ಕುಕ್ಕೆ ಸುಬ್ರಹ್ಮಣ್ಯದಲ್ಲಿ ಸರ್ಪಸಂಸ್ಕಾರ ಮಾಡಿಸಿತ್ತು ನಟ ರಿಷಿ ಕಪೂರ್ ಕುಟುಂಬ

ಬಾಲಿವುಡ್​​​​​ನ ಹಿರಿಯ ನಟ, ಪ್ರಖ್ಯಾತ ಕಪೂರ್ ಮನೆತನದ ಕಲಾವಿದ 67 ವರ್ಷದ ರಿಷಿ ಕಪೂರ್ ನಿಧನ ಹೊಂದಿದ್ದಾರೆ.‌ ರಿಷಿ ಕಪೂರ್ ಅವರು ಕ್ಯಾನ್ಸರ್ ಕಾಯಿಲೆಯಿಂದ ಬಳಲುತ್ತಿದ್ದರು.

ಸುಬ್ರಹ್ಮಣ್ಯ: ಹಿಂದಿ ಚಲನಚಿತ್ರ ರಂಗದ ಖ್ಯಾತ ನಟ ರಿಷಿ ಕಪೂರ್ ಕುಟುಂಬ ತುಳುನಾಡಿನ ಐತಿಹಾಸಿಕ ಮತ್ತು ಪುಣ್ಯ ನಾಗಕ್ಷೇತ್ರ ಕುಕ್ಕೆ ಸುಬ್ರಹ್ಮಣ್ಯಕ್ಕೆ 2003ರಲ್ಲಿ ಆಗಮಿಸಿ ಸರ್ಪಸಂಸ್ಕಾರ ಮಾಡಿಸಿತ್ತು.

2003 ರ ಕುಕ್ಕೆ ಸುಬ್ರಹ್ಮಣ್ಯ ದೇವಳಕ್ಕೆ ಭೇಟಿ ನೀಡಿದ್ದ ರಿಷಿ ಕಪೂರ್

ರಿಷಿ ಕಪೂರ್ ಕುಟುಂಬ 2003 ರ ಸೆಪ್ಟೆಂಬರ್ ತಿಂಗಳಲ್ಲಿ ದಕ್ಷಿಣ ಕನ್ನಡ ಜಿಲ್ಲೆಯ ಕುಕ್ಕೆ ಸುಬ್ರಹ್ಮಣ್ಯ ದೇವಳಕ್ಕೆ ಭೇಟಿ ನೀಡಿ, ಕ್ಷೇತ್ರದಲ್ಲಿ ನಡೆಯುವ ವಿಶೇಷ ಸೇವೆಯಾದ ಸರ್ಪಸಂಸ್ಕಾರ ಪೂಜಾ ಕಾರ್ಯವನ್ನು ನೆರವೇರಿಸಿತ್ತು. ರಾಜ್​ಕಪೂರ್, ಅವರ ಪತ್ನಿ ಕೃಷ್ಣಾ ಕಪೂರ್, ಮಕ್ಕಳಾದ ರಣಧೀರ್ ಕಪೂರ್, ರಿಷಿ ಕಪೂರ್, ರಾಜೀವ್ ಕಪೂರ್, ರಿಷಿಯ ಪತ್ನಿ ನಟಿ ನೀತೂ ಕಪೂರ್ ಕುಕ್ಕೆ ಸುಬ್ರಹ್ಮಣ್ಯ ಕ್ಷೇತ್ರಕ್ಕೆ ಆಗಮಿಸಿದ್ದರು.

ಸುಬ್ರಹ್ಮಣ್ಯದಲ್ಲಿ ಖಾಸಗಿ ವಸತಿಗೃಹದ ಮಾಲಿಕರಾದ ವಿ ಎಸ್ ನಾಯಕ್ ಅವರು ಈ ಸಿನಿಮಾ ತಾರೆಗಳನ್ನು ಸುಬ್ರಹ್ಮಣ್ಯಕ್ಕೆ ಕರೆತಂದಿದ್ದರು. ಈ ಸಮಯದಲ್ಲಿ ಕುಕ್ಕೆ ಸುಬ್ರಹ್ಮಣ್ಯದಲ್ಲಿ ಸರ್ಪಸಂಸ್ಕಾರ ಸೇವೆ ನಡೆಸಿದ ರಿಷಿ ಕಪೂರ್ ಕುಟುಂಬವು ಐದು ದಿನಗಳು ಸುಬ್ರಹ್ಮಣ್ಯದಲ್ಲೇ ಉಳಿದುಕೊಂಡಿತ್ತು. ಆ ಸಂದರ್ಭದಲ್ಲಿ ಕುಕ್ಕೆ ಸುಬ್ರಹ್ಮಣ್ಯದಲ್ಲಿರುವ ಶಾಂತಲಾ ಸ್ಟುಡಿಯೋ ಮಾಲಿಕರಾದ ಲೋಕೇಶ್ ಬಿ.ಎನ್ ಎಂಬುವರು ರಿಷಿ ಕಪೂರ್ ಕುಟುಂಬದ ಪೋಟೋವನ್ನು ಕ್ಲಿಕ್ಕಿಸಿದ್ದರು.