ಕಡಬ:ನನ್ನ ಬಡತನ, ಅನಕ್ಷರತೆಯು ನನಗೆ ಸಾಧನೆಯೆ ಪಥದಲ್ಲಿ ಸಾಗಲು ಮೂಲ ಪ್ರೇರಣೆಯಾಯಿತು. ಜನರ ಪ್ರೀತಿ ವಿಶ್ವಾಸವೇ ಬಡವನಾದ ನನ್ನನ್ನು ಗೌರವಾನ್ವಿತ ರಾಷ್ಟ್ರಪತಿ, ಪ್ರಧಾನಿಗಳ ಮುಂದೆ ತಂದು ನಿಲ್ಲಿಸಿತು ಎಂದು ಪದ್ಮಶ್ರೀ ಪ್ರಶಸ್ತಿ ಪುರಸ್ಕೃತ ಶಿಕ್ಷಣ ಸಂತ ಹರೇಕಳ ಹಾಜಬ್ಬ ಹೇಳಿದರು.
ಮಂಗಳವಾರ ಕಡಬ ಸಮೀಪದ ಪಿಜಕಳ ಮಹಾವಿಷ್ಣು ದೇವಸ್ಥಾನದ ವಠಾರದಲ್ಲಿ ವಿವಿಧ ಸಂಘ ಸಂಸ್ಥೆಗಳ ಸಹಭಾಗಿತ್ವದಲ್ಲಿ ನಡೆದ ಸನ್ಮಾನ ಸಮಾರಂಭದಲ್ಲಿ ಅವರು ಮಾತನಾಡಿದರು. ಹಲವರಂತೆ ನನ್ನ ಬಡತನವೂ ನನ್ನ ವಿದ್ಯಾಭ್ಯಾಸವನ್ನು ನುಂಗಿಹಾಕಿತು, ಆದರೆ ಇತರ ಬಡ ಜನರ ಮಕ್ಕಳು ವಿದ್ಯಾಭ್ಯಾಸದಿಂದ ವಂಚಿತರಾಗಬಾರದು ಎನ್ನುವ ಸದುದ್ದೇಶದಿಂದ ಕಿತ್ತಳೆ ಹಣ್ಣು ಮಾರುವ ಕಾಯಕದೊಂದಿಗೆ ಶಾಲೆ ನಿರ್ಮಾಣದ ಕನಸು ಹೊಂದಿ, ನಂತರ ಅದನ್ನು ಊರಿನ ಹಿರಿಯರು, ದಾನಿಗಳು, ಜನಪ್ರತಿನಿಧಿಗಳ ಸಹಕಾರದಿಂದ ಸಾಕಾರಗೊಳಿಸಿದೆ ಎಂದರು.
ಪದ್ಮಶ್ರೀ ಹರೇಕಳ ಹಾಜಬ್ಬನವರಿಗೆ ಸನ್ಮಾನ