ದಾವಣಗೆರೆ: ಬಟನ್​​​ನಲ್ಲಿ ವಿಷ್ಣುವರ್ಧನ್ ಭಾವಚಿತ್ರ ಬಿಡಿಸಿದ ಕಲಾವಿದ

66ನೇ ಕನ್ನಡ ರಾಜ್ಯೋತ್ಸವ ಸುವರ್ಣ ಸಂಭ್ರಮಕ್ಕೆ ಡಾ.ವಿಷ್ಣುವರ್ಧನ್‌ ಅವರಿಗೆ ಗೌರವ ಸಲ್ಲಿಸುವ ಸಲುವಾಗಿ ಈ ಯುವಕ ವಿನೂತನ ಪ್ರಯತ್ನ ಮಾಡಿದ್ದಾನೆ.

ದಾವಣಗೆರೆ: ಕಲೆ ಎನ್ನುವುದು ಸಾಧಕನ ಸೊತ್ತೇ ಹೊರತು ಸೋಮಾರಿಯ ಸೊತ್ತಲ್ಲ ಎನ್ನುವ ಗಾದೆ ಮಾತಿದೆ. ಸಾವಿರಾರು ಜನರನ್ನು ನಿಬ್ಬೆರಗಾಗುವಂತೆ ಮಾಡುವ ಶಕ್ತಿ ಕಲೆಗಿದೆ. ಅಂತಹದ್ದೇ ಒಂದು ವಿಶಿಷ್ಟ ಕಲೆಯಿಂದ ಇಲ್ಲೊಬ್ಬ ಯುವಕ ಕನ್ನಡದ ಹೆಸರಾಂತ ನಟರ ಭಾವಚಿತ್ರಗಳನ್ನು ಬಟನ್​​ನಲ್ಲೇ ರಚಿಸುವ ಮೂಲಕ ಗಮನ ಸೆಳೆದಿದ್ದಾನೆ.

ನಗರದ ಭರತ್ ಕಾಲೋನಿಯ ಯುವಕ ಪ್ರದೀಪ್ ದೂದಾನಿ ಎನ್ನುವವರು ಈ ರೀತಿಯ ಅದ್ಬುತವಾದ ಪ್ರಯತ್ನಕ್ಕೆ ಕೈ ಹಾಕಿದ್ದಾರೆ. ಈ ಯುವಕ ಸರ್ಕಾರಿ ಪ್ರಥಮದರ್ಜೆ ಕಾಲೇಜಿನಲ್ಲಿ ಅಂತಿಮ ವರ್ಷದ ಬಿಕಾಂ ವ್ಯಾಸಂಗ ಮಾಡುತ್ತಿದ್ದು, ಜಯದೇವ ವೃತ್ತದಲ್ಲಿ ಐದು ರೀತಿಯ ಬಣ್ಣದ 31 ಸಾವಿರ ಶರ್ಟ್‌ ಬಟನ್​​​ಗಳಿಂದ 6 ಅಡಿ ಅಗಲ ಹಾಗೂ 8 ಅಡಿ ಉದ್ದದ ಡಾ.ವಿಷ್ಣುವರ್ಧನ್ ಭಾವಚಿತ್ರ ರಚಿಸಿದ್ದಾರೆ.

66ನೇ ಕನ್ನಡ ರಾಜ್ಯೋತ್ಸವ ಸುವರ್ಣ ಸಂಭ್ರಮಕ್ಕೆ ಡಾ.ವಿಷ್ಣುವರ್ಧನ್ ಅವರಿಗೆ ವಿಶೇಷವಾಗಿ ಗೌರವ ಸಲ್ಲಿಸುವ ಸಲುವಾಗಿ ಈತ ವಿನೂತನ ಪ್ರಯತ್ನ ಮಾಡಿದ್ದಾನೆ. ರಾತ್ರಿ-ಹಗಲೆನ್ನದೆ ಸತತ ಐದು ದಿನಗಳ ಕಾಲ 31 ಸಾವಿರ ಶರ್ಟ್ ಬಟನ್‌ಗಳಿಂದ ಚಿತ್ರ ಬಿಡಿಸಿದ್ದಾನೆ. ನಗರದ ಜಯದೇವ ವೃತ್ತದಲ್ಲಿ ಈ ಬಟನ್ ಚಿತ್ರ ರಾರಾಜಿಸುತ್ತಿದ್ದು, ಇದನ್ನು ಒಂದು ಸಾಕ್ಷ್ಯ ಚಿತ್ರ ಮಾಡಿ ಚಿತ್ರಕ್ಕೆ ಜೀವ ತುಂಬಿದ್ದಾನೆ.

ಪ್ರದೀಪ್‌ ಟೈಪಿಂಗ್‌ನಲ್ಲಿ ಚಿತ್ರ ಬಿಡಿಸುವುದು, ದಾರದಲ್ಲಿ ಚಿತ್ರ ಬಿಡಿಸುವುದನ್ನು ಕಲಿತಿದ್ದಾನೆ. ಯಾವುದೇ ತರಬೇತಿ ಶಾಲೆಗೂ ಹೋಗದೇ ಕೇವಲ ಯೂಟ್ಯೂಬ್‌ನಲ್ಲಿ ನೋಡಿ ಈ ರೀತಿಯ ಕಲೆ ಕರಗತ ಮಾಡಿಕೊಂಡಿದ್ದಾನೆ. ಕಳೆದ ಬಾರಿ ಡಾ.ಬಿ.ಆರ್.ಅಂಬೇಡ್ಕರ್, ಭಗತ್ ಸಿಂಗ್‌ ಅವರ ಬೃಹದಾಕಾರದ ಚಿತ್ರ ಬಿಡಿಸಿ ಗೌರವ ಸಲ್ಲಿಕೆ ಮಾಡಿದ್ದನು.