ವರ್ಷದಲ್ಲಿ ಎರಡು ಬಾರಿ ಫಲ ನೀಡುವ "ಮಂಗಳ ಅರ್ಲಿ" ಹಲಸಿನ ತಳಿ ಅಭಿವೃದ್ಧಿ

ಸಾಮಾನ್ಯವಾಗಿ ಹಲಸಿನ ಮರಗಳು ವರ್ಷಕ್ಕೊಮ್ಮೆ ಹಲಸಿನ ಹಣ್ಣನ್ನು ಬಿಡುತ್ತವೆ. ಆದರೆ ಇಲ್ಲೊಬ್ಬರು ವರ್ಷಕ್ಕೆ ಎರಡು ಬಾರಿ ಫಲ ನೀಡುವ ಮಂಗಳ ಅರ್ಲಿ ಎಂಬ ಹಲಸಿನ ತಳಿಯನ್ನು ಅಭಿವೃದ್ಧಿಪಡಿಸಿದ್ದಾರೆ.

ಮಂಗಳೂರು: ಸಾಮಾನ್ಯವಾಗಿ ಹಲಸಿನ ಮರಗಳು ವರ್ಷಕ್ಕೊಮ್ಮೆ ಹಲಸಿನ ಹಣ್ಣನ್ನು ಬಿಡುತ್ತವೆ. ಆದರೆ ಇಲ್ಲೊಬ್ಬರು ವರ್ಷಕ್ಕೆ ಎರಡು ಬಾರಿ ಫಲ ನೀಡುವ ಮಂಗಳ ಅರ್ಲಿ ಎಂಬ ಹಲಸಿನ ತಳಿಯನ್ನು ಅಭಿವೃದ್ಧಿ ಪಡಿಸಿದ್ದಾರೆ.

ಇಲ್ಲಿನ ಚಿಗುರು ನರ್ಸರಿಯ ಯು.ಬಿ ಸರ್ವೇಶ್ ರಾವ್ ಎಂಬವರು ವರ್ಷದಲ್ಲಿ ಎರಡು ಬಾರಿ ಫಲ ನೀಡುವ ಹಲಸಿನ ಹಣ್ಣಿನ ತಳಿಯನ್ನು ಅಭಿವೃದ್ಧಿಪಡಿಸಿದ್ದಾರೆ. ಇದರ ಜೊತೆಗೆ ಇವರು ಹಲಸುಗಳ ವಿಭಿನ್ನ ತಳಿಗಳ ಅಭಿವೃದ್ಧಿಯಲ್ಲಿ ತೊಡಗಿಸಿಕೊಂಡಿದ್ದಾರೆ. ಮೂರು ವರ್ಷಗಳ ಸತತ ಪರಿಶ್ರಮದಿಂದ ಮಂಗಳ ಅರ್ಲಿ ಎಂಬ ಹಲಸಿನ ತಳಿಯನ್ನು ಇವರು ಅಭಿವೃದ್ದಿಪಡಿಸಿದ್ದು, ಈ‌ ತಳಿಯ ಹಲಸಿನ ಗಿಡವು ಡಿಸೆಂಬರ್ ಮತ್ತು ಜೂನ್ ತಿಂಗಳಲ್ಲಿ ಹಣ್ಣು ಬಿಡುತ್ತದೆ. ಈ ತಳಿಯ ಹಲಸಿನ ಮರವು ಮೂರು ವರ್ಷದಲ್ಲಿ ಫಲ ನೀಡುವುದರ ಜೊತೆಗೆ ಈ ಗಿಡದ ಸರಿಯಾದ ಆರೈಕೆಯಿಂದ ವರ್ಷಕ್ಕೆ ಎರಡು ಬಾರಿ ಹಲಸಿನ ಹಣ್ಣನ್ನು ಪಡೆಯಬಹುದಾಗಿದೆ.

"ಮಂಗಳ ಅರ್ಲಿ" ಹಲಸಿನ ಗಿಡ

ಸಾಧಾರಣವಾಗಿ ಸಿಗುವ ಹಲಸಿನ ಬೀಜದ ಮೂಲಕ ಗಿಡವನ್ನು ಬೆಳೆಸಿ ಬಳಿಕ ಅದರ ಕಾಂಡಕ್ಕೆ ನಿರ್ದಿಷ್ಟ ಜಾತಿಯ ಹಲಸಿನ ಗಿಡವನ್ನು ಕಸಿ ಮಾಡುವ ಮೂಲಕ ಮಂಗಳ ಅರ್ಲಿ ಹಲಸಿನ ತಳಿಯನ್ನು ನೆಡಲಾಗುತ್ತದೆ. ಇದೀಗ ಇದು ಕರಾವಳಿಯ ವಿಶೇಷ ತಳಿಯಾಗಿ ಮಾರ್ಪಾಡಾಗಿದೆ. ಈ‌ ಹಲಸಿನ ಹಣ್ಣು ತುಂಬಾ ಸಿಹಿಯಾಗಿದೆ ಎಂದು ತಳಿ ಅಭಿವೃದ್ಧಿಪಡಿಸಿದ ಸರ್ವೇಶ್ ರಾವ್ ಅವರು ಹೇಳುತ್ತಾರೆ. ಈ ತಳಿಯನ್ನು ಅಭಿವೃದ್ಧಿ ಪಡಿಸಲು ಕಸಿ ತಜ್ಞ ಗುರುರಾಜ ಬಾಳ್ತಿಲ್ಲಾಯ ಮತ್ತು ಗ್ಯಾಬ್ರಿಯಲ್ ವೇಗಸ್ ಅವರು ಸರ್ವೇಶ್ ಅವರಿಗೆ ಸಹಕಾರ ನೀಡಿದ್ದಾರೆ.

ಓದಿ :ಕೊಡಗಿನಲ್ಲಿ ಮುಂದುವರೆದ ಕಾಡಾನೆ ದಾಳಿ : ಓರ್ವ ಸಾವು