ಕೊರೊನಾ ಕರಿಛಾಯೆ: 86 ಕೋಟಿ ರೂ. ನಷ್ಟ ಅನುಭವಿಸಿದ MRPL ಸಂಸ್ಥೆ

ಕೊರೊನಾ ಸೋಂಕಿನ ತಡೆಗೆ ಲಾಕ್​ಡೌನ್ ವಿಧಿಸಲಾಗಿತ್ತು. ಈ ವೇಳೆ, ಎಂಆರ್​ಪಿಎಲ್ ನ ಕೆಲ ಘಟಕಗಳು ಬಂದ್ ಆಗಿದ್ದು ತೈಲ ಸರಬರಾಜಿಗೆ ಹೊಡೆತ ಬಿದ್ದಿತ್ತು. ಪರಿಣಾಮ 2021-22ನೇ ಆರ್ಥಿಕ ವರ್ಷದ ಮೊದಲ ತ್ರೈಮಾಸಿಕದಲ್ಲಿ ಮಂಗಳೂರಿನ ಎಂಆರ್​ಪಿಎಲ್ ಸಂಸ್ಥೆಗೆ 86 ಕೋಟಿ ರೂ. ನಷ್ಟ ಉಂಟಾಗಿದೆ.

ಮಂಗಳೂರು: ಕೋವಿಡ್​ ಹಿನ್ನೆಲೆ ಮಂಗಳೂರಿನ ಎಂಆರ್​ಪಿಎಲ್ ಸಂಸ್ಥೆಗೆ 2021-22ನೇ ಆರ್ಥಿಕ ವರ್ಷದ ಮೊದಲ ತ್ರೈಮಾಸಿಕದಲ್ಲಿ 86 ಕೋಟಿ ರೂ. ನಷ್ಟ ಉಂಟಾಗಿದೆ ಎಂದು ತಿಳಿದು ಬಂದಿದೆ.

ಮೊದಲ ತ್ರೈಮಾಸಿಕ ಅವಧಿ ಜೂನ್ 30ಕ್ಕೆ ಕೊನೆಗೊಂಡಿದ್ದು, ಈ ವೇಳೆ ಎಂಆರ್​ಪಿಎಲ್​ಗೆ 86 ಕೋಟಿ ರೂ. ನಷ್ಟ ಉಂಟಾಗಿದೆ. ಕಳೆದ ಆರ್ಥಿಕ ವರ್ಷದ ಈ ಅವಧಿಗೆ ಸಂಸ್ಥೆಗೆ 524 ಕೋಟಿ ರೂ. ನಷ್ಟ ಸಂಭವಿಸಿತ್ತು. ಈ ತ್ರೈಮಾಸಿಕ ಅವಧಿಯಲ್ಲಿ 15,143 ಕೋಟಿ ರೂ. ವ್ಯವಹಾರ ನಡೆದಿದ್ದು, ಕಳೆದ ವರ್ಷ ಇದೇ ಅವಧಿಯಲ್ಲಿ 6,408 ಕೋಟಿ ವ್ಯವಹಾರ ನಡೆದಿತ್ತು.

ಕೊರೊನಾ ಕಾರಣದಿಂದ ಇಂಧನಕ್ಕೆ ಬೇಡಿಕೆ ಕಡಿಮೆಯಾಗಿದ್ದರಿಂದ ಎಂಆರ್​ಪಿಎಲ್ ಸಂಸ್ಥೆಯ ವ್ಯವಹಾರಕ್ಕೆ ಹೊಡೆತ ಬಿದ್ದಿದೆ. ಕೊರೊನಾ ಸೋಂಕಿನ ತಡೆಗೆ ಲಾಕ್​ಡೌನ್ ವಿಧಿಸಲಾಗಿತ್ತು. ಈ ವೇಳೆ, ಎಂಆರ್​ಪಿಎಲ್​​​ನ ಕೆಲ ಘಟಕಗಳು ಬಂದ್ ಆಗಿದ್ದು, ತೈಲ ಸರಬರಾಜಿಗೆ ಹೊಡೆತ ಬಿದ್ದಿದೆ.

ಇನ್ನು ಕಂಪನಿಯ ಷೇರು ಮುಖಬೆಲೆಯನ್ನು 10 ರೂ. ಗಳಿಂದ 10 ಸಾವಿರ ರೂ.ಗಳಿಗೆ ಏರಿಸಲು ಅನುಮತಿ ದೊರಕಿದ್ದು, ಈ ಮೂಲಕ ಸಂಪನ್ಮೂಲ ಕ್ರೋಢೀಕರಣಕ್ಕೆ ಕಂಪನಿ ಮುಂದಾಗಿದೆ.