡುಕೊಳ್ಳುತ್ತಾರೆ. ಇಲ್ಲಿ ಗೊಂಬೆಗಳನ್ನು ಮಾಡಿಡುವುದರ ಜೊತೆಗೆ ಗ್ರಾಮಸ್ಥರು ಗುಂಡಿಗಳನ್ನು ಮಾಡಿ ಅದರಲ್ಲಿ ಎಲೆಗಳನ್ನು ಇರಿಸುತ್ತಾರೆ. ಅದರೊಳಗೆ ತಾವು ಬೆಳೆಯುವ ಉದ್ದು, ಹೆಸರುಕಾಳು, ಶೇಂಗಾ, ಹತ್ತಿ, ಕಡ್ಲೆ ಎಲ್ಲವನ್ನೂ ಸ್ವಲ್ಪ ಸ್ವಲ್ಪವೇ ಹಾಕಿಟ್ಟು, ಅದರ ಮೇಲೆ ಮತ್ತೊಂದು ಎಲೆಯಿಂದ ಮುಚ್ಚುತ್ತಾರೆ. ಅದರ ಮೇಲೆ ಮಣ್ಣಿನಿಂದ ಮಾಡಿದ ಉಂಡೆಯನ್ನೂ ಸಹ ಇಡುತ್ತಾರೆ. ಇದರ ನಾಲ್ಕೂ ತುದಿಯಲ್ಲಿ ಗುಡ್ಡಗಳ ರೀತಿ ಮಣ್ಣಿನಲ್ಲಿ ಮಾಡಿ, ಅದರ ಮೇಲೆ ಗೊಂಬೆಗಳನ್ನು ಮಾಡಿಡಲಾಗುತ್ತದೆ.

ಇದರಿಂದ ಮುಂದಿನ ದಿನಗಳಲ್ಲಿ ಈ ಬೆಳೆಗಳು ಯಾವ ರೀತಿ ಬರಬಹುದು, ಮಾರುಕಟ್ಟೆಯಲ್ಲಿ ಆ ಬೆಳೆಗಳ ಬೆಲೆ ಯಾವ ರೀತಿ ಏರು ಪೇರಾಗಬಹುದು. ಯಾವ ತಿಂಗಳಲ್ಲಿ ಯಾವ ಬೆಳೆಗೆ ಬೇಡಿಕೆ ಹೆಚ್ಚಾಗಬಹುದು ಎಂಬುದನ್ನೂ ರೈತರು ಈ ಬೊಂಬೆ ಭವಿಷ್ಯದಲ್ಲಿ ಕಂಡುಕೊಳ್ಳುತ್ತಾರೆ.

ಇದು ಕೇವಲ ಜನರ ನಂಬಿಕೆ ಮಾತ್ರ..ಈ ಗೊಂಬೆ ಭವಿಷ್ಯ ಕೇವಲ ಜನರ ನಂಬಿಕೆಯಾಗಿದೆ. ಇದಕ್ಕೆ ಯಾವುದೇ ವೈಜ್ಞಾನಿಕ ತಳಹದಿ ಇರುವ ಬಗ್ಗೆ ಈಟಿವಿ ಭಾರತ ಖಚಿತಪಡಿಸುವುದಿಲ್ಲ. ಮತ್ತು ಇದು ಯಾವುದೇ ರಾಜಕೀಯ ವ್ಯಕ್ತಿ ಅಥವಾ ಪಕ್ಷಕ್ಕೆ ಈ ಗೊಂಬೆ ಭವಿಷ್ಯ ಸೀಮಿತವಾಗಿಲ್ಲ ಎಂಬುದನ್ನು ಸ್ಪಷ್ಟಪಡಿಸುತ್ತೇವೆ.

ಇದನ್ನೂ ಓದಿ:ರಾಜ್ಯದಲ್ಲಿ ನಾಯಕತ್ವ ಬದಲಾವಣೆ ಇಲ್ಲ, ಅಂತಹ ಹೇಳಿಕೆ ನಿಲ್ಲಿಸಿ: ಬಿಎಸ್​ವೈ