ಡ್ರಗ್ಸ್ ವಿಚಾರ ಸ್ಯಾಂಡಲ್​​ವುಡ್ ಅಷ್ಟೇ ಅಲ್ಲ, ರಾಜ್ಯಕ್ಕೇ ಕಳಂಕ: ನಟ ದರ್ಶನ್

ಡ್ರಗ್ಸ್ ಜಾಲದಲ್ಲಿ ಯಾರ್ಯಾರಿದ್ದಾರೆ ಎಂಬುದು ಇನ್ನೊಂದು ವಾರದಲ್ಲಿ ಗೊತ್ತಾಗಲಿದೆ. ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ. ಆ ನಟ, ಈ ನಟ ಜಾಲದಲ್ಲಿದ್ದಾರೆ ಎಂದು ವದಂತಿ ಹಬ್ಬಿಸಬೇಡಿ ಎಂದು ನಟ ದರ್ಶನ್ ಮನವಿ ಮಾಡಿದರು.

ದಾವಣಗೆರೆ: ಡ್ರಗ್ಸ್ ಮತ್ತು ಗಾಂಜಾ ವಿಚಾರ ಸ್ಯಾಂಡಲ್​​ವುಡ್​ಗೆ ಅಷ್ಟೇ ಅಲ್ಲ, ರಾಜ್ಯಕ್ಕೇ ಕಳಂಕ ಎಂದು ಚಾಲೆಂಜಿಂಗ್ ಸ್ಟಾರ್ ದರ್ಶನ್ ತೂಗುದೀಪ ಹೇಳಿದ್ದಾರೆ.

ನಗರದ ಬಾಪೂಜಿ ಗೆಸ್ಟ್ ಹೌಸ್​​ನಲ್ಲಿ‌ ಮಾಧ್ಯಮದವರ ಜೊತೆ ಮಾತನಾಡಿದ ಅವರು, ಡ್ರಗ್ಸ್ ಜಾಲದಲ್ಲಿ ಯಾರ್ಯಾರಿದ್ದಾರೆ ಎಂಬುದು ಇನ್ನೊಂದು ವಾರದಲ್ಲಿ ಗೊತ್ತಾಗಲಿದೆ. ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ. ಆ ನಟ, ಈ ನಟ ಜಾಲದಲ್ಲಿದ್ದಾರೆ ಎಂದು ವದಂತಿ ಹಬ್ಬಿಸಬೇಡಿ.‌ ಕಾಯೋಣ, ವಿನಾ ಕಾರಣ ಏನನ್ನೋ ತೋರಿಸಬೇಡಿ ಎಂದು‌ ಮನವಿ ಮಾಡಿದರು. ನಾನು ಲೈಟ್ ಬಾಯ್​ನಿಂದ ಹಿಡಿದು ಇಲ್ಲಿಯವರೆಗೆ ಸ್ಯಾಂಡಲ್​ವುಡ್​ನಲ್ಲಿ‌ ಇದುವರೆಗೆ‌ ನೋಡಿಯೇ ಇಲ್ಲ. 27 ವರ್ಷದಲ್ಲಿ ಇಂಥದ್ದನ್ನು ನೋಡಿಯೇ ಇರಲಿಲ್ಲ. ನನಗೆ ಈ ರೀತಿಯ ಅನುಭವ ಆಗಿಲ್ಲ ಎಂದರು.

ಡ್ರಗ್ಸ್ ವಿಚಾರದಲ್ಲಿ ದಿವಂಗತ ಚಿರಂಜೀವಿ ಸರ್ಜಾ ಹೆಸರು ಕೇಳಿ ಬರುತ್ತಿರುವ ಹಿನ್ನೆಲೆಯಲ್ಲಿ ಪ್ರತಿಕ್ರಿಯಿಸಿದ ದರ್ಶನ್, ಸತ್ತು ಹೋದವರ ಬಗ್ಗೆ ಏನನ್ನೂ‌ ಮಾತನಾಡಬಾರದು. ಸ್ಯಾಂಡಲ್​ವುಡ್​​ನಲ್ಲಿ ಅಷ್ಟೇ ಅಲ್ಲ. ಎಲ್ಲೆಡೆಯಲ್ಲಿಯೂ ಇದೆ. ಚಿರು ಹೆಸರು ಕೇಳಿ ಬಂದಿದ್ದು ತುಂಬಾ ನೋವಾಗಿದೆ. ತಪ್ಪು ಮಾಡಿದ್ದರೆ ಕರೆದುಕೊಂಡು ಶಿಕ್ಷೆ ಕೊಡೊಕ್ಕಾಗುತ್ತಾ? ಸತ್ತವರ ಬಗ್ಗೆ ಕೆಟ್ಟದಾಗಿ ಮಾತನಾಡಬಾರದು. ಒಳ್ಳೆಯ ಮಾತಗಳನ್ನಾಡಬೇಕು ಎಂದರು.