ಹೆಚ್‌. ವಿಶ್ವನಾಥ ಸ್ವಾಭಿಮಾನಿ, ರಾಜ್ಯಾಧ್ಯಕ್ಷ ಹುದ್ದೆ ಜತೆ ಜೆಡಿಎಸ್‌ನೂ ಬಿಡ್ತಾರೆ - ರೇಣುಕಾಚಾರ್ಯ ಭವಿಷ್ಯ

ರಾಜ್ಯಾಧ್ಯಕ್ಷ ಸ್ಥಾನಕ್ಕೆ ವಿಶ್ವನಾಥ್ ರಾಜೀನಾಮೆ ಸಲ್ಲಿಸಿದ್ದಾರೆ. ಅವರ ಸ್ವಾಭಿಮಾನಕ್ಕೆ ನಾನು‌ ಅಭಿನಂದನೆ ಸಲ್ಲಿಸುತ್ತೇನೆ. ಹಾಗೆಯೇ ಜೆಡಿಎಸ್ ಪಕ್ಷ ಬಿಟ್ಟರೆ ಒಳ್ಳೆಯದು ಎಂದು ರೇಣುಕಾಚಾರ್ಯ ಹೇಳಿದರು.

ದಾವಣಗೆರೆ:ನಾಮಕಾವಾಸ್ತೆಗೆ ಜೆಡಿಎಸ್ ರಾಜ್ಯಾಧ್ಯಕ್ಷ ಸ್ಥಾನ ನೀಡಲಾಗಿತ್ತು. ಸ್ವಾಭಿಮಾನಕ್ಕೆ‌ ಧಕ್ಕೆ ಬಂದಿದ್ದರಿಂದ ಹೆಚ್‌. ವಿಶ್ವನಾಥ್ ತಮ್ಮ ಸ್ಥಾನಕ್ಕೆ ರಾಜೀನಾಮೆ ಸಲ್ಲಿಸಿದ್ದಾರೆ. ಆದಷ್ಟು ಬೇಗ ಜೆಡಿಎಸ್​ನಿಂದಲೂ ಹೊರ ಬರಬೇಕು ಎಂದು ಹೊನ್ನಾಳಿ ಶಾಸಕ‌ ಎಂ ಪಿ ರೇಣುಕಾಚಾರ್ಯ ಪರೋಕ್ಷವಾಗಿ ಬಿಜೆಪಿಗೆ ಆಹ್ವಾನ ನೀಡಿದ್ದಾರೆ.

ನಗರದಲ್ಲಿ ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, ಪಕ್ಷಕ್ಕೆ ಕರೆತಂದು ಸಚಿವ ಸ್ಥಾನ‌ ನೀಡಲಿಲ್ಲ. ಹೀಗಾಗಿ ರಾಜ್ಯಾಧ್ಯಕ್ಷ ಸ್ಥಾನಕ್ಕೆ ರಾಜೀನಾಮೆ ಸಲ್ಲಿಸಿದ್ದಾರೆ. ಅವರ ಸ್ವಾಭಿಮಾನಕ್ಕೆ ನಾನು‌ ಅಭಿನಂದನೆ ಸಲ್ಲಿಸುತ್ತೇನೆ. ಹಾಗೆಯೇ ಜೆಡಿಎಸ್ ಪಕ್ಷ ಬಿಟ್ಟರೆ ಒಳ್ಳೆಯದು ಎಂದು ರೇಣುಕಾಚಾರ್ಯ ಹೇಳಿದರು.

ನಿಂಬೆಹಣ್ಣಿನಿಂದ ದೇವೇಗೌಡರ ಸೋಲು :

ನಿಂಬೆಹಣ್ಣು ದೇವೇಗೌಡರ ಸೋಲಿಗೆ ಕಾರಣವಾಯ್ತು. ನಿಂಬೆಹಣ್ಣು ಹಿಡಿದು ಹಾಸನದಿಂದ ದೇವೇಗೌಡರನ್ನು ಓಡಿಸಿ ಅವರ ಮಾಜಿ ಪ್ರಧಾನಿಯ ದುರಂತ ಸೋಲಿಗೆ ರೇವಣ್ಣ ಕುಟುಂಬವೇ ಕಾರಣವಾಯ್ತು ಎಂದು ರೇಣುಕಾಚಾರ್ಯ ಕುಟುಕಿದರು.

ಗ್ರಾಮ ವಾಸ್ತವ್ಯ ಕಪಟ ನಾಟಕ :

ಸ್ಪೀಕರ್ ರಮೇಶ್ ಕುಮಾರ್ ಸರ್ಕಾರಕ್ಕೆ ಪತ್ರ ಬರೆದು ಚಾಟಿ‌ ಬೀಸಿದ್ದಾರೆ.‌ ಜನರು ಈ‌ ಮೈತ್ರಿ ಸರ್ಕಾರ ನೋಡಿ ಬೇಸತ್ತಿದ್ದಾರೆ. ಈ ವಿಷಯ ಡೈವರ್ಟ್​ ಮಾಡಲು ಪಂಚತಾರಾ ಹೋಟೆಲ್​ನಿಂದ ಗ್ರಾಮ ವಾಸ್ತವ್ಯಕ್ಕೆ ಶಿಫ್ಟ್ ಆಗುತ್ತಿದ್ದಾರೆ. ಗ್ರಾಮ ವಾಸ್ತವ್ಯ ಕಪಟ ನಾಟಕ ಎಂದ ಅವರು, ನೂರಕ್ಕೆ ನೂರರಷ್ಟು ಸರ್ಕಾರ ಬೀಳುವುದರಲ್ಲಿ ಅನುಮಾನವಿಲ್ಲ ಎಂದು ಭವಿಷ್ಯ ನುಡಿದಿದ್ದಾರೆ.