ಮಂಗಳೂರಿನಲ್ಲಿ ಮೋಹನ್​ ಭಾಗವತ್​... ನಾಳೆ ಅರ್ಧ ಮಂಡಲೋತ್ಸವದಲ್ಲಿ ಭಾಗಿ

ಆರ್​ಎಸ್​ಎಸ್​ ಮುಖ್ಯಸ್ಥ ಮೋಹನ್ ಭಾಗವತ್ ಮಂಗಳೂರಿಗೆ ಬಂದಿದ್ದು, ನಗರದ ಬಜ್ಪೆ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ಬಂದಿಳಿದರು.

ಮಂಗಳೂರು: ಆರ್​ಎಸ್​ಎಸ್​ ಮುಖ್ಯಸ್ಥ ಮೋಹನ್ ಭಾಗವತ್ ಮಂಗಳೂರು ನಗರಕ್ಕೆ ಆಗಮಿಸಿದ್ದಾರೆ.ಹರಿಹರಪುರದ ತುಂಗಾ ತಟದಲ್ಲಿರುವ ಪ್ರಬೋಧಿನಿ ಗುರುಕುಲದಲ್ಲಿ ನಾಳೆ ನಡೆಯುವ ಅರ್ಧಮಂಡಲೋತ್ಸವ ಸಮಾರೋಪ ಸಮಾರಂಭದಲ್ಲಿ ಅವರು ಭಾಗವಹಿಸಲಿದ್ದಾರೆ.

ಇಂದು ಮುಂಬೈನಿಂದ ವಿಮಾನದ ಮೂಲಕ ಮಂಗಳೂರು ವಿಮಾನ ನಿಲ್ದಾಣದಲ್ಲಿ ಬಂದಿಳಿದ ಅವರು ನಗರದ ಕೂಳೂರು-ಕಾವೂರು ಮಧ್ಯದಲ್ಲಿರುವ ಅಂಬಿಕಾ ನಗರದ ಆರ್ ಎಸ್ ಎಸ್ ನ ಹಿರಿಯ ಕಾರ್ಯಕರ್ತರೋರ್ವರ ಮನೆಯಲ್ಲಿ ವಿಶ್ರಾಂತಿ ಪಡೆಯಲಿದ್ದು, ಬಳಿಕ‌ ಇಂದು ಸಂಜೆ ಹರಿಹರಪುರಕ್ಕೆ ತೆರಳಿ ನಾಳೆ ಅರ್ಧಮಂಡಲೋತ್ಸವ ಸಮಾರೋಪ ಸಮಾರಂಭದಲ್ಲಿ ಭಾಗವಹಿಸಲಿದ್ದಾರೆ. ಅಲ್ಲಿಂದ ನಾಳೆ ಮರಳಿ ಮಂಗಳೂರಿಗೆ ಬಂದು ಮತ್ತೆ ವಿಮಾನದ ಮೂಲಕ ಮುಂಬೈಗೆ ತೆರಳಲಿದ್ದಾರೆ.