ದಾವಣಗೆರೆಯಲ್ಲಿಂದು ಒಂದೇ ದಿನ ಮತ್ತೆ 12 ಕೊರೊನಾ ದೃಢ: 44ಕ್ಕೆ ಏರಿದ ಸೋಂಕಿತರ ಸಂಖ್ಯೆ

ದಾವಣಗೆರೆ ಜಿಲ್ಲೆಯಲ್ಲಿ ಇಂದು 12 ಕೊರೊನಾ ಪ್ರಕರಣಗಳು ಪತ್ತೆಯಾಗಿದ್ದು, ಮೃತರ ಸಂಖ್ಯೆ ಮೂರಕ್ಕೇರಿದೆ. ಜಿಲ್ಲೆಯಲ್ಲಿ ಒಟ್ಟು 44 ಜನರಿಗೆ ಸೋಂಕು ತಗುಲಿದೆ.

ದಾವಣಗೆರೆ: ಬೆಣ್ಣೆ ನಗರಿಯಲ್ಲಿ ಮಂಗಳವಾರ 12 ಕೊರೊನಾ ಪಾಸಿಟಿವ್​​​​ ಪ್ರಕರಣಗಳು ಪತ್ತೆಯಾಗಿವೆ. ಈ ಮೂಲಕ ಸೋಂಕಿತರ ಸಂಖ್ಯೆ 44ಕ್ಕೆ ಏರಿದೆ. ಜೊತೆಗೆ ಮತ್ತೊಬ್ಬರು ಸಾವನ್ನಪ್ಪಿದ್ದು, ಜಿಲ್ಲೆಯಲ್ಲಿ ಕೊರೊನಾಗೆ ಮೂವರು ಬಲಿಯಾಗಿದ್ದಾರೆ.

ಕೇವಲ ಐದು ದಿನಗಳ ಹಿಂದೆ ಎರಡು ಪ್ರಕರಣ ಮಾತ್ರ ಇದ್ದವು. ನಂತರ 556 ಹಾಗೂ 533 ಸೋಂಕಿತರಿಂದ ಹಲವರಿಗೆ ಕೊರೊನಾ ಹರಡಿರುವುದು ದೃಢಪಟ್ಟಿದೆ. ರೋಗಿ-662 ಕೊರೊನಾ ಪೀಡಿತ 50 ವರ್ಷದ ಮಹಿಳೆ ಮೃತಪಟ್ಟಿದ್ದು, ನ್ಯುಮೋನಿಯಾ ಹಾಗೂ ಹೃದಯಾಘಾತದಿಂದ ಬಳಲುತ್ತಿದ್ದರು. ಚಿಕಿತ್ಸೆ ಫಲಕಾರಿಯಾಗದೆ ಮೃತಪಟ್ಟಿದ್ದಾರೆ.‌ ಈ ಮಹಿಳೆ ಮೃತಪಟ್ಟ ವೃದ್ಧ 556 ಸಂಖ್ಯೆಯ ಸೋಂಕಿತನ ದ್ವಿತೀಯ ಸಂಪರ್ಕದಲ್ಲಿದ್ದಾಕೆ.

ಇಂದು ಇಬ್ಬರು ಬಾಲಕರಿಗೆ ಸೋಂಕು ತಗುಲಿದೆ. ರೋಗಿ 671 ಐದು ವರ್ಷದ ಬಾಲಕ ಹಾಗೂ 15 ವರ್ಷದ ಬಾಲಕ (ರೋಗಿ 667)ಹಾಗೂ 19 ವರ್ಷದ ಯುವತಿ (ರೋಗಿ 668) ಸೋಂಕು ತಗುಲಿದೆ. ಇನ್ನು 556 ಸೋಂಕಿತ ವೃದ್ಧನಿಂದ 5 ಮಂದಿ ಹಾಗೂ 581 ಸೋಂಕಿತನಿಂದ ಏಳು ಮಂದಿಗೆ ಸೋಂಕು ತಗುಲಿದೆ.

ಇಂದು ಒಂದೇ ದಿನ ವೃದ್ಧನಿಂದ ಐದು ಮಂದಿಗೆ ಸೋಂಕು ತಗುಲಿದೆ. ಪ್ರಾಥಮಿಕ ಸಂಪರ್ಕದಲ್ಲಿದ್ದವರಿಗೂ ಕೊರೊನಾ ಬಂದಿದ್ದು, ಇವರಿಂದಲೂ ಕೊರೊನಾ ಹರಡುತ್ತಿರುವುದು ಜಿಲ್ಲಾಡಳಿತಕ್ಕೆ ತಲೆಬಿಸಿ ಮಾಡಿದೆ. ಗ್ರೀನ್ ಝೋನ್​​ನಲ್ಲಿದ್ದ ದಾವಣಗೆರೆ ಈಗ ರೆಡ್ ಝೋನ್ ಆಗ್ತಿದೆ.