ಸಂಚಾರಿ ನಿಯಮ‌ ಉಲ್ಲಂಘನೆ:16 ಸಾವಿರ ದಂಡ ಕಟ್ಟಿದ ಬೈಕ್​ ಮಾಲೀಕ

ಸಂಚಾರಿ ನಿಯಮ‌ ಉಲ್ಲಂಘನೆ ಮಾಡಿದ ದ್ವಿಚಕ್ರವಾಹನದ ಮಾಲೀಕ - ಒಟ್ಟು 16 ಸಾವಿರ‌ ದಂಡ ತೆತ್ತ ದಾವಣಗೆರೆ ಬೈಕ್​ ಮಾಲೀಕ.

ದಾವಣಗೆರೆ:ಹೆಲ್ಮೆಟ್ ಇಲ್ಲದೇ ವಾಹನ ಚಾಲನೆ ಮತ್ತು ವಾಹನ ಚಾಲನೆ ಮಾಡುವ ವೇಳೆ ಮೊಬೈಲ್​ನಲ್ಲಿ ಮಾತನಾಡುವ ಮೂಲಕ ಸಂಚಾರಿ ನಿಯಮ‌ ಉಲ್ಲಂಘನೆ ಮಾಡಿದ ದ್ವಿಚಕ್ರವಾಹನದ ಮಾಲೀಕನ ವಿರುದ್ಧ ಸಂಚಾರಿ ಪೊಲೀಸರು ಬರೋಬ್ಬರಿ 16 ಸಾವಿರ ದಂಡ ಹಾಕಿದ್ದಾರೆ. ನಿರಂತರ ಸಂಚಾರಿ ನಿಯಮ ಉಲ್ಲಂಘನೆ ಮಾಡಿದ ಬೈಕ್ ನಂಬರ್ ಕೆಎ 17 ಇ ಎಹೆಚ್ 0498 ನೋಂದಣಿಯ ದ್ವಿಚಕ್ರವಾಹನದ ಮಾಲೀಕ ವಿರೇಶ್ ಎಂಬುವರು 16 ಸಾವಿರ ದಂಡ‌ ತೆತ್ತವರು.

ದಾವಣಗೆರೆ ನಗರದ ನಿವಾಸಿ ವಿರೇಶ್ ಒಟ್ಟು 26 ಸಲ ಸಂಚಾರಿ ನಿಯಮ ಉಲ್ಲಂಘನೆ ಮಾಡಿದ್ದು, ಈ 26 ಕೇಸ್​​ಗಳ ಪೈಕಿ ಹೆಲ್ಮೆಟ್ ಇಲ್ಲದೇ ಬೈಕ್ ಸಂಚಾರ 23 ಹಾಗೂ ಬೈಕ್ ಚಲಿಸುವಾಗ ಮೊಬೈಲ್ ಬಳಕೆ 03 ಕೇಸ್ ಹಾಕಲಾಗಿತ್ತು. ಉತ್ತರ ಸಂಚಾರಿ ಪೊಲೀಸ್ ಠಾಣೆಯಲ್ಲಿ ಈ ಬಗ್ಗೆ ಪ್ರಕರಣಗಳು ದಾಖಲಾಗಿದ್ದವು. ದಾವಣಗೆರೆ ಸಂಚಾರಿ ಠಾಣೆಯ ಪೊಲೀಸರ ಕೈಗೆ ಅಚಾನಕ್ ಆಗಿ ಸಿಕ್ಕಾಗ ವಿರೇಶ್ ಬೈಕ್‌ ಮೇಲಿದ್ದ ಒಟ್ಟು 26 ಕೇಸ್​​ಗಳಿಗೆ ಸಂಬಂಧಿಸಿದಂತೆ ಒಟ್ಟು 16 ಸಾವಿರ‌ ದಂಡವನ್ನು ಕಟ್ಟಿಸಿಕೊಂಡಿದ್ದಾರೆ.

ಸಂಚಾರಿ ನಿಯಮ‌ ಉಲ್ಲಂಘನೆಗೆ 16 ಸಾವಿರ ದಂಡ ಕಟ್ಟಿದ ಬೈಕ್​ ಮಾಲೀಕ

ನೋಟಿಸ್​ಗೆ ಕ್ಯಾರೇ ಎನ್ನದ ಮಾಲೀಕ: ಹೆಲ್ಮೆಟ್, ಮೊಬೈಲ್ ಬಳಕೆಗೆ ಸಂಬಂಧಿಸಿದಂತೆ ಇಲ್ಲಿನ ಆಯಾಯ ಸರ್ಕಲ್​​ನಲ್ಲಿನ ಸಿಸಿಕ್ಯಾಮರಾಗಳು ಸಂಚಾರಿ ನಿಯಮ‌ ಉಲ್ಲಂಘನೆ ಮಾಡಿದವರ ವಾಹನ ಮತ್ತು ನಂಬರ್ ಪ್ಲೇಟ್ ಕ್ಯಾಪ್ಚರ್​ ಮಾಡುವ ತಂತ್ರಜ್ಞಾನ ಹೊಂದಿದೆ.‌ ಇದೇ ಮಾರ್ಗದಲ್ಲಿ ಓಡಾಡಿದ್ದ ವಿರೇಶ್ ಸಾಕಷ್ಟು ಬಾರಿ ಸಂಚಾರಿ ನಿಯಮ‌ ಉಲ್ಲಂಘನೆ ಮಾಡಿದ್ದು ಗೊತ್ತಾಗಿತ್ತು. ಹಾಗಾಗಿ ಕೆಎ 17 ಇ ಎಹೆಚ್ 0498 ನೋಂದಣಿಯ ಬೈಕ್​ ಮಾಲೀಕರಿಗೆ ಸಂಬಂಧಪಟ್ಟ ಅಧಿಕಾರಿಗಳು ದಂಡ ಕಟ್ಟುವಂತೆ ಸಾಕಷ್ಟು ಬಾರಿ ನೋಟಿಸ್​ ಕಳಿಸಿದ್ದರು. ಆದರೆ ವಿರೇಶ್ ಮಾತ್ರ ಯಾವುದಕ್ಕೂ ಕ್ಯಾರೆ ಎಂದಿರಲಿಲ್ಲ. ಸೋಮವಾರ ಸಿಬ್ಬಂದಿಯ ಕೈಗೆ ಸಿಕ್ಕಾಗ 16 ಸಾವಿರ ದಂಡ ಕಟ್ಟಿರುವುದಾಗಿ ತಿಳಿದು ಬಂದಿದೆ.

ಇದನ್ನೂ ಓದಿ:ಬೆಂಗಳೂರಿಗೆ ನಾಲ್ಕು ಹೊಸ ಸಂಚಾರ ಪೊಲೀಸ್ ಠಾಣೆ ಸ್ಥಾಪನೆಗೆ ಸರ್ಕಾರದ ಸಮ್ಮತಿ