ದ.ಕ.ಜಿಲ್ಲೆಯಲ್ಲಿ ಇಂದು 7 ಮಂದಿಗೆ ಸೋಂಕು: 17 ಸೋಂಕಿತರು ಗುಣಮುಖ

ದ.ಕ.ಜಿಲ್ಲೆಯಲ್ಲಿ ಇಂದು ಏಳು ಮಂದಿಯಲ್ಲಿ‌ ಸೋಂಕು ದೃಢಗೊಂಡಿದ್ದು , ಗುಣಮುಖರಾಗುವ ಸಂಖ್ಯೆಯೂ ನಿಧಾನಕ್ಕೆ ಹೆಚ್ಚುತ್ತಿದೆ.

ಮಂಗಳೂರು: ಕುವೈತ್‌ನಿಂದ ಬಂದ ಮೂವರಿಗೆ ಐ.ಎಲ್.ಐ (Influenza Like Illness) ಪ್ರಕರಣದಿಂದ ಓರ್ವನಿಗೆ, ರೋಗಿ ಸಂಖ್ಯೆ P-6618 ಪ್ರಾಥಮಿಕ ಸಂಪರ್ಕದಿಂದ ಇಬ್ಬರಿಗೆ ಹಾಗೂ ಸಾರಿ(Severe Acute Respiratory Influence)ಪ್ರಕರಣದಿಂದ‌ ಓರ್ವನಿಗೆ ಸೋಂಕು ತಗುಲಿದೆ.

ಐ.ಎಲ್.ಐ ಪ್ರಕರಣದಲ್ಲಿ ಪುತ್ತೂರಿನ 70 ವರ್ಷದ ವೃದ್ಧನಿಗೆ ಸೋಂಕು ತಗುಲಿದೆ. ಕುವೈತ್‌ನಿಂದ ಜೂನ್ 17 ರಂದು ಆಗಮಿಸಿದ 26, 32 ವರ್ಷದ ಮಹಿಳೆಯರು, 59 ವರ್ಷದ ವೃದ್ಧನನ್ನು ಕ್ವಾರಂಟೈನ್‌ನಲ್ಲಿ ಇರಿಸಲಾಗಿತ್ತು. ಇಂದು ಇವರ ಗಂಟಲು ದ್ರವದ ಮಾದರಿ ಲಭ್ಯವಾಗಿದ್ದು, ಇವರಲ್ಲಿ ಸೋಂಕು ದೃಢಗೊಂಡಿದೆ.

ರೋಗಿ ಸಂಖ್ಯೆ P-6618 ಪ್ರಾಥಮಿಕ ಸಂಪರ್ಕ ಹೊಂದಿರುವ 30 ವರ್ಷದ ಮಹಿಳೆ ಹಾಗೂ 38 ವರ್ಷದ ಪುರುಷ ಈ ಇಬ್ಬರನ್ನೂ ಕ್ವಾರಂಟೈನ್‌ನಲ್ಲಿ‌ ಇರಿಸಲಾಗಿತ್ತು. ಇಂದು ಇವರ ಗಂಟಲು ದ್ರವದ ಮಾದರಿ ಲಭ್ಯವಾಗಿದ್ದು, ಇವರಲ್ಲಿ ಸೋಂಕು ದೃಢಗೊಂಡಿದೆ. ಬೆಳ್ತಂಗಡಿ ನಿವಾಸಿ 56 ವರ್ಷದ ಪುರುಷನಿಗೆ ಸಾರಿ ಪ್ರಕರಣ ದಲ್ಲಿ ಸೋಂಕು ತಗುಲಿದೆ. ಇವರೆಲ್ಲರನ್ನೂ ವೆನ್ಲಾಕ್ ಕೋವಿಡ್ ಆಸ್ಪತ್ರೆಗೆ ದಾಖಲಿಸಲಾಗಿದೆ.

ಇಂದು 17 ಮಂದಿ ಗುಣಮುಖ:

ಜಿಲ್ಲೆಯಲ್ಲಿ ಸೋಂಕು ತಗುಲಿ ವೆನ್ಲಾಕ್ ಕೋವಿಡ್ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದ 17 ಮಂದಿ‌ ಗುಣಮುಖರಾಗಿದ್ದಾರೆ. ಇವರ ಗಂಟಲು ದ್ರವ ಪರೀಕ್ಷೆಯಲ್ಲಿ ಎರಡು ಬಾರಿ ನೆಗೆಟಿವ್ ವರದಿ ಬಂದಿರುವ ಹಿನ್ನೆಲೆಯಲ್ಲಿ ಗುಣಮುಖ ಎಂದು ಘೋಷಿಸಿ ಮನೆಗೆ ಕಳುಹಿಸಲಾಗಿದೆ.

ಜಿಲ್ಲೆಯಲ್ಲಿರುವ ಕೋವಿಡ್‌ ಪ್ರಕರಣಗಳ ವಿವರ:

ಜಿಲ್ಲೆಯಲ್ಲಿ ಈವರೆಗೆ 433 ಪ್ರಕರಣಗಳು ದೃಢಪಟ್ಟಿದೆ. ಇದರಲ್ಲಿ 238 ಮಂದಿ ಗುಣಮುಖರಾಗಿ ಮನೆಗೆ ತೆರಳಿದ್ದಾರೆ. ಈವರೆಗೆ ಎಂಟು ಮಂದಿ ಸಾವನ್ನಪ್ಪಿದ್ದು, 187 ಮಂದಿ‌ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ. ಇಂದು 132 ಮಂದಿಯ ವರದಿ ಬಂದಿದೆ. ಇವರ ಪೈಕಿ 125 ಮಂದಿಯ ವರದಿ ನೆಗೆಟಿವ್ ಆಗಿದೆ. 7 ಮಂದಿಯಲ್ಲಿ ಸೋಂಕು ದೃಢಗೊಂಡಿದೆ. ಇಂದು 294 ಮಂದಿಯ ಗಂಟಲು ದ್ರವವನ್ನು ತಪಾಸಣೆಗೆ ಕಳುಹಿಸಲಾಗಿದೆ. 218 ಮಂದಿಯ ವರದಿಗೆ ಕಾಯಲಾಗುತ್ತಿದೆ.